লক্ষীমপুৰ চিকিৎসা মহাবিদ্যালয় আৰু চিকিৎসালয়

লক্ষীমপুৰ চিকিৎসা মহাবিদ্যালয় আৰু চিকিৎসালয় (Lakhimpur Medical College and Hospital) অসমৰ লখিমপুৰ জিলাৰ উত্তৰ লখিমপুৰত অৱস্থিত এখন চৰকাৰী চিকিৎসা মহাবিদ্যালয়।^১ ২০২১ চনৰ ১ অক্টোবৰ তাৰিখৰ পৰা ই সম্পূৰ্ণৰূপে কাৰ্যক্ষম হৈছিল।^২ এইখন অসমৰ অষ্টম চিকিৎসা মহাবিদ্যালয়।^১ অসমৰ চৰকাৰৰ স্বাস্থ্য আৰু পৰিয়াল কল্যাণ বিভাগ আৰু অসম চিকিৎসা সঞ্চালকালয়ে মহাবিদ্যালয়খন পৰিচালনা কৰে। চিকিৎসা মহাবিদ্যালয়খন ৰাষ্ট্ৰীয় আয়ুৰ্বিজ্ঞান আয়োগৰ স্বীকৃতি প্ৰাপ্ত আৰু শ্ৰীমন্ত শঙ্কৰদেৱ স্বাস্থ্য বিজ্ঞান বিশ্ববিদ্যালয়ৰ অন্তৰ্ভুক্ত।^৩ মহাবিদ্যালয়খনে ২০২১-২২ শিক্ষাবৰ্ষৰ বাবে চিকিৎসা বিজ্ঞানৰ স্নাতক পাঠ্যক্ৰম ১০০ গৰাকী ছাত্ৰ-ছাত্ৰীৰ নামভৰ্তিৰ অনুমতি লাভ কৰিছে।^৪

অধ্যাপক (ড°) অনুপ কুমাৰ দাস চিকিৎসা মহাবিদ্যালয়খনৰ প্ৰথম গৰাকী অধ্যক্ষ আৰু মুখ্য পৰিদৰ্শক।

অৱস্থান আৰু পৰিবহণ

লখিমপুৰ চিকিৎসা মহাবিদ্যালয় অসমৰ লখিমপুৰ জিলাৰ সদৰ উত্তৰ লখিমপুৰৰ চাবতি অঞ্চলৰ চৌখাম গাঁৱত অৱস্থিত। ই লখিমপুৰ বাছ আস্থান আৰু লখিমপুৰ ৰে'ল ষ্টেচনৰ পৰা প্ৰায় ৩ কিঃমিঃ নিলগত অৱস্থিত। লগতে নিকটৱৰ্তী লীলাবাৰী বিমানবন্দৰৰ পৰা প্ৰায় ৪ কিঃমিঃ নিলগত অৱস্থিত।