জয়ন্ত তালুকদাৰ

জয়ন্ত তালুকদাৰ (Jayanta Talukdar) অসমৰ এজন আৰ্চাৰী খেলুৱৈ (ধনুৰ্বিদ)। ২০১২ চনৰ লণ্ডন অলিম্পিকলৈ নিৰ্বাচিত হোৱা তেওঁ একমাত্ৰ ভাৰতীয় পুৰুষ আৰ্চাৰ।^১

জন্ম

জয়ন্ত তালুকদাৰৰ জন্ম হয় ১৯৮৬ চনৰ ২ মাৰ্চত গুৱাহাটীত। দেউতাক ৰঞ্জন তালুকদাৰ।^২ মাক-দেউতাকৰ তেওঁ কনিষ্ঠতম সন্তান।^৩

খেলুৱৈ জীৱন

আৰ্চাৰী জগতত প্ৰৱেশ

গুৱাহাটীত অনুষ্ঠিত এটা প্ৰতিভা সন্ধানী পৰীক্ষাত জয়ন্ত তালুকদাৰে নিজৰ প্ৰতিভা আৰু যোগ্যতাৰ উমান দিয়ে আৰু ইয়াৰ পাছতেই তেওঁ প্ৰশিক্ষণ শিবিৰলৈ আমন্ত্ৰণ লাভ কৰে। ইয়াৰ আগলৈকে তেওঁ এই ক্ৰীড়াবিধৰ লগত পৰিচিত নাছিল।^৩ এই সুবিধা লাভ কৰি ১৩ বছৰীয়া তালুকদাৰে ২০০০ চনত জামছেদপুৰস্থিত টাটা আৰ্চাৰী একাডেমীত যোগদান কৰে আৰু তাত প্ৰশিক্ষণ লোৱা ভাৰতৰ বিভিন্ন স্থানৰ ৫০জন প্ৰশিক্ষাৰ্থীৰ ভিতৰত শীৰ্ষস্থান অৰ্জন কৰে।^৩ তাৰ কিছুদিনৰ পাছতেই তেওঁ ভাৰতৰ ৰাষ্ট্ৰীয় জুনিয়ৰ আৰ্চাৰী দলত স্থান লাভ কৰে।

ৰাষ্ট্ৰীয় আৰ্চাৰী

২০০৫ চনত পঞ্চবিংশতিতম ছিনিয়ৰ ৰাষ্ট্ৰীয় আৰ্চাৰী চেম্পিয়নশ্বিপত ১৮ বছৰ বয়সতে তেওঁ সকলো শীৰ্ষস্থানীয় খেলুৱৈক পৰাস্ত কৰি ব্যক্তিগত ৰিকাৰ্ভ শাখাত ছিনিয়ৰ ৰাষ্ট্ৰীয় চেম্পিয়ন খিতাপ অৰ্জন কৰে আৰু তেওঁ ৰাষ্ট্ৰীয় ৰেংকিঙত শীৰ্ষস্থান লাভ কৰে।^৩৪

আন্তঃৰাষ্ট্ৰীয় আৰ্চাৰী

আন্তঃৰাষ্ট্ৰীয় প্ৰতিযোগিতাত তেওঁ প্ৰথম আত্মপ্ৰকাশ কৰে ২০০৩ চনত য়েংগ'নত অনুষ্ঠিত হোৱা এছিয়ান চেম্পিয়নশ্বিপত।^৩ ২০০৪ চনত জুনিয়ৰ বিশ্ব আৰ্চাৰী চেম্পিয়নশ্বিপত ভাৰতীয় দলে ৰূপৰ পদক লাভ কৰে। তেওঁ ভাৰতীয় দলৰ ভিতৰত সৰ্বাধিক স্ক'ৰ অৰ্জন কৰে আৰু বিশ্ব আৰ্চাৰী চেম্পিয়নশ্বিপৰ ইতিহাসত ভাৰতে এইবাৰেই প্ৰথম পদক লাভ কৰে। )^৩ তেওঁৰ ক্ৰীড়াজীৱনৰ উচ্চতম সাফল্য হ'ল ২০০৬ আৰু ২০০৯ চনত ক্ৰ'ৱেছিয়াৰ প'ৰেক চহৰত অনুষ্ঠিত বিশ্ব কাপত ব্যক্তিগত ৰিকাৰ্ভ শাখাত লাভ কৰা স্বৰ্ণ পদক। এই প্ৰতিযোগিতাত স্বৰ্ণ পদক লাভ কৰা তেওঁ প্ৰথম ভাৰতীয় ধনুৰ্বিদ।^৩

সন্মান

জয়ন্ত তালুকদাৰৰ সফলতাক স্বীকৃতি দি ভাৰত চৰকাৰে তেওঁলৈ ২০০৬ চনৰ অৰ্জুন বঁটা আগবঢ়ায় আৰু ২০০৭ চনৰ ২৯ আগষ্টত তেওঁক এই বঁটা প্ৰদান কৰে।^৪

সাফল্য

ৰাষ্ট্ৰীয়

আন্তঃৰাষ্ট্ৰীয়

বাহ্যিক সংযোগ

• You Tube - Portrait Archer - Jayanta Talukdar (IND)