আই ভি শশী

ইৰুপ্পম বীতিু শশীধৰণ (জন্ম ২৮ মাৰ্চ ১৯৪৮ আৰু মৃত্যু ২৪ অক্টোবৰ ২০১৭), পেচাগতভাৱে আই ভি শশী নামেৰে জনাজাত, এজন ভাৰতীয় চলচ্চিত্ৰ পৰিচালক আছিল। তেওঁ মূলতঃ মালয়ালম ভাষা ভাষাৰ উপৰি তামিল ভাষা আৰু হিন্দী ভাষা ভাষাত ১১০খনতকৈও অধিক চলচ্চিত্ৰ নিৰ্মাণ কৰিছিল। ২০১৫ চনত তেওঁক মালয়ালম চলচ্চিত্ৰৰ সৰ্বোচ্চ সন্মান জে চি ডেনিয়েল বঁটা প্ৰদান কৰা হৈছিল। প্ৰায়ে এজন পথ-প্ৰদৰ্শক হিচাপে বৰ্ণনা কৰা শশীয়ে ১৯৭০ ৰপৰা ১৯৯০ ৰ দশকলৈকে মালয়ালম চলচ্চিত্ৰৰ পৰিৱৰ্তনৰ সময়ছোৱাত নিজৰ পৰিচয় দাঙি ধৰিছিল।^১

প্ৰাৰম্ভিক আৰু ব্যক্তিগত জীৱন

আই ভি চন্দ্ৰন আৰু কৌশল্যাৰ পুত্ৰ হিচাপে ১৯৪৮ চনৰ ২৮ মাৰ্চত কোজীকোডৰ ওচৰৰ ৱেষ্ট হিলত শশীৰ জন্ম হৈছিল।^২ তেওঁ ১৯৮০ চনৰ ২৮ আগষ্টত মালয়ালম চলচ্চিত্ৰ জগতৰ অভিনেত্ৰী সীমাৰ সৈতে বিবাহপাশত আবদ্ধ হয়।^৩ তেওঁলোকৰ মাজত প্ৰথম সাক্ষাৎ হৈছিল তেওঁৰ পৰিচালিত ছবি আৱালুদে ৰাৱুকল (১৯৭৮) ৰ ছেটত আৰু সীমা তেওঁৰ প্ৰিয় অভিনেত্ৰী হৈ পৰিছিল। তেওঁলোকে একেলগে ৩০খনতকৈও অধিক চলচ্চিত্ৰত কাম কৰিছিল। তেওঁলোকৰ অনু নামৰ এগৰাকী কন্যা আৰু অনি নামৰ এজন পুত্ৰকে ধৰি দুটি সন্তান আছে। অনুৱে দেউতাকৰদ্বাৰা পৰিচালিত ছবি চিম্ফনী ত অভিনয় কৰিছিল। ২০১০ চনৰ ১০ ডিচেম্বৰত অনুৱে মিলন নায়াৰৰ সৈতে বিবাহপাশত আবদ্ধ হয়।^৪ আনহাতে অনি এজন তেলুগু চলচ্চিত্ৰ পৰিচালক।^৫

কৰ্মজীৱন

শশীয়ে বিভিন্ন ধাৰাৰ মালয়ালম চলচ্চিত্ৰ পৰিচালনা কৰিছে। চিত্ৰনাট্যকাৰ টি দামোদৰনে লিখা তেওঁৰ যুদ্ধভিত্তিক চলচ্চিত্ৰ ১৯২১ আছিল ইটালীয় চলচ্চিত্ৰ মহোৎসৱত মনোনীত হোৱা প্ৰথমখন মালয়ালম চলচ্চিত্ৰ। তেওঁৰ ইনা আছিল বাল্যবিবাহৰ আধাৰত নিৰ্মিত প্ৰথমখন মালয়ালম চলচ্চিত্ৰ। ১৯৮২ চনত তেওঁ তেওঁৰ আৰূদম চলচ্চিত্ৰখনৰ বাবে ইয়াৰ প্ৰযোজক ৰোছাম্মা জৰ্জৰ সৈতে যুটীয়াভাৱে ৰাষ্ট্ৰীয় একতাৰ ওপৰত শ্ৰেষ্ঠ পূৰ্ণদৈৰ্ঘ্য চলচ্চিত্ৰৰ বাবে ৰাষ্ট্ৰীয় চলচ্চিত্ৰ বঁটাৰ নাৰ্গিছ দত্ত বঁটা লাভ কৰে। এঝামকাডালিনাক্কাৰে আছিল উত্তৰ আমেৰিকাত শ্বুটিং কৰা প্ৰথমখন মালয়ালম চলচ্চিত্ৰ, যাৰ অন্যতম এক স্থান আছিল মানহাট্টান।^৬ ইয়াৰ সুৰালোকজলধাৰা গীতটিৰ শ্বুটিং কানাডাৰ ওণ্টাৰিঅ'ৰ নায়গ্ৰা জলপ্ৰপাতৰ ওচৰত কৰা হৈছিল।^৭

মৃত্যুৰ সময়ত তেওঁ কুৱেইট যুদ্ধৰ ওপৰত আধাৰিত বাৰ্ণিং ৱেলছ নামৰ এখন চলচ্চিত্ৰৰ প্ৰাক প্ৰযোজনাৰ কাম কৰি আছিল, যিখন ছবি তেওঁ শোহান ৰায়ৰ সৈতে যুটীয়াভাৱে পৰিচালনা কৰাৰ কথা আছিল।^৮৯১০

মৃত্যু

হৃদযন্ত্ৰৰ ক্ৰিয়া বন্ধ হোৱাৰ ফলত ২০১৭ চনৰ ২৪ অক্টোবৰৰ ৰাতিপুৱা ১০:৩০ বজাত চেন্নাইৰ শালিগ্ৰামমস্থিত নিজ গৃহত শশীৰ ৬৯ বছৰ বয়সত মৃত্যু হয়।^{১১১২১৩১৪}

চলচ্চিত্ৰ নিৰ্মাণ শৈলী

কাৰিকৰী পাৰদৰ্শিতা আৰু আড়ম্বৰপূৰ্ণ নিৰ্মাণশৈলীৰ বাবে জনাজাত আই ভি শশীক মালয়ালম চলচ্চিত্ৰ জগতত ডাঙৰ কেনভাচ আৰু সজীৱ আখ্যানৰ সূচনা কৰা পৰিচালক হিচাপে গণ্য কৰা হয়, যিবোৰত কোনো আদৰ্শবাদী বা ৰোমাণ্টিক চৰিত্ৰৰ পৰিৱৰ্তে গ্ৰাম্য আৰু সাধাৰণ চৰিত্ৰৰ আধিপত্য আছিল। তেওঁৰ বেছিভাগ সৃষ্টিতেই শৈল্পিক উপাদান আৰু বাণিজ্যিক মূল্যবোধৰ এক সুন্দৰ মিশ্ৰণ দেখা গৈছিল।^১৫ তেওঁৰ কাহিনীবোৰত কামোদ্দীপকতা আৰু এক সুকীয়া দৃশ্যমান অনুভূতি থকা বুলি কোৱা হয়। ইয়াৰে কিছুমান ছবি মূলতঃ শক্তিশালী নাৰী চৰিত্ৰৰ উপস্থিতি থকা পৰিৱেশত নিৰ্মাণ কৰা হৈছিল। তেওঁৰ চলচ্চিত্ৰৰ চৰিত্ৰবোৰ বিভিন্ন পটভূমিৰপৰা আহিছিল আৰু ইয়াৰে কিছুমানে কেৰালাৰ সুশীল সমাজৰ উদীয়মান দাবী আৰু ইচ্ছাক প্ৰতিনিধিত্ব কৰিছিল।^১৬

বঁটা আৰু সন্মান

ৰাষ্ট্ৰীয় চলচ্চিত্ৰ বঁটা

• ১৯৮২: ৰাষ্ট্ৰীয় একতাৰ ওপৰত শ্ৰেষ্ঠ পূৰ্ণদৈৰ্ঘ্য চলচ্চিত্ৰৰ বাবে নাৰ্গিছ দত্ত বঁটা (আৰূদম চলচ্চিত্ৰৰ বাবে)

কেৰালা ৰাজ্যিক চলচ্চিত্ৰ বঁটা

• ১৯৭৬: শ্ৰেষ্ঠ কলা পৰিচালক (অনুভৱম চলচ্চিত্ৰৰ বাবে)
• ১৯৮৪: দ্বিতীয় শ্ৰেষ্ঠ চলচ্চিত্ৰ (আলক্কুত্তাথিল থানিয়ে চলচ্চিত্ৰৰ বাবে)
• ১৯৮৮: শ্ৰেষ্ঠ জনপ্ৰিয় চলচ্চিত্ৰ (১৯২১ চলচ্চিত্ৰৰ বাবে)
• ১৯৮৯: শ্ৰেষ্ঠ পৰিচালক (মৃগয়া চলচ্চিত্ৰৰ বাবে)
• ২০১৪: জে চি ডেনিয়েল বঁটা

ফিল্মফেয়াৰ বঁটা দক্ষিণ

• ১৯৭৭: শ্ৰেষ্ঠ পৰিচালক – মালয়ালম (ইথা ইভিদে ৱাৰে চলচ্চিত্ৰৰ বাবে)
• ১৯৭৮: শ্ৰেষ্ঠ পৰিচালক – মালয়ালম (ঈত্তা চলচ্চিত্ৰৰ বাবে)
• ২০১৫: জীৱনজোৰা সাধনা বঁটা^১৭

চলচ্চিত্ৰ তালিকা

মালয়ালম

তামিল

হিন্দী

তেলুগু

বাহ্যিক সংযোগ

• দ্য হিন্দু Friday Review –
• IV Sasi at MSI