অমীষা পেটেল

অমীষা পেটেল (ইংৰাজী ভাষা: Ameesha Patel; জন্ম: ৯ জুন, ১৯৭৫) এগৰাকী ভাৰতীয় অভিনেত্ৰী যিয়ে ঘাইকৈ হিন্দী ভাষা আৰু তেলুগু ভাষা ছবিত অভিনয় কৰে। পেটেলে ফিল্মফেয়াৰ বঁটা আৰু জি চিনে বঁটাকে ধৰি কেইবাটাও বঁটা লাভ কৰিছে।

পেটেলে ২০০০ চনত ৰোমাণ্টিক থ্ৰিলাৰ ছবি কহো না... প্যাৰ হ্যায়ৰ জৰিয়তে অভিনয়ত আত্মপ্ৰকাশ কৰিছিল। এই ছবিখন এক বৃহৎ ব্যাৱসায়িক সফল ছবি আছিল আৰু ইয়াৰ বাবে তেওঁ শ্ৰেষ্ঠ নৱাগতা অভিনেত্ৰীৰ জি চিনে বঁটা লাভ কৰিছিল। এই সফলতা তেলুগু একচন ছবি বদৰী (২০০০) আৰু সৰ্বাধিক উপাৰ্জনকাৰী পিৰিয়ড ড্ৰামা ছবি গদৰ: এক প্ৰেম কথাৰ (২০০১) জৰিয়তে অব্যাহত থাকে। গদৰৰ বাবে তেওঁ ফিল্মফেয়াৰ স্পেচিয়েল পাৰফৰমেন্স বঁটা লাভ কৰিছিল।^১ হমৰাজ আৰু ক্যা য়েহী প্যাৰ হ্যায় (দুয়োখন ২০০২) ছবিত অভিনয় কৰাৰ পাছত পেটেলৰ কেৰিয়াৰৰ অধোগতি আৰম্ভ হয়। পৰৱৰ্তী সময়ত তেওঁ হানিমুন ট্ৰেভেলছ প্ৰাইভেট লিমিটেড (২০০৭), ভুল ভুলাইয়া (২০০৭) আৰু ৰেচ ২ (২০১৩) ছবিত সহযোগী চৰিত্ৰত অভিনয় কৰে।

কেৰিয়াৰৰ বহু উঠা-নমাৰ পিছত পেটেলে তেওঁৰ পূৰ্বৰ সফল ছবিৰ ছিকুয়েল গদৰ ২ত (২০২৩) পুনৰ অভিনয় কৰি এক শক্তিশালী প্ৰত্যাৱৰ্তন কৰে। এই ছবিখন তেওঁৰ কেৰিয়াৰৰ সৰ্বাধিক উপাৰ্জনকাৰী ছবি হিচাপে পৰিগণিত হয়।^২ অভিনয় জীৱনৰ উপৰি পেটেল এগৰাকী মানৱতাবাদী কৰ্মী আৰু তেওঁ কেইবাটাও জনহিতকৰ কামৰ সৈতে জড়িত।

প্ৰাৰম্ভিক জীৱন আৰু পটভূমি

১৯৭৫ চনৰ ৯ জুনত এজন গুজৰাটী ভাষা পিতৃ অমিত পেটেল^৩ আৰু এগৰাকী সিন্ধী ভাষা তথা পঞ্জাবী ভাষা প্ৰবাসী ভাৰতীয় মাতৃ আশাৰ কোলাত পেটেলৰ জন্ম হৈছিল।^৪৫ তেওঁ অস্মিত পেটেলৰ ভগ্নী আৰু অধিবক্তা তথা ৰাজনীতিবিদ বেৰিষ্টাৰ ৰজনী পেটেলৰ নাতিনী, যি মুম্বাইৰ কংগ্ৰেছ প্ৰদেশ কমিটিৰ সভাপতি আছিল। মুম্বাইৰ ব্ৰীচ কেণ্ডী হাস্পতালত জন্মগ্ৰহণ কৰা অমীষা পাঁচ বছৰ বয়সৰপৰাই এগৰাকী প্ৰশিক্ষিত ভাৰতনাট্যম নৃত্যশিল্পী।^৬ তেওঁৰ নামটো পিতৃ অমিতৰ নামৰ প্ৰথম তিনিটা আখৰ আৰু মাতৃ আশাৰ নামৰ শেষৰ তিনিটা আখৰৰ সংমিশ্ৰণত ৰখা হৈছে।^৭

পেটেলে মুম্বাইৰ কেথেড্ৰেল এণ্ড জন কনন স্কুলত অধ্যয়ন কৰিছিল আৰু ১৯৯২-৯৩ শিক্ষাবৰ্ষত তেওঁ বিদ্যালয়খনৰ হেড গাৰ্ল আছিল। ইয়াৰ পিছত তেওঁ আমেৰিকা যুক্তৰাষ্ট্ৰৰ বষ্টনৰ টাফ্টছ বিশ্ববিদ্যালয়লৈ বায়’-জেনেটিক ইঞ্জিনিয়াৰিং পঢ়িবলৈ যায়। দুবছৰ পঢ়াৰ পিছত তেওঁ অৰ্থনীতি বিষয়লৈ নিজৰ মেজৰ সলনি কৰে।^৬

স্নাতক ডিগ্ৰী লাভ কৰাৰ পাছত পেটেলৰ কেৰিয়াৰ আৰম্ভ হৈছিল খাণ্ডৱালা ছিকিউৰিটিজ লিমিটেডত এগৰাকী অৰ্থনৈতিক বিশ্লেষক হিচাপে। পৰৱৰ্তী সময়ত তেওঁ মৰগান ষ্টেনলীৰপৰা এটা অফাৰ লাভ কৰিছিল যদিও তাক প্ৰত্যাখ্যান কৰে। ভাৰতলৈ উভতি অহাৰ পাছত তেওঁ সত্যদেৱ ডুবেৰ থিয়েটাৰ গোটত যোগদান কৰে আৰু কেইবাখনো নাটকত অভিনয় কৰে। ইয়াৰ ভিতৰত আছিল তনবীৰ খানৰদ্বাৰা লিখিত ১৯৯৯ চনৰ এখন উৰ্দু ভাষাৰ নাটক নীলম।^৮

একে সময়তে তেওঁ মডেলিং জগততো খোজ পেলায় আৰু কেইবাটাও বিজ্ঞাপন অভিযানত অংশ লয়। পেটেলে বাজাজ, গ্ল’ এণ্ড লাভলী, কেডবেৰীছ, ফেম, লাক্স আদিকে ধৰি বহুতো জনাজাত ভাৰতীয় ব্ৰেণ্ডৰ বাবে মডেলিং কৰিছে।

তেওঁৰ ককাক ৰজনী পেটেল এজন অধিবক্তা আৰু ভাৰতীয় জাতীয় কংগ্ৰেছৰ ৰাজনীতিবিদ আছিল। ১৯৮৬ চনত মুম্বাইৰ এখন ৰাস্তাৰ নাম তেওঁৰ সন্মানত 'বেৰিষ্টাৰ ৰজনী পেটেল মাৰ্গ' ৰখা হৈছিল।^৯

সংবাদ মাধ্যমত

২০০২ চনৰপৰা ২০০৫ চনৰ ভিতৰত পেটেলে ৰেণ্ডিভ্যু উইথ চিমি গাৰেৱাল আৰু দ্য মনীষ মালহোত্ৰা শ্ব' -ৰ দৰে কেইবাটাও টক শ্ব'ত অংশগ্ৰহণ কৰিছিল। ২০০৬ চনত পেটেলে গীতৰ প্ৰতিভা সন্ধানী প্ৰতিযোগিতা ইণ্ডিয়ান আইডল ২-ৰ ভেলেণ্টাইন ডে-ৰ বিশেষ খণ্ডত এগৰাকী অতিথি বিচাৰক হিচাপে উপস্থিত আছিল।

পেটেলক সঘনাই বলীউডৰ অন্যতম আবেদনময়ী অভিনেত্ৰী হিচাপে অভিহিত কৰা হয়।^{১০১১১২} ৰিডিফ-এ পেটেলক বলীউডৰ অন্যতম আবেদনময়ী অভিনেত্ৰী^১১ আৰু ২০০১ চনৰ শীৰ্ষ বলীউড অভিনেত্ৰীসমূহৰ তালিকাত স্থান দিছিল।^১৩ তেওঁ ৰিডিফৰ ২০০৮ চনৰ আটাইতকৈ আবেদনময়ী অভিনেত্ৰীৰ তালিকাত দশম স্থান লাভ কৰিছিল।^১০ ৰিডিফে পেটেলক ২০০৮ চনৰ আটাইতকৈ আবেদনময়ী মেগাজিন কভাৰ গাৰ্লসমূহৰ মাজৰ এগৰাকী হিচাপেও উল্লেখ কৰিছিল।^১৪ তেওঁ তিনিবাৰকৈ মেক্সিম ইণ্ডিয়া-ৰ বেটুপাতত স্থান পোৱাৰ লগতে পুৰুষৰ অন্যান্য আলোচনী যেনে দ্য মেন, এফ এইচ এম আৰু মেন্স ৱৰ্ল্ড-ৰ বেটুপাততো স্থান লাভ কৰিছে।