বিজ্ঞান নগৰী, গুৱাহাটী

বিজ্ঞান নগৰী, গুৱাহাটী অসমৰ গুৱাহাটীৰ উপকণ্ঠ অঞ্চল টেপেচিয়া, সোণাপুৰত অৱস্থিত এটা বৃহৎ বিজ্ঞান শিক্ষা আৰু প্ৰদৰ্শনী কেন্দ্ৰ। ২০২৬ চনৰ ১০ মাৰ্চত উদ্বোধন কৰা এই কেন্দ্ৰটো উত্তৰ-পূব ভাৰতৰ অন্যতম বৃহৎ বিজ্ঞান কেন্দ্ৰ হিচাপে পৰিগণিত হয়।^১২

এই প্ৰকল্পটো অসম চৰকাৰ আৰু ভাৰত চৰকাৰৰ অধীনস্থ ৰাষ্ট্ৰীয় বিজ্ঞান সংগ্ৰহালয় পৰিষদ (NCSM)ৰ যৌথ উদ্যোগত গঢ়ি তোলা হৈছে।^২

ইতিহাস

উত্তৰ-পূব ভাৰতত বিজ্ঞান শিক্ষা আৰু বৈজ্ঞানিক মনোভাৱৰ প্ৰসাৰৰ উদ্দেশ্যে গুৱাহাটীত বিজ্ঞান নগৰ স্থাপনৰ পৰিকল্পনা কৰা হৈছিল। অসম চৰকাৰে ভাৰত চৰকাৰৰ সাংস্কৃতিক মন্ত্ৰালয়ৰ আৰ্থিক সহায়ত ৰাষ্ট্ৰীয় বিজ্ঞান সংগ্ৰহালয় পৰিষদৰ সহযোগত এই প্ৰকল্প আৰম্ভ কৰে।^৩

প্ৰকল্পটোৰ বাবে সোণাপুৰৰ ওচৰত প্ৰায় ২৫০ বিঘা (প্ৰায় ৮২ একৰ) মাটি নিৰ্ধাৰণ কৰা হৈছিল। উন্নত প্ৰযুক্তিৰ গেলেৰী, ডিজিটেল প্ৰদৰ্শনী আৰু অপ্ৰকৃত বাস্তৱতা (VR) ভিত্তিক সুবিধাসমূহৰ সৈতে নিৰ্মাণকাৰ্য পৰ্যায়ক্ৰমে সম্পন্ন কৰা হয়।^১

২০২৬ চনৰ ১০ মাৰ্চত অসমৰ মুখ্যমন্ত্ৰী হিমন্ত বিশ্ব শৰ্মাই এই বিজ্ঞান নগৰখন আনুষ্ঠানিকভাৱে উদ্বোধন কৰে।^১

বৈশিষ্ট্যসমূহ

প্ৰায় ২৫০ বিঘা মাটিত বিস্তৃত এই বিজ্ঞান নগৰীটো প্ৰায় ২৮৮–৩০০ কোটি টকাৰ ব্যয়ে নিৰ্মাণ কৰা হৈছে।^২

মূল বৈশিষ্ট্যসমূহৰ ভিতৰত আছে—

• ইউৰেকা গেলেৰী – প্ৰতিক্ৰিয়াশীল প্ৰদৰ্শনীৰ জৰিয়তে বৈজ্ঞানিক নীতিসমূহৰ ব্যাখ্যাৰ গেলেৰী
• মহাকাশ অডিচি – জ্যোতিৰ্বিজ্ঞান আৰু মহাকাশ বিজ্ঞানৰ গেলেৰী
• ডিজিটেল প্লেনেটেৰিয়াম – আধুনিক নিমজ্জিত জ্যোতিৰ্বিজ্ঞান শ্ব’
• ভাৰ্চুৱেল ৰিয়েলিটি (VR) আৰু অগমেণ্টেড ৰিয়েলিটি (AR) জ’ন
• ইমাৰ্চিভ ৩৬০ ডিগ্ৰী প্ৰজেকচন গেলেৰী
• বিজ্ঞান উদ্ভাৱন আৰু আৱিষ্কাৰ অঞ্চল (পৰিকল্পিত)
• বিজ্ঞান উদ্যান আৰু বাহিৰৰ প্ৰদৰ্শনী (উন্নয়নাধীন)^২

উদ্দেশ্য

এই বিজ্ঞান নগৰীৰ মূল উদ্দেশ্য হৈছে ছাত্ৰ-ছাত্ৰী আৰু সাধাৰণ জনতাৰ মাজত বিজ্ঞান আৰু প্ৰযুক্তিবিদ্যা জনপ্ৰিয় কৰা। ইয়াৰ জৰিয়তে—

• বৈজ্ঞানিক মনোভাৱ আৰু কৌতুহল বৃদ্ধি কৰা
• ইন্টাৰেক্টিভ পদ্ধতিৰে হাতে কামে শিক্ষণ প্ৰদান কৰা
• উত্তৰ-পূব ভাৰতত বিজ্ঞান শিক্ষাৰ উন্নয়ন সাধন
• গৱেষণা আৰু উদ্ভাৱনৰ প্ৰতি আগ্ৰহ বৃদ্ধি কৰা^৪

লগতে চাওক

• গুৱাহাটী তাৰকাগৃহ
• ৰাষ্ট্ৰীয় বিজ্ঞান কেন্দ্ৰ, গুৱাহাটী