জয়দীপ আহলাৱত

জয়দীপ আহলাৱত (Jaideep Ahlawat; জন্ম: ৮ ফেব্ৰুৱাৰী ১৯৮০) হিন্দী চলচ্চিত্ৰ আৰু ৱেব ধাৰাবাহিক (ৱেব চিৰিজ) জগতৰ এজন ভাৰতীয় অভিনেতা। তেওঁ তিনিটা ফিল্মফেয়াৰ অ’টিটি বঁটা লাভ কৰাৰ লগতে দুটা ফিল্মফেয়াৰ বঁটাৰ বাবে মনোনয়ন অৰ্জন কৰিছে।

ভাৰতীয় চলচ্চিত্ৰ আৰু টেলিভিছন প্ৰতিষ্ঠানৰপৰা স্নাতক ডিগ্ৰী লাভ কৰাৰ পাছত তেওঁ অপৰাধমূলক ছবি গেংছ অৱ ৱাছেপুৰ (২০১২)ত অভিনয় কৰে। ইয়াৰ পূৰ্বে তেওঁ কেইবাখনো ছবিত সৰু চৰিত্ৰত অভিনয় কৰিছিল^১। পৰৱৰ্তী সময়ত তেওঁ কমাণ্ডো: এ ৱান মেন আৰ্মি (২০১৩), গব্বৰ ইজ বেক (২০১৫), আৰু বিশ্বৰূপম দ্বিতীয় (২০১৮)কে ধৰি কেইবাখনো ছবিত সহযোগী চৰিত্ৰত অভিনয় কৰে।^২৩

মূলসুঁতিৰ ছবি ৰইছ (২০১৭) আৰু ৰাজী (২০১৮)ত অভিনয় কৰি আহলাৱাতে বহুল স্বীকৃতি লাভ কৰে।^৪

২০২০ চনত ষ্ট্ৰীমিং ধাৰাবাহিক পাতাল লোকত আৰক্ষীৰ চৰিত্ৰত অভিনয় কৰি ড্ৰামা ছিৰিজৰ শ্ৰেষ্ঠ অভিনেতাৰ ফিল্মফেয়াৰ অ’টিটি বঁটা লাভ কৰি তেওঁ প্ৰশংসা অৰ্জন কৰে। এন একচন হিৰো (২০২২) ছবিখনৰ বাবে তেওঁ ফিল্মফেয়াৰ বঁটাত শ্ৰেষ্ঠ সহযোগী অভিনেতাৰ বাবে মনোনয়ন লাভ কৰে, আৰু তাৰ পিছত ২০২৩ চনত জানে জা আৰু থ্ৰী অৱ আছ ছবিত অভিনয় কৰে। জানে জাৰ বাবে তেওঁ ৱেব অৰিজিনেল ছবিৰ শ্ৰেষ্ঠ অভিনেতাৰ শিতানত ফিল্মফেয়াৰ অ'টিটি বঁটা (সমালোচক) আৰু ২০২৪ চনৰ মহাৰাজ ছবিৰ বাবে ৱেব অৰিজিনেল ছবিৰ শ্ৰেষ্ঠ সহযোগী অভিনেতাৰ শিতানত ফিল্মফেয়াৰ অ'টিটি বঁটা লাভ কৰে।

প্ৰাৰম্ভিক জীৱন আৰু শিক্ষা

হাৰিয়ানাৰ ৰোহটক জিলাৰ মেহাম চৌবিচি তহচিলৰ খাৰকাৰাত জয়দীপ আহলাৱতৰ জন্ম হৈছিল। তেওঁৰ জন্ম এটা হিন্দু জাট পৰিয়ালত হৈছিল।^৫৬ খাৰকাৰাৰ চৰকাৰী হাইস্কুলৰপৰা তেওঁ হাইস্কুলৰ প্ৰমাণ-পত্ৰ লাভ কৰে। তেওঁ ৰোহটকৰ জাট কলেজত পঢ়িছিল। স্নাতক ডিগ্ৰী লাভ কৰাৰ পাছত ২০০৫ চনত মহৰ্ষি দয়ানন্দ বিশ্ববিদ্যালয়ৰপৰা ইংৰাজী বিষয়ত তেওঁ স্নাতকোত্তৰ ডিগ্ৰী লাভ কৰে। ২০০৮ চনত মহাৰাষ্ট্ৰৰ পুনেৰ ভাৰতীয় ফিল্ম এণ্ড টেলিভিছন ইনষ্টিটিউট (এফটিআইআই)ৰপৰা অভিনয়ৰ স্নাতক ডিগ্ৰী লাভ কৰে, যিটো বেটছত ৰাজকুমাৰ ৰাও, বিজয় বাৰ্মা আৰু ছানী হিন্দুজা তেওঁৰ সতীৰ্থ আছিল।^৭

কেৰিয়াৰ

প্ৰাৰম্ভিক সংগ্ৰাম আৰু কৰ্ম (২০০৮-২০১১)

জয়দীপ আহলাৱতে কম বয়সতে থিয়েটাৰত কাম কৰিবলৈ আৰম্ভ কৰিছিল যদিও তেওঁ পোনপ্ৰথমতে ভাৰতীয় সেনাৰহে বিষয়া হ’ব বিচাৰিছিল। কিন্তু একাধিকবাৰ এছ এছ বিৰ সাক্ষাৎকাৰত ঊত্তীৰ্ণ হ'ব নোৱাৰাৰ বাবে তেওঁ অভিনয়ৰ ক্ষেত্ৰত প্ৰৱেশ কৰে। তেওঁ পঞ্জাৱ আৰু হাৰিয়ানাত মঞ্চানুষ্ঠান কৰিছিল। ^৮ স্নাতক হোৱাৰ পিছতহে তেওঁ অভিনয়ক গুৰুত্বসহকাৰে ল’বলৈ আৰম্ভ কৰিছিল। তেওঁ জটিল পথেৰে চলচ্চিত্ৰ জগতখনত প্ৰৱেশ কৰিছিল। তেওঁৰ কোনো গডফাদাৰ নাছিল। ^৯ ২০০৮ চনত শিক্ষা সমাপ্ত কৰি অভিনেতা হোৱাৰ সপোন পূৰণৰ বাবে তেওঁ মুম্বাইলৈ ৰাওনা হয়। আৰু এদিন তেওঁ বলীউডত নিজৰ কেৰিয়াৰ আৰম্ভ কৰিছিল।

সফলতা আৰু স্বীকৃতি (২০১২–২০১৯)

প্ৰিয়দৰ্শনৰ খট্টা মিঠা (২০১০) ছবিখনত নেতিবাচক চৰিত্ৰৰ চিত্ৰণত তেওঁক প্ৰথম দৃষ্টিগোচৰ কৰা হৈছিল। সেই বছৰতে তেওঁ অজয় দেৱগনৰ সৈতে আক্ৰোশ ছবিত অভিনয় কৰে।^১০ ইয়াৰ পিছত তেওঁ অনুৰাগ কাশ্যপৰ গেংছ অৱ ৱাছেপুৰ (২০১২) আৰু কমল হাছানৰ বিশ্বৰূপম (২০১২)কে ধৰি আৰু অধিক ছবিত কাম কৰে।^১১১২ গেংছ অৱ ৱাছেপুৰক জয়দীপৰ জীৱনৰ এটা টাৰ্নিং পইণ্ট হিচাপে গণ্য কৰা হয়, কিয়নো ইয়াৰ সফলতাই তেওঁক ভাৰতত পৰ্যাপ্ত স্বীকৃতি লাভ কৰাত সহায় কৰিছিল। ইয়াৰ পিছত জয়দীপে হাছানৰ সৈতে এখন তামিল চোৰাংচোৱা থ্ৰিলাৰ ছবি বিশ্বৰূপমত অভিনয় কৰে, যিখন ছবি ২০১৩ চনত যথেষ্ট সফলতা লাভ কৰে। অভিনয়ৰ দক্ষতা আৰু জনপ্ৰিয়তাৰ ওপৰত আপ্লুত হৈ হাছানে তেওঁক ২০১৬ চনত মুক্তি পোৱা ছিকুৱেল বিশ্বৰূপম-২ তো কাম কৰাৰ সুযোগ দিয়ে।

প্ৰতিষ্ঠালাভ (২০২০–বৰ্তমানলৈকে)

ৱেব চিৰিজ বাৰ্ড অৱ ব্লাড ^১৩ত জয়দীপক পৰৱৰ্তী সময়ত দেখা গৈছিল আৰু ২০২০ চনৰ অক্টোবৰ মাহত মুক্তি পোৱা বলীউডৰ ছবি খালি পিলিত তেওঁ নেতিবাচক চৰিত্ৰত অভিনয় কৰিছিল।^১৪ ৱেব ধাৰাবাহিক পাতাল’লোঁকত তেওঁ হাতীৰাম চৌধাৰীৰ চৰিত্ৰত অভিনয় কৰি ব্যাপক প্ৰশংসা লাভ কৰে।^১৫১৬ চিৰিজটোৱে পৰিচালনা, অভিনয় আৰু স্পৰ্শকাতৰ বিষয়সমূহ সঠিকভাৱে চম্ভালি লোৱাৰ বাবে সৰ্বজনীনভাৱে প্ৰশংসা কৰা হৈছিল।

২০২২ চনত তেওঁ একাধিক ধাৰাবাহিকত অভিনয় কৰিছে। ব্লাডি ব্ৰাদাৰ্ছ (২০২২) আৰু দ্য ব্ৰকেন নিউজ (২০২২)ৰ দৰে ৱেব চিৰিজত তেওঁ আগবঢ়োৱা অভিনয়ক সমালোচকসকলে শলাগ লৈছে।^১৭

ইয়াৰ পিছত আহলাৱাটক ২০২৫ চনত মুক্তি পোৱা নেটফ্লিক্স ছবি জুৱেল থিফত দেখা গৈছিল। তেওঁৰ বিপৰীতে আছিল ছইফ আলী খান^১৮ ছবিখন নেতিবাচক সমালোচনা লাভ কৰিছিল।

২০২৫ চনত নৱেম্বৰ মাহত মুক্তি লাভ কৰা 'ফেমিলি মেন চিজন-৩'ত জয়দীপ আহলাৱতে এটা গুৰুত্বপূৰ্ণ ঋণাত্মক চৰিত্ৰত অভিনয় কৰে৷ 'ৰুকমা' নামৰ এজন ড্ৰাগ-ব্যৱসায়ীৰ চৰিত্ৰত আগবঢ়োৱা তেওঁ অভিনয় আৰু তেওঁৰ অভিব্যক্তি সৰ্বত্ৰে চৰ্চিত হয়৷ ^১৯২০

বঁটা আৰু স্বীকৃতি