আৰুষী শৰ্মা

আৰুষী শৰ্মা (Arushi Sharma; জন্ম: ১৮ নৱেম্বৰ ১৯৯৫) এগৰাকী ভাৰতীয় অভিনেত্ৰী। তেওঁ মূলতঃ হিন্দী চলচ্চিত্ৰ আৰু ধাৰাবাহিকত অভিনয় কৰে।^১ তেওঁ ইমতিয়াজ আলীৰ পৰিচালনাত নিৰ্মিত ছবি তামাচা (২০১৫)ত সৰু চৰিত্ৰ এটিত অভিনয় কৰি চলচ্চিত্ৰ জগতত পদাৰ্পণ কৰে। ২০২০ চনত, আলীৰ লাভ আজ কাল নামৰ ছবিখনত অভিনয়েৰে অভিনেত্ৰীৰূপে সকলোৰে নজৰলৈ আহে। ইয়াৰ পিছত, শৰ্মাই নেটফ্লিক্সৰ নাট্য চলচ্চিত্ৰ জাদুগৰ (২০২২) আৰু ধাৰাবাহিক কালা পানী (২০২৩)ত অভিনয় কৰে।^২৩

প্ৰাৰম্ভিক জীৱন

১৯৯৫ চনৰ ১৮ নৱেম্বৰ তাৰিখে, হিমাচল প্ৰদেশৰ ৰাজধানী ছিমলাত শৰ্মাই জন্মগ্ৰহণ কৰিছিল। তেওঁৰ পিতৃ-মাতৃ, দুয়োগৰাকী উকীল। তেওঁ হিমাচল প্ৰদেশৰ জেপী তথ্য প্ৰযুক্তি বিশ্ববিদ্যালয়ৰপৰা তথ্য প্ৰযুক্তি বিষয়ত স্নাতক ডিগ্ৰী লাভ কৰে। অভিনয়ৰ ক্ষেত্ৰখনত খোজ দিয়াৰ আগতে, তেওঁ গুৰুগ্ৰাম চহৰত কাম কৰি আছিল।^৪৫

কৰ্মজীৱন

২০১৫ চনত, ইমতিয়াজ আলী পৰিচালিত তামাচা নামৰ ছবিত অভিনয়েৰে শৰ্মাই অভিনয় জীৱনৰ আৰম্ভণি কৰিছিল। ছবিখনত তেওঁ ৰণবীৰ কাপুৰৰ শিক্ষয়িত্ৰীৰ চৰিত্ৰত অভিনয় কৰাৰ লগতে "চলি কাহিনী" গীতটোত সমযুক্তা নামৰ চৰিত্ৰটোতো অভিনয় কৰিছিল।^৬৭৮

ইয়াৰ পিছত, তেওঁ ২০১৭ চনত, ধ্ৰুৱ চেহগালৰ বিপৰীতে কেটৰ্চ: ডিমিনিছিং ৰিটাৰ্ণছ আৰু ২০১৮ চনত, পাৱেল গুলাটিৰ বিপৰীতে দ্য আদাৰ ৱে নামৰ দুখন চুটি ছবিত অভিনয় কৰে।^৯ আলীৰ লাভ আজ কাল নামৰ ছবিখনত শৰ্মাই অভিনেতা কাৰ্তিক আৰিয়ানৰ বিপৰীতে অভিনয় কৰিছিল।^১০ হিন্দুস্তান টাইমছে উল্লেখ কৰে, "আৰুষীৰ চৰিত্ৰটি সূক্ষ্ম, সহজ আৰু তেওঁৰ অভিব্যক্তি আৰু চেহেৰাই তেওঁৰ সংলাপসমূহতকৈ অধিক প্ৰভাবিত কৰে।" ^১১ টাইমছ অৱ ইণ্ডিয়াই উল্লেখ কৰে যে শৰ্মাই যথেষ্ট ফলপ্ৰসূ অভিনয় কৰিছে।^১২

২০২২ চনত শৰ্মাই নেটফ্লিক্সৰ জাদুগৰ নামৰ ছবিখনত জীতেন্দ্ৰ কুমাৰৰ বিপৰীতে অভিনয় কৰিছিল। ছবিখনত তেওঁ দিশা ছাব্ৰা নামৰ এগৰাকী ডাক্টৰৰ চৰিত্ৰত অভিনয় কৰিছিল,^১৩ যিয়ে যাদুকৰ এজনক লগ পায়, যিজন এজন ফুটবলাৰো। ৰেডিফ.কমে উল্লেখ কৰে, “শৰ্মাই প্ৰৱাহৰ সৈতেই যায় আৰু নম্ৰতাৰে বলীউডৰ আন এক সুন্দৰ প্ৰদৰ্শনেৰে মীনুৰ অস্বাস্থ্যকৰ প্ৰবৃত্তিক শক্তিশালী কৰি তোলে।”^১৪ ইণ্ডিয়া টুডেই তেওঁৰ অভিনয়ক গড় প্ৰদৰ্শন বুলি উল্লেখ কৰে।^১৫ শৰ্মাই নেটফ্লিক্সৰ ধাৰাবাহিক কালা পানী (২০২৩)তো অভিনয় কৰিছিল।^১৬

চলচ্চিত্ৰপুঞ্জী

চলচ্চিত্ৰ

দূৰদৰ্শন