উমেশ যাদৱ

উমেশকুমাৰ তিলক যাদৱ (उमेश टिळक यादव, জন্ম ২৫ অক্টোবৰ ১৯৮৭) এজন ভাৰতীয় ক্ৰিকেটাৰ। ঘৰুৱা ক্ৰিকেটত তেওঁ বিদৰ্ভৰ হৈ খেলে। সোঁহতীয়া বেগী বলাৰ যাদৱে ২০০৮ চনৰপৰা বিদৰ্ভ দলৰ হৈ খেলি আহিছে আৰু এই দলৰপৰা ভাৰতীয় জাতীয় টেষ্ট ক্ৰিকেট দলত স্থান পোৱা প্ৰথম খেলুৱৈ। ২০১০ চনৰ মে'ত জিম্বাবৱেৰ বিৰুদ্ধে এদিনীয়া ক্ৰিকেটত তেওঁৰ অভিষেক ঘটে। একে বছৰৰে নৱেম্বৰ মাহত ৱেষ্ট ইণ্ডিজৰ বিৰুদ্ধে তেওঁৰ টেষ্ট অভিষেক ঘটে। 'গেম্‌ছ আনলিমিটেড' নামৰ কোম্পানীটোৱে তেওঁৰ পেছাদাৰী কেৰিয়াৰ পৰিচালনা কৰে।^১২ তেওঁ বৰ্তমান ভাৰতীয় দলৰ আটাইতকৈ বেগী বলাৰ আৰু তেওঁৰ সৰ্বোচ্চ বেগ ১৫৪.৮ কিলোমিটাৰ প্ৰতি ঘণ্টা।^৩

ব্যক্তিগত জীৱন

যাদৱৰ দেউতাক উত্তৰ প্ৰদেশৰ দেওৰিয়া জিলাৰ এজন কয়লা খনিৰ শ্ৰমিক আছিল। মহাৰাষ্ট্ৰৰ নাগপুৰ জিলাৰ এখন শ্ৰমিক গাঁৱত যাদৱ ডাঙৰ-দীঘল হয়। পেছাদাৰী ক্ৰিকেট খেলাৰ পূৰ্বে যাদৱে সেনাবাহিনী আৰু আৰক্ষী সেৱাত ভৰ্তি হ'বলৈ চেষ্টা কৰি ব্যৰ্থ হৈছিল। ২০১৩ চনৰ ২৯ মে'ত দিল্লীৰ ফেশ্বন ডিজাইনাৰ তানিয়া ৱাধৱাৰ লগত বিবাহপাশত আৱদ্ধ হয়।^৪

কেৰিয়াৰৰ আৰম্ভণি

টেনিছ বল ক্ৰিকেট খেলা যাদৱে চামৰাৰ বলেৰে অনুশীলন আৰম্ভ কৰে আৰু সোনকালেই ঘৰুৱা ক্ৰিকেটৰ ২০০৭-০৮ বৰ্ষৰ ৰঞ্জি ট্ৰফীৰ প্লেট লীগত তেওঁ তুলনামূলকভাৱে দুৰ্বল বিদৰ্ভ দলত স্থান পায়। বিদৰ্ভ দলৰ অধিনায়ক প্ৰীতম গান্ধীয়ে যাদৱক সহায় কৰে আৰু এক টুৱেণ্টি২০ প্ৰতিযোগিতাত 'এয়াৰ ইণ্ডিয়া' দলত যাদৱক স্থান দিয়ায়।^৫ ২০০৮ চনৰ ৩ নৱেম্বৰত ৰঞ্জি ট্ৰফীত বিদৰ্ভ দলৰ হৈ মধ্য প্ৰদেশৰ বিৰুদ্ধে যাদৱৰ প্ৰথম শ্ৰেণী ক্ৰিকেটত অভিষেক ঘটে।^৬

ইণ্ডিয়ান প্ৰীমিয়াৰ লীগ

২০০৮ চনত দেল্হি ডেয়াৰডেভিল্‌ছ দলে তেওঁক $৩০,০০০ ত ক্ৰয় কৰে।^৭ ২০১০ চনৰ আই পি এলত যাদৱৰ অভিষেক ঘটে আৰু সেইবাৰ তেওঁ ৬খন খেলত ৩০.৬৬ গড়ে ৬টা উইকেট দখল কৰে।^৮৯ ২০১৪ চনত তেওঁ কলকাতা নাইট ৰাইডাৰ্ছ দললৈ আহে।

বাহ্যিক সংযোগ

• ক্ৰিকইনফ' প্ৰফাইল
• উইজডেন প্ৰফাইল
• ক্ৰিকেট আৰ্কাইভ প্ৰফাইল
• টুইটাৰ একাউণ্ট