নিৰ্জন চৈকতে

নিৰ্জন চৈকতে ( The Desolate Beach ) তপন সিনহাৰ পৰিচালনাত নিৰ্মিত এখন বাংলা ছবি।^১ ১৯৬৩ চনত মুক্তি পোৱা এই ছবিখন কালকূট ছদ্মনামৰে সাহিত্য ৰচনা কৰা বিশিষ্ট বাংলা লেখক সমৰেশ বসুৰ একে নামৰ উপন্যাসৰ অভিযোজন।^২৩৪ ছবিখনক তৃতীয় ভাৰতৰ আন্তঃৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ পূৰ্ণদৈৰ্ঘ্য ছবিৰ বাবে চিলভাৰ পিক’কেৰে সন্মানিত কৰা হয়।^৫

কাহিনীৰ সাৰাংশ

নায়কে নিজৰ দৈনন্দিন মহানগৰীয় জীৱনৰ পৰা কিছুদিনৰ বাবে মুক্ত হ’বলৈ ৰেলযোগে পুৰীলৈ গৈ আছে। যাত্ৰাৰ কালছোৱাত পুৰী দৰ্শন কৰিবলৈ ৪ জনীয়া বঙালী বিধৱাৰ দল এটাৰ সৈতে চিনাকি হয়, যাৰ লগত তেওঁলোকৰ ভতিজীও আছিল। এই মহিলাসকলে আচলতে প্ৰেমিকৰ সৈতে মাত্ৰ এৰাএৰি হোৱা ভতিজীক শান্ত কৰিবলৈ ওলাইছিল। বাকী কাহিনীটো এই মানুহবোৰ আৰু নায়কৰ লগত তেওঁলোকৰ আকৰ্ষণ আৰু সম্পৰ্কক কেন্দ্ৰ কৰি ঘূৰি আছে। নায়কে সেইবোৰত আমোদ পায় আৰু নিজৰ ফালৰ পৰা ছোৱালীজনীক শান্ত কৰিবলৈ চেষ্টা কৰে। ছবিখনত বিধৱাৰ বাবে সামাজিক নিষেধাজ্ঞা দেখুৱাবলৈ চেষ্টা কৰা হৈছে।

বঁটা

• এই ছবিখনৰ বিধৱাৰ চৰিত্ৰ ৰূপায়ন কৰা মুখ্য চৰিত্ৰৰ ৪ গৰাকী মহিলাই ১৯৬৫ চনৰ ৩য় ভাৰতৰ আন্তঃৰাষ্ট্ৰীয় চলচ্চিত্ৰ মহোৎসৱত যুটীয়াভাবে শ্ৰেষ্ঠ অভিনেতা বঁটা (মহিলা) লাভ কৰিছিল।^৪
• অডিয়েঞ্চ এৱাৰ্ড: ছিদনী চলচ্চিত্ৰ মহোৎসৱ
• চিলভাৰ পিকক - শ্ৰেষ্ঠ পূৰ্ণদৈৰ্ঘ্য ছবি: ৩য় ভাৰতৰ আন্তঃৰাষ্ট্ৰীয় চলচ্চিত্ৰ মহোৎসৱত।^৬