বসুন্ধৰা কোমকলী

বসুন্ধৰা কোমকলী ( Vasundhara Komkali; ১৯৩১–২০১৫) এগৰাকী ভাৰতীয় শাস্ত্ৰীয় সংগীতজ্ঞ আৰু গোৱালিয়ৰ ঘৰানাৰ অন্যতম প্ৰতিপাদক আছিল, যিটো হিন্দুস্তানী সংগীতৰ এটা পুৰণি খয়াল পৰম্পৰা। তেওঁ জনপ্ৰিয়ভাৱে বসুন্ধৰা তাঈ নামেৰে পৰিচিত। তেওঁ প্ৰখ্যাত সংগীতজ্ঞ কুমাৰ গন্ধৰ্বৰ পত্নী।^১ তেওঁ ২০০৯ চনৰ সংগীত নাটক অকাডেমী বঁটা লাভ কৰে।^২ ভাৰতীয় শাস্ত্ৰীয় সংগীতলৈ আগবঢ়োৱা অৱদানৰ বাবে ২০০৬ ভাৰত চৰকাৰে চতুৰ্থ সৰ্বোচ্চ অসামৰিক সন্মান পদ্মশ্ৰী প্ৰদান কৰে।^৩

জীৱনী

১৯৩১ চনৰ ২৩ মে'ত ভাৰতৰ ঝাৰখণ্ড ৰাজ্যৰ সৰ্ববৃহৎ চহৰ জামছেদপুৰৰ এটা সংগীতপ্ৰেমী পৰিয়ালত বসুন্ধৰা কোমকলীৰ জন্ম হৈছিল। তেওঁৰ আৰম্ভণিৰ বছৰবোৰ কলকাতাত পাৰ হয়, য'ত তেওঁ ১২ বছৰ বয়সত সৰ্বভাৰতীয় সংগীত সন্মিলনত কুমাৰ গন্ধৰ্বক লগ পাইছিল আৰু বিখ্যাত সংগীতজ্ঞজনৰ অধীনত শাস্ত্ৰীয় সংগীত শিকিবলৈ তেওঁৰ ইচ্ছাৰ বিষয়ে জনাইছিল।^৪ গন্ধৰ্ৱই তেওঁক মুম্বাইলৈ আহিবলৈ ক'লে কিন্তু ইতিমধ্যে দ্বিতীয় বিশ্বযুদ্ধ আৰম্ভ হৈছিল, যাৰ বাবে তেওঁ মুম্বাইলৈ যাব নোৱাৰিলে। তেওঁ কলকাতাতে থাকি সংগীত শিকি অল ইণ্ডিয়া ৰেডিঅ’ৰ কলকাতা কেন্দ্ৰত সংগীত পৰিবেশন কৰিবলৈ আৰম্ভ কৰে। যুদ্ধৰ পিছত ১৯৪৬ চনত মুম্বাইলৈ গুচি যায় আৰু বিশিষ্ট কণ্ঠশিল্পী আৰু সংগীত বিজ্ঞানী বি আৰ দেওধৰৰ অধীনত প্ৰশিক্ষণ আৰম্ভ কৰে, কাৰণ সেই সময়ছোৱাত গন্ধৰ্বই তেওঁক শিকাবলৈ সময় নাপালে।^৫ পিছলৈ তেওঁ প্ৰশিক্ষণৰ বাবে গন্ধৰ্বৰ ওচৰলৈ যায় আৰু ১৯৬২ চনত প্ৰখ্যাত সংগীতজ্ঞজনৰ সৈতে বিবাহপাশত আবদ্ধ হয়।

বসুন্ধৰাই পৰৱৰ্তী ত্ৰিশ বছৰ কুমাৰ গন্ধৰ্বৰ সৈতে কণ্ঠ সংগীত পৰিবেশন কৰিছিল।^৬ ১৯৯২ চনত কুমাৰ গন্ধৰ্ৱৰ মৃত্যুৰ পিছতহে তেওঁ একক পৰিবেশন কৰিবলৈ লয়।^৭ ১৯৯৮ চনত হিন্দুস্তানী কণ্ঠৰ বাবে সংগীত নাটক অকাডেমী বঁটা লাভ কৰে। ইয়াৰ ছবছৰৰ পাছত ভাৰত চৰকাৰে ২০০৬ চনত পদ্মশ্ৰীৰে তেওঁক পুনৰ সম্বৰ্ধনা জনায়।

বাহ্যিক সংযোগ

• (18 July 2011). Kumar Gandharva & Vidushi Vasundhara Komkali - Nirguni Bhajan - Nirbhay nirgun gun re gaunga. ইউটিউব video. Uday Mohole
• (13 November 2011). Vasundhara Komkali and daughter Kalapini Komkali's Saha Gaan. ইউটিউব video. Ecothingy's Channel