জেনেলিয়া ডিছুজা

জেনেলিয়া দেশমুখ (ওৰফে দিছুজা; জন্ম ৫ আগষ্ট ১৯৮৭)^১ হৈছে এগৰাকী ভাৰতীয় অভিনেত্ৰী আৰু মডেল৷ জেনেলিয়াই তেলুগু ভাষা, হিন্দী ভাষা, তামিল ভাষা, কন্নড় ভাষা আৰু মালয়ালম ভাষা ভাষাৰ একাধিক ছবিত অভিনয় কৰিছে৷ অমিতাভ বচ্চনৰ সৈতে পাৰ্কাৰ কলমৰ বিজ্ঞাপনত অভিনয় কৰি ব্যাপক জনপ্ৰিয়তা অৰ্জন কৰা জেনেলিয়াই ২০০৩ চনত তুঝে মেৰি কছম নামৰ ছবিখনৰ জৰিয়তে অভিনয়ৰ জগতত খোজ পেলায়৷^২ একেটা বৰ্ষতে মুক্তিপ্ৰাপ্ত বয়ছ নামৰ ছবিখনত এটি গুৰুত্বপূৰ্ণ চৰিত্ৰত জেনেলিয়াই অভিনয় কৰি দৰ্শকৰ মাজত পৰিচিতি লাভ কৰে৷ পৰৱৰ্তী সময়ত, অৰ্থাৎ ২০০৩ চনৰ পৰা ২০১২ চনৰ মাজত সময়ছোৱাত তেখেতে তেলেগু ভাষাৰ কেইবাখনো ছবিত অভিনয় কৰে৷

২০০৬ চনত জেনেলিয়াই বোমাৰিল্লো নামৰ তেলেগু ভাষাৰ ৰোমাণ্টিক ছবিখনত অভিনয় কৰে৷ এইখন ছবিৰ জৰিয়তে তেখেতে ফিল্মফেয়াৰ(দক্ষিণ)ৰ পৰা শ্ৰেষ্ঠ অভিনেত্ৰীৰ বঁটা লাভ কৰে৷ তেখেতৰ অভিনয়ক সমালোচকেও প্ৰশংসা কৰে৷ ২০০৮ চনত সন্তোষ সুব্ৰমনিয়ামে সেইখন ছবিৰ তামিল ৰিমেক নিৰ্মাণ কৰে৷ এইখন ছবিতো জেনেলিয়াই দক্ষতাৰে অভিনয় কৰে৷ ২০৮ চনতে জেনেলিয়াই হিন্দী ছবি জানে টু... য়া জানে নাত সবল অভিনয় কৰি দৰ্শকৰ মন জয় কৰে৷ তেলেগু আৰু তামিল ভাষাৰ উদ্যোগত বহুকেইখন সফল ছবিত অভিনয় কৰা জেনেলিয়াই ক্ৰমাৎ দাক্ষিণাত্যৰ শীৰ্ষ অভিনেত্ৰীৰ মৰ্যাদা পায়৷^৩৪ মূলসুঁতিৰ ছবিত অভিনয় কৰি যোৱাৰ উপৰি, জেনেলিয়াই টেলিভিছনৰ অনুষ্ঠান বিগ ছুইটছ্ত সূত্ৰধাৰৰ ভূমিকা ৰূপায়ন কৰিছে৷ ফাণ্টা, ভাৰজিন ম'বাইল ইণ্ডিয়া, ফাষ্ট্ৰেক, এলজি মবাইল, মাৰ্গো, পাৰ্ক আদি একাধিক প্ৰতিষ্ঠানৰ তেখেত ব্ৰেণ্ড এম্বাছাদৰ৷^৫

কৰ্মজীৱন

জেনেলিয়াৰ জন্ম হয় মুম্বাইত৷^৬ জেনেলিয়া এগৰাকী উত্তৰ-পূৰ্বীয়৷ উত্তৰ কংকান এটা মাৰাঠীভাষী খ্ৰীষ্টিয়ান পৰিয়ালত জেনেলিয়াৰ জন্ম হয়৷^৭মুম্বাইৰে বান্দ্ৰা উপনগৰত জেনেলিয়া লালিত-পালিত হয়৷ তেখেতৰ মাতৃ জিনেট ডিছুজা হৈছে ফাৰ্মা মাল্টিনেশ্যনেল কৰ্পোৰেছনৰ পৰিচালন প্ৰৱন্ধক৷ জেনেলিয়াক অভিনয়ৰ জগতত আগবঢ়াই দিয়াৰ স্বাৰ্থত তেখেতে ২০০৪ চনত চাকৰি জীৱন ত্যাগ কৰে৷ জেনেলিয়াৰ পিতৃ হৈছে নীল ডিছুজা৷ তেখেত টাটা কনছালটেন্সী ছাৰ্ভিছেছৰ এগৰাকী জ্যেষ্ঠ বিষয়ববীয়া৷^৮জেনেলিয়াৰ ভ্ৰাতৃ হৈছে নিগেল ডিছুজা৷^৯১০ তেখেত বোম্বাই ষ্টক এক্সছেঞ্জত কৰ্মৰত৷ ^১১ জেনেলিয়াই পোনপ্ৰথমে এপোষ্টলিক কাৰ্মে হাইস্কুলত পঢ়া-শুনা কৰে আৰু পাছলৈ বান্দ্ৰাৰে ছেইণ্ট এণ্ড্ৰিউছ কলেজত নামভৰ্তি কৰে৷ তেখেতে 'ব্যৱস্থাপনা অধ্যয়ন'ত স্নাতক ডিগ্ৰী অৰ্জন কৰে৷ ^১২ ২০০৩ চনত প্ৰথমখন ছবি তুঝে মেৰি কছমৰ দৃশ্যগ্ৰহণৰ সময়তেই তেখেতে স্নাতক ডিগ্ৰীও অৰ্জন কৰে৷^১৩

১৫ বছৰ বয়সতে জেনেলিয়াই প্ৰথমটো মডেলিঙৰ কাম পায়৷^১৪

যেতিয়া জেনেলিয়াক তুঝে মেৰি কছমৰ বাবে নিৰ্বাচিত কৰা হয়, তেতিয়া তেখেতে এই প্ৰস্তাৱটো নাকচ কৰে৷ কাৰণ, ছবিৰজগতত কাম কৰাৰ জেনেলিয়াৰ কোনো পৰিকল্পনা নাছিল৷ পিছে ছবিখনৰ কুশলীসকলে জেনেলিয়াক অনুৰোধ কৰি থাকিল৷ এই অনুৰোধ দুমাহপৰ্যন্ত চলিল৷ জেনেলিয়াই ছবিখনৰ তেলেগু সংস্কৰণ নুভে কাৱালী চালে আৰু তাৰেই ফলশ্ৰুতিত তেখেত ছবিখনত কাম কৰিবলৈ মান্তি হ'ল৷ ^১৫ ২০০৩ চনত তামিল ছবিপৰিচালক এছ. শংকৰে বয়ছ নামৰ ছবিখনৰ বাবে জেনেলিয়াৰ কাষ চাপে৷ শংকৰে পাৰ্কাৰ কলমৰ বিজ্ঞাপনত জেনেলিয়াৰ কাম দেখি সন্তুষ্ট হৈছিল৷^১৬ জেনেলিয়াক চিনেমাখনৰ বাবে অডিশ্যন দিয়া ৩০০ গৰাকী ছোৱালীৰ মাজৰ পৰা নিৰ্বাচন কৰা হয়৷ জেনেলিয়াই তিনিখন ছবিৰ বাবে সমান্তৰালভাৱে চুক্তিবদ্ধ হয়৷ সেইকেইখন হৈছে, হিন্দী ভাষাৰ তুঝে মেৰি কছম, তেলেগু ভাষাৰ সত্যম আৰু তামিল ভাষাৰ বয়ছ৷^১৭

২০০৬ চনত জেনেলিয়াই কেৰিয়াৰৰ এখন গুৰুত্বপূৰ্ণ ছবি বোমাৰিল্লোত অভিনয় কৰে৷ এইখন আছিল তেলেগু ভাষাৰ ৰোমাণ্টিক ছবি৷ ছবিখনে বক্স-অফিচত ব্লকবাষ্টাৰ হিচাপে পৰিগণিত হয়৷^১৮১৯ ছবিখনে ভাৰতত ২৫০ মিলিয়ন উপাৰ্জন কৰে৷^২০ ইয়াৰ লগে ২০০৬ চনৰ বাবে নন্দী বঁটাৰ শ্ৰেষ্ঠ কথাছবিৰ বঁটা লাভ কৰে৷^২১ হংসিনী নামৰ চৰিত্ৰটোত অভিনয় কৰি জেনেলিয়াই দৰ্শক আৰু সমালোচকৰ পৰা বিপুল প্ৰশংসা লাভ কৰে৷^২২ জেনেলিয়াই ফিল্মফেয়াৰ(দাক্ষিণাত্য)ৰ পৰা শ্ৰেষ্ঠ অভিনেত্ৰীৰ বঁটা লাভ কৰিবলৈ সক্ষম হয়৷^১২

ব্যক্তিগত জীৱন

২০১২ চনৰ ৩ ফেব্ৰুৱাৰিত জেনেলিয়া আৰু বলিউদৰ অভিনেতা ৰীতেশ দেশমুখৰ মাজত বিবাহ সম্পন্ন হয়৷^২৩ তেওঁলোকৰ দুটি পুত্ৰ সন্তান আছে৷ প্ৰথমটি সন্তান ৰিয়ানৰ জন্ম হৈছিল ২০১৪ চনৰ ২৫ নৱেম্বৰত৷^২৪২৫দ্বিতীয় পুত্ৰ ৰাহয়ালৰ জন্ম হৈছিল ২০১৬ চনৰ ১ জুনত৷^২৬২৭