চেলিনা জেটলী

চেলিনা জেটলী^১ (জন্ম: ২৪ নৱেম্বৰ ১৯৮১)^২৩ এগৰাকী ভাৰতীয় সৌন্দৰ্য প্ৰতিযোগিতাৰ খিতাপ ধাৰী আৰু প্ৰাক্তন অভিনেত্ৰী। তেওঁ মূলতঃ হিন্দী ভাষা চলচ্চিত্ৰত কাম কৰিছিল। তেওঁ ২০০১ চনত ফেমিনা মিছ ইণ্ডিয়া খিতাপ জয় কৰিছিল আৰু ২০০১ চনৰ মিছ ইউনিভাৰ্চ প্ৰতিযোগিতাত চতুৰ্থ ৰানাৰ্ছ আপ হৈছিল।^৪ তেওঁ ২০০৩ চনৰ থ্ৰিলাৰ ছবি জানচিনৰ জৰিয়তে অভিনয় জীৱনৰ পাতনি মেলিছিল।^৫ তেওঁৰ উল্লেখযোগ্য চৰিত্ৰসমূহৰ ভিতৰত আছে নো এণ্ট্ৰী (২০০৫), আপনা চপনা মানি মানি (২০০৬), গোলমাল ৰিটাৰ্ণছ (২০০৮), আৰু থ্যাংক ইউ (২০১১), যাৰ ভিতৰত প্ৰথম তিনিখন ছবি বক্স অফিচত সফল আছিল।

প্ৰাৰম্ভিক জীৱন

জেটলীৰ জন্ম ভাৰতৰ হিমাচল প্ৰদেশৰ চিমলাত হৈছিল।^৬৭ তেওঁৰ পিতৃ কৰ্ণেল বিক্ৰম কুমাৰ জেটলী এজন পঞ্জাবী হিন্দু আছিল আৰু মাতৃ মিতা ফ্ৰাংকলি এ এগৰাকী খ্ৰীষ্টান ধৰ্মাৱলম্বী মহিলা আছিল, যি মনোবিজ্ঞান আৰু সাহিত্যৰ অধ্যাপিকা আছিল।^৮ তেওঁৰ ককাক (মাতৃৰফালৰ) কৰ্ণেল এৰিক ফ্ৰাংকলিচে ভাৰতীয় সেনাবাহিনীৰ ৰাজপুতানা ৰাইফলছত সেৱা আগবঢ়াইছিল।^৯১০ তেওঁৰ আইতাক (মাতৃৰফালৰ) উষা এটা পঞ্জাবী খ্ৰীষ্টান পৰিয়ালৰ আছিল আৰু তেওঁৰ আফগান হিন্দু আইতাকৰ জৰিয়তে তেওঁ এগৰাকী দ্বিতীয় প্ৰজন্মৰ আফগান-ভাৰতীয় আছিল।^{৬১১১২১৩}

ডাঙৰ হৈ তেওঁ নিজৰ পিতৃৰ দৰেই পাইলট অথবা চিকিৎসক হিচাপে সেনাবাহিনীত যোগদান কৰিব বিচাৰিছিল।^১৪ তেওঁৰ শৈশৱৰ বেছিভাগ সময় ভাৰতৰ বিভিন্ন ঠাইত অতিবাহিত হৈছিল কিয়নো তেওঁৰ পিতৃৰ ভাৰতৰ বিভিন্ন চহৰ আৰু নগৰলৈ বদলি হৈছিল—যাৰ ফলত তেওঁ এক ডজনতকৈও অধিক বিভিন্ন স্কুলত পঢ়িবলগীয়া হৈছিল।^১৪ পৰিয়ালটো বিভিন্ন চহৰত থকাৰ সময়ত তেওঁ লক্ষ্ণৌৰ চিটি মণ্টেছৰী স্কুল (ষ্টেচন ৰোড) আৰু ৰাণীকেন্তৰ কেন’ছা কনভেণ্ট স্কুলত শিক্ষা গ্ৰহণ কৰিছিল। ওড়িশাৰ ব্ৰহ্মপুৰত থকাৰ সময়ত তেওঁ ইগনুৰ অধীনৰ খাল্লিকোট কলেজ অধ্যয়ন কেন্দ্ৰৰপৰা একাউণ্টেন্সী (সন্মানীয়) সহ বাণিজ্য শাখাত স্নাতক ডিগ্ৰী লাভ কৰে।^১৫ তেওঁৰ মাতৃয়ে তাত থকা ডি পল স্কুলত শিক্ষকতা কৰিছিল। স্নাতক ডিগ্ৰী লাভ কৰাৰ পাছত জেটলীয়ে পশ্চিমবংগৰ কলকাতাত এটা চেল ফোন কোম্পানীত কিছুদিনৰ বাবে মাৰ্কেটিং এক্সিকিউটিভ হিচাপে কাম কৰিছিল। পৰিয়ালটো বৰ্তমান মহৌ চহৰত স্থায়ীভাৱে বসবাস কৰিছে।^১৬

ব্যক্তিগত জীৱন

চেলিনা জেটলী অষ্ট্ৰিয়াৰ উদ্যমী আৰু হোটেল ব্যৱসায়ী পিটাৰ হাগৰ সৈতে বিবাহপাশত আবদ্ধ হয়। ২০১২ চনৰ মাৰ্চ মাহত তেওঁলোক যমজ পুত্ৰ সন্তানৰ পিতৃ-মাতৃ হয়।^১৭ ২০১৭ চনত জেটলীয়ে দ্বিতীয়বাৰৰ বাবে যমজ পুত্ৰ সন্তান জন্ম দিয়ে, যাৰ ভিতৰত এজনৰ হৃদযন্ত্ৰৰ বিসংগতিৰ বাবে মৃত্যু হয়।^১৮

২০২৪ চনৰ ছেপ্টেম্বৰ মাহত জেটলীৰ ভাতৃ তথা ভাৰতীয় সেনাবাহিনীৰ এজন অৱসৰপ্ৰাপ্ত বিষয়া মেজৰ (অৱসৰপ্ৰাপ্ত) বিক্ৰান্ত জেটলী ৰাষ্ট্ৰীয় নিৰাপত্তাৰ সৈতে জড়িত এক অভিযোগত সংযুক্ত আৰৱ আমিৰশ্বাহীত বন্দী হৈছিল। ইয়াৰ পৰিপ্ৰেক্ষিতত জেটলীয়ে দিল্লী উচ্চ ন্যায়ালয়ৰ কাষ চাপে আৰু ইয়াৰ ফলস্বৰূপে ২০২৫ চনৰ নৱেম্বৰ মাহত ন্যায়ালয়ে ভাৰতীয় বৈদেশিক পৰিক্ৰমা মন্ত্ৰ্যালয়ক জেটলীৰ ভাতৃক আইনী সাহায্য আগবঢ়াবলৈ নিৰ্দেশ দিয়ে।^{১৯২০২১}

২০২৫ চনৰ নৱেম্বৰ মাহত জেটলীয়ে স্বামীৰ বিৰুদ্ধে ঘৰুৱা হিংসাৰ অভিযোগ উত্থাপন কৰি মুম্বাইৰ এখন আদালতত ঘৰুৱা হিংসা আইনৰ অধীনত গোচৰ ৰুজু কৰে।^২২ জেটলীয়ে ৫০ কোটি টকাৰ ক্ষতিপূৰণ, সন্তানৰ ভৰণ-পোষণ আৰু জিম্মাৰ বাবে মাহে ১০ লাখ টকাৰ দাবী উত্থাপন কৰা বুলি জানিব পৰা গৈছে।^২৩ দাবী কৰা এই ক্ষতিপূৰণ তেওঁৰ উপাৰ্জনৰ হানি, সম্পত্তিৰ ক্ষতি আৰু আৱেগিক, শাৰীৰিক, যৌন তথা মৌখিক নিৰ্যাতনৰ প্ৰভাৱৰ বাবে বিচৰা হৈছে বুলি অভিযোগত উল্লেখ কৰা হৈছে।^২৪

বাহ্যিক সংযোগ

• Official Website
• Bollywood Fans Website
• The Welcome