বিজয় বাৰ্মা

বিজয় বাৰ্মা (Vijay Varma) এজন ভাৰতীয় অভিনেতা৷ তেওঁ প্ৰধানকৈ হিন্দী ছবি আৰু হিন্দী ৱেব চিৰিজত কাম কৰে। তেওঁ ভাৰতীয় ফিল্ম এণ্ড টেলিভিছন ইনষ্টিটিউটৰ পৰা স্নাতক ডিগ্ৰী লাভ কৰে৷ তাৰ পিছত অপৰাধ ড্ৰামা পিংক (২০১৬)ত অভিনয় কৰি তেওঁ স্বীকৃতি লাভ কৰে। ইয়াৰ পিছতে তেওঁ মিডলক্লাছ আব্বাই (২০১৭), গাল্লী বয় (২০১৯) আৰু বাঘী-৩ (২০২০)ত সহযোগী চৰিত্ৰত অভিনয় কৰে। মিডলক্লাছ আব্বাইৰ জৰিয়তে তেওঁ শ্ৰেষ্ঠ সহযোগী অভিনেতাৰ ফিল্মফেয়াৰ বঁটাৰ মনোনয়ন লাভ কৰে।

ইয়াৰ পিছত বাৰ্মাই কেইবাটাও ষ্ট্ৰীমিং প্ৰজেক্টত অভিনয় কৰে, যাৰ ভিতৰত মিৰ্জাপুৰ (২০২০–বৰ্তমান), ডাৰ্লিংছ (২০২২), দহাড় (২০২৩), কালকুট (২০২৩), জানে জান (২০২৩), আৰু আইচি ৮১৪: দ্য কান্দাহাৰ হাইজেক (২০২৪)। দহাড়ত আগবঢ়োৱা অভিনয়ৰ বাবে তেওঁ ড্ৰামা চিৰিজ (সমালোচক)ৰ শ্ৰেষ্ঠ অভিনেতাৰ ফিল্মফেয়াৰ অ’টিটি বঁটা লাভ কৰে।

প্ৰাৰম্ভিক জীৱন আৰু শিক্ষা

ভাৰতৰ হায়দৰাবাদত বসতি স্থাপন কৰা এটা মাৰোৱাৰী ব্যৱসায়ী পৰিয়ালত ১৯৮৬ চনৰ ২৯ মাৰ্চত বাৰ্মাই জন্মগ্ৰহণ কৰিছিল। ^১২তেওঁ ছেইণ্ট থেৰেছা হাইস্কুলত পঢ়িছিল আৰু পিছলৈ এফ টি আই আইত অধ্যয়ন কৰিছিল।^৩

কৰ্মজীৱন

বাৰ্মাই নিজৰ গৃহ চহৰ হায়দৰাবাদত ভ্ৰাম্যমাণ জগতত অভিনয় জীৱন আৰম্ভ কৰিছিল। আনুষ্ঠানিক প্ৰশিক্ষণ লাভৰ আকাংক্ষাৰে তেওঁ পুনেস্থিত ভাৰতীয় ফিল্ম এণ্ড টেলিভিছন ইনষ্টিটিউট (এফ টি আই আই)ত দুবছৰ পঢ়িছিল। স্নাতক হোৱাৰ পিছত বাৰ্মাই চলচ্চিত্ৰ আৰু টেলিভিছনত কেৰিয়াৰ গঢ়িবলৈ মুম্বাইলৈ স্থানান্তৰিত হয়।^৪

২০০৮–২০১৫: আৰম্ভণিৰ কাম আৰু চলচ্চিত্ৰত আত্মপ্ৰকাশ

বাৰ্মাৰ প্ৰথম পৰ্দাৰ উপস্থিতি আছিল চুটি ছবি শ্ব'ৰ (২০০৮)ৰ জৰিয়তে, যিখনে নিউয়ৰ্কৰ এম আই এ চি মহোৎসৱৰ শ্ৰেষ্ঠ চুটি ছবিকে ধৰি বিভিন্ন চলচ্চিত্ৰ মহোৎসৱত প্ৰশংসা লাভ কৰিছিল।^৫ ২০১০ চনত ৱাইআৰএফ টেলি-ধাৰাবাহিক ৰিষ্টা ডট কমত অভিনয় কৰি তেওঁ টেলিভিছনত আত্মপ্ৰকাশ কৰে।^৬ তেওঁৰ বৈশিষ্ট্যপূৰ্ণ ছবিত আত্মপ্ৰকাশ কৰে ঐতিহাসিক ড্ৰামা চিট্টাগং (২০১২)ৰ জৰিয়তে, য'ত তেওঁ বিপ্লৱী সুবোধ "ঝুংকু" ৰয়ৰ চৰিত্ৰত অভিনয় কৰে।^৭ ইয়াৰ পিছত তেওঁ ৰংগ্ৰেজ (২০১৩) আৰু গেং অৱ গোষ্টছ (২০১৪) আদি ছবিত সহায়ক ভূমিকা গ্ৰহণ কৰে।^৮

২০১৬–২০১৮: পিংকৰ সৈতে ব্ৰেকথ্ৰু আৰু সহায়ক ভূমিকা

অনিৰুদ্ধ ৰায় চৌধুৰীৰ সামাজিক থ্ৰিলাৰ পিংক (২০১৬)ৰ জৰিয়তে বাৰ্মাই প্ৰথমটো গুৰুত্বপূৰ্ণ স্বীকৃতি লাভ কৰে। তেওঁৰ দ্বাৰা ৰূপায়িত অংকিত মালহোত্ৰাৰ চিত্ৰণ সমালোচকসকলে বহুলভাৱে লক্ষ্য কৰিছিল আৰু ছবিখনৰ সমালোচক আৰু বাণিজ্যিক সফলতাত অৰিহণা যোগাইছিল৷^৯ ইয়াৰ পিছত তেওঁ নিঅ'-নোৱাৰ থ্ৰিলাৰ মনছুন শ্বুটআউট (২০১৭)ত এজন সংঘাতপূৰ্ণ পুলিচৰ চৰিত্ৰত অভিনয় কৰে। ২০১৩ চনৰ কাঁন চলচ্চিত্ৰ মহোৎসৱত এই ছবিখনৰ প্ৰিমিয়াৰ হৈছিল যদিও ২০১৭ চনতহে ভাৰতৰ থিয়েটাৰত মুক্তি দিয়া হয়।^১০ সেই বছৰতে বাৰ্মাই তেলেগু চিনেমাত মিডলক্লাছ আব্বাই (MCA) ছবিত নানীৰ বিপৰীতে শিৱ শক্তি চৰিত্ৰত অভিনয় কৰে, যিখন ছবিয়ে ব্যৱসায়িকভাৱে সফলতা লাভ কৰা বুলি প্ৰমাণিত হয়।^১১ তেওঁ ৰাগ দেশ (২০১৭)^১২ আৰু মাণ্টো (২০১৮) ছবিতো অভিনয় কৰিছিল।^১৩

২০১৯–বৰ্তমান: বহল প্ৰশংসা আৰু প্ৰাধান্যৰ উত্থান

জয়া আখতাৰৰ মিউজিকেল ছবি গাল্লী বয় (২০১৯)ৰ জৰিয়তে বাৰ্মাৰ কেৰিয়াৰে অধিক গতি লাভ কৰে। বন্ধু আৰু নৈতিকভাৱে অস্পষ্ট ব্যক্তিত্বৰ জটিল চৰিত্ৰ ম'ইন আৰিফৰ চৰিত্ৰত তেওঁৰ অভিনয়ে সমালোচকৰ ব্যাপক প্ৰশংসা লাভ কৰে আৰু শ্ৰেষ্ঠ সহযোগী অভিনেতাৰ ফিল্মফেয়াৰ বঁটাৰ বাবে মনোনয়ন লাভ কৰে।^১৪ তেওঁ ছুপাৰ ৩০ (২০১৯)তো বিশেষ চৰিত্ৰত অভিনয় কৰিছিল।^১৫

২০২০ চনত বাৰ্মাই ছবি আৰু ষ্ট্ৰীমিং প্লেটফৰ্মত নিজৰ উপস্থিতি সম্প্ৰসাৰণ কৰে। নেটফ্লিক্সৰ হ'ৰ'ৰ এন্থালজী গোষ্ট ষ্ট'ৰীজ^১৬ৰ জোয়া আখতাৰৰ কাহিনীটোত তেওঁ অংশ লৈছিল৷ ইয়াৰ পিছত তেওঁ একচন ছবি বাঘী ৩ত সহযোগী ভূমিকা পালন কৰিছিল।^১৭ তেওঁ জিফাইভৰ ছবি বামফাড় আৰু য়াৰাত এণ্টাগনিষ্টৰ ভূমিকা পালন কৰিছিল৷^{১৮ ১৯} তেওঁৰ ষ্ট্ৰীমিং কেৰিয়াৰৰ এক উল্লেখযোগ্য টাৰ্ণিং পইণ্ট আছিল জনপ্ৰিয় এমাজন প্ৰাইম ভিডিঅ'ত মুক্তি লভা ক্ৰাইম ছিৰিজ মিৰ্জাপুৰ৷ যাৰ দ্বিতীয় ছিজনত তেওঁ অভিনয় কৰিছিল৷^২০ এই সময়ছোৱাত তেওঁ বিবিচি ৱানৰ এ চুইটেবল বয়ৰ অভিযোজনতো বিশ্ববিদ্যালয়ৰ প্ৰবক্তা ৰছিদৰ চৰিত্ৰত অভিনয় কৰিছিল,^২১ আৰু নেটফ্লিক্সৰ অপৰাধ নাটক 'ছি'ত ছাছ্যা নামৰ ড্ৰাগ-ব্যৱসায়ীৰ চৰিত্ৰত পুনৰাবৃত্তিমূলক ভূমিকা পালন কৰিছিল।^২২

ব্যক্তিগত জীৱন

বৰ্মাৰ ফেশ্বনৰ প্ৰতি তীব্ৰ আগ্ৰহ আছে আৰু তেওঁ ডেনিয়েল ডে-লুইছ আৰু জ্যাকি চানৰ দৰে অভিনেতাৰ পৰা শৈলীৰ অনুপ্ৰেৰণা লাভ কৰে। ভৌগ ইণ্ডিয়াৰ সৈতে হোৱা এক সাক্ষাৎকাৰত তেওঁ ডে-লুইছৰ সাজ-পাৰ সংগ্ৰহক ব্যক্তিগত কাহিনী কোৱাৰ এক মাধ্যম হিচাপে প্ৰশংসা কৰে আৰু চানৰ মনোক্ৰম সাজ-পাৰক প্ৰভাৱ হিচাপে উল্লেখ কৰে।^২৩ তেওঁৰ পৰীক্ষামূলক ফেশ্বন শৈলী আৰু বহুমুখিতাৰ বাবে তেওঁ প্ৰশংসিত হৈছে।^২৪ তেওঁ ভ্ৰমণ কৰি আৰু বিভিন্ন খাদ্যৰ সোৱাদ লৈ ভাল পায়। প্ৰায়েই তেওঁ হায়দৰাবাদ চহৰৰ মোগলাই আৰু দক্ষিণ ভাৰতীয় খাদ্যৰ সংমিশ্ৰণৰ লগতে মুম্বাই আৰু শ্বিলঙৰ সাংস্কৃতিক আকৰ্ষণৰ বিষয়ে আলোচনা কৰে।^২৫ সোণাক্ষী সিনহাৰ সৈতে আঞ্চলিক খাদ্যৰ ওপৰত কৰা এক আলোচনাত খাদ্য সংস্কৃতিৰ সৈতে তেওঁৰ জড়িত হোৱাৰ কথাটো প্ৰকাশ পাইছিল।^২৬ ২০২৫ চনৰ এপ্ৰিল মাহত বৰ্মাই মুম্বাইৰ জুহুত এটা নতুন সাগৰমুখী এপাৰ্টমেণ্টলৈ স্থানান্তৰিত হয়, যিটো তেওঁৰ জীৱনৰ এক ব্যক্তিগত মাইলৰ খুঁটি।^২৭২৮ একাধিক সূত্ৰৰ মতে, এই পদক্ষেপে চলচ্চিত্ৰ উদ্যোগত তেওঁৰ ক্ৰমাগত সফলতাৰ প্ৰতিফলন ঘটাইছে।^২৮

মাধ্যমৰ প্ৰতিচ্ছবি আৰু কলাত্মক শৈলী

"একমাত্ৰ চৰ্ত হ'ল চিত্ৰনাট্য, চৰিত্ৰটো আৰু তাৰ পিছত পৰিচালক। কেইবছৰমান কাম কৰাৰ পিছত মই আৰু এটা চৰ্ত যোগ কৰিলোঁ— সেয়া হ'ল 'মই একে ধৰণৰ কামৰ পুনৰাবৃত্তি নকৰোঁ'। মই সকলোবোৰ মিলাই-জুলিলাই কৰিবলৈ চেষ্টা কৰিছোঁ। মই সুখী যে মোৰ এটা মাধ্যম আৰু দৰ্শক আছে। যেতিয়ালৈকে মোৰ দৰ্শক থাকিব, মই ভাল কাম কৰি যাব বিচাৰিম।"
— চলচ্চিত্ৰ অভিনয়ৰ প্ৰতি তেওঁৰ দৃষ্টিভংগী ব্যাখ্যা কৰি বৰ্মা^২৯

বৰ্মা তেওঁৰ সমালোচকৰ দ্বাৰা প্ৰশংসিত চৰিত্ৰসমূহৰ বাবে পৰিচিত। তেওঁ পৰ্দাত কেইবাবাৰো নেতিবাচক চৰিত্ৰত সফলতাৰে অভিনয় কৰিছে,^৩০ তথাপিও তেওঁ নিজৰ বহুমুখিতাৰ বাবে বিশেষভাৱে জনাজাত। কৰণ জোহৰে এই সন্দৰ্ভত কৈছে, "বিজয় বৰ্মাৰ বহুমুখিতাই তেওঁক পৃথিৱীৰ যিকোনো ঠাইলৈ লৈ যাব পাৰে।"^৩১

ফিল্মফেয়াৰৰ জিতেশ পিল্লাইয়ে লক্ষ্য কৰিছে যে, "বিজয় এজন মেথড এক্টৰ যিয়ে বাণিজ্যিক চিনেমাৰ সৈতেও নিৰৱচ্ছিন্নভাৱে খাপ খাই পৰে।" তেওঁ অভিনেতাগৰাকীৰ হাস্যৰসৰো প্ৰশংসা কৰে।^৩২ ফিল্ম কম্পেনিয়নৰ তৎসম মুখোপাধ্যায়ে উল্লেখ কৰিছে যে, "তেওঁ যিদৰে চৰিত্ৰসমূহৰ অন্ধকাৰ আৰু ঘৃণাৰ দিশবোৰ ফুটাই তোলে, তাত কিবা এটা আকৰ্ষণীয় গুণ আছে।"^৩৩ আউটলুক ইণ্ডিয়াৰ প্ৰতীক সুৰে অভিনেতাগৰাকীৰ "বহুমুখিতা" আৰু "প্ৰভাৱশালী অভিনয়"ৰ শলাগ লৈছে।^৩৪ তেওঁৰ নিখুঁত অভিনয়ৰ প্ৰশংসা কৰি ইণ্ডিয়া টিভি নিউজৰ অক্ষত সুন্দ্ৰাণীয়ে যোগ কৰে যে, "বৰ্মাৰ নিজৰ শিল্পৰ প্ৰতি থকা আবেগ আৰু আৱেগ প্ৰকাশৰ অসাধাৰণ ক্ষমতাই তেওঁক চলচ্চিত্ৰ জগতৰ এজন অন্যতম সফল অভিনেতা হিচাপে প্ৰতিষ্ঠা কৰিছে।"^৩৫ বাংগালোৰ মিৰৰ-এ তেওঁক বলিউডৰ "আটাইতকৈ ৰহস্যময় আৰু দক্ষ অভিনেতা"ৰ এজন বুলি অভিহিত কৰিছে।^৩৬ গলী বয় ছবিত তেওঁ কৰা অভিনয়ক ফিল্ম কম্পেনিয়নৰ দ্বাৰা "দশকৰ ১০০টা শ্ৰেষ্ঠ অভিনয়"ৰ ভিতৰত অন্যতম হিচাপে গণ্য কৰা হয়।^৩৭

চলচ্চিত্ৰপঞ্জী

চলচ্চিত্ৰ

• অন্যথা উল্লেখ নকৰিলে সকলোবোৰ চলচ্চিত্ৰ হিন্দী ভাষাৰ।

বঁটা আৰু মনোনয়ন