চান্দিনী তামিলাৰসন

চান্দিনী তামিলাৰসন (ইংৰাজী ভাষা: Chandini Tamilarasan) এগৰাকী ভাৰতীয় অভিনেত্ৰী যিয়ে তামিল ভাষা আৰু তেলুগু ভাষা ভাষাৰ চলচ্চিত্ৰত অভিনয় কৰে। ২০১০ চনত কে. ভাগ্যৰাজৰ ছবি সিদ্ধু +২ত মুখ্য চৰিত্ৰৰ জৰিয়তে তেওঁ অভিনয় জীৱনৰ পাতনি মেলে। ইয়াৰ পিছত তেওঁ নান ৰাজাভাগা পোগিৰেন (২০১৩) ছবিত অভিনয়ৰ বাবে চুক্তিবদ্ধ হৈছিল।

প্ৰাৰম্ভিক আৰু ব্যক্তিগত জীৱন

চান্দিনীৰ জন্ম হৈছিল তামিলাৰসন আৰু পদ্মঞ্জলিৰ ঔৰসত। তেওঁ পিতৃৰফালৰপৰা তামিল ভাষা আৰু মাতৃৰফালৰপৰা তেলুগু ভাষা মূলৰ।^১২ ২০১৮ চনৰ ১২ ডিচেম্বৰত তেওঁ নৃত্য নিৰ্দেশক নন্দৰ সৈতে বিবাহপাশত আবদ্ধ হয়।^৩

কৰ্মজীৱন

২০০৭ চনত ১৭ বছৰ বয়সত তেওঁ ‘মিছ চেন্নাই’ প্ৰতিযোগিতাৰ এগৰাকী প্ৰতিযোগী আছিল, কিন্তু তেওঁ শীৰ্ষ তিনিগৰাকীৰ ভিতৰত স্থান লাভ কৰা নাছিল।^৪ ইয়াৰ পিছত ২০০৯ চনত তেওঁ এটা তামিল চেনেলৰ ৰিয়েলিটি শ্ব’ত অংশ লৈছিল আৰু সেই সময়তে তেওঁ কে. ভাগ্যৰাজৰ কাৰ্যালয়ৰপৰা তেওঁৰ নতুন প্ৰকল্পৰ বাবে স্ক্ৰীণ টেষ্ট দিবলৈ আমন্ত্ৰণ লাভ কৰে।^৫৬ তেওঁৰ পৰিৱেশনত আপ্লুত হৈ তেওঁক ভাগ্যৰাজৰ পুত্ৰ শান্তনু ভাগ্যৰাজৰ বিপৰীতে সিদ্ধু +২ ছবিত অভিনয়ৰ বাবে চুক্তিবদ্ধ কৰা হয়। কিছু পলমকৈ ২০১০ চনৰ ডিচেম্বৰত মুক্তি পোৱা ছবিখনে বক্স অফিচত বিশেষ সফলতা লাভ কৰা নাছিল আৰু মধ্যমীয়া সঁহাৰি লাভ কৰিছিল।^৭ ২০১০ চনৰ মাজভাগত তেওঁ তামিল অভিনেতা আৰ্যৰদ্বাৰা প্ৰযোজিত আৰু নৱাগত অভিনেতা অভিনীত পদীথুৰাই নামৰ এখন ছবিত চুক্তিবদ্ধ হৈ কাম কৰিছিল। ছবিখনে ছবিগৃহত মুক্তি লাভ নকৰিলে।^৮ যদিও তেওঁ আৰু অধিক ছবিৰ প্ৰস্তাৱ লাভ কৰিছিল, তথাপি তেওঁ সেই সকলোবোৰ প্ৰত্যাখ্যান কৰি শিক্ষা সম্পূৰ্ণ কৰিবলৈ মহাবিদ্যালয়লৈ উভতি যায়।^৯ ২০১৪ চনত তেওঁ স্নাতক ডিগ্ৰী সম্পূৰ্ণ কৰে।^১০

২০১৩ চনত তেওঁ পৃথ্বী ৰাজকুমাৰৰ ছবি নান ৰাজাভাগা পোগিৰেনত নকুলৰ সৈতে অভিনয় কৰিছিল। সেই বছৰৰে শেষৰফালে তেওঁ কালীচৰণৰ জৰিয়তে তেলেগু ছবিত আত্মপ্ৰকাশ কৰে।^১১ ২০১৪ চনত তেওঁ লাভাৰ্ছ আৰু কিৰাক নামৰ দুখন ছবিত অভিনয়ৰ সুযোগ লাভ কৰে।^১২১৩

পৰৱৰ্তী সময়ত চান্দিনীক ভিল আম্বু (২০১৬), নৈয়াপ্পুদাই (২০১৬), কান্নুলা কাচা কাত্তাপ্পা (২০১৬), এন্নোডু বিলাইয়াদু (২০১৭), কাভান (২০১৭), মান্নাৰ ভাগাইয়াৰা (২০১৮) আৰু ৰাজা ৰংগুস্কি (২০১৮) আদি ছবিত দেখা যায়। ইয়াৰ পিছৰ বছৰত তেওঁৰ তিনিখন ছবি পেট্টিকাডাই (২০১৯), কাধাল মুন্নেত্ৰ কাঝাগম (২০১৯) আৰু নান আভালাই সান্ধিথা পোথু (২০১৯) মুক্তি পায়।^{১৪১৫১৬}

থাজামপু ধাৰাবাহিকৰ জৰিয়তে তেওঁ টেলিভিছন জগতত আত্মপ্ৰকাশ কৰে। পিছলৈ তেওঁ অভিনেত্ৰী শিৱানী নাৰায়ণৰ স্থানত ৰেট্টাই ৰোজা ধাৰাবাহিকখনৰ মুখ্য মহিলা চৰিত্ৰৰ বাবে নিৰ্বাচিত হয়।^১৭

পৰৱৰ্তী সময়ত তেওঁ মাই ডিয়াৰ লিছা (২০২২), কুডিমাহান (২০২৩) আৰু ফায়াৰ (২০২৫) আদি ছবিত মুখ্য মহিলা চৰিত্ৰত অভিনয় কৰে।