এশা গুপ্তা

এশা গুপ্তা (ইংৰাজী ভাষা: Esha Gupta; জন্ম: ২৮ নৱেম্বৰ ১৯৮৫) এগৰাকী ভাৰতীয় অভিনেত্ৰী, মডেল আৰু সৌন্দৰ্য প্ৰতিযোগিতাৰ খিতাপ ধাৰী। তেওঁ হিন্দী ভাষা চলচ্চিত্ৰত কাম কৰে। তেওঁক 'ফেমিনা মিছ ইণ্ডিয়া ইণ্টাৰনেশ্যনেল ২০০৭'ৰ মুকুট পিন্ধোৱা হৈছিল আৰু তেওঁ মিছ ইণ্টাৰনেশ্যনেল ২০০৭ প্ৰতিযোগিতাত ভাৰতক প্ৰতিনিধিত্ব কৰিছিল। তেওঁ ক্ৰাইম থ্ৰিলাৰ জান্নাত ২ (২০১২)ৰ জৰিয়তে অভিনয়ত আত্মপ্ৰকাশ কৰে আৰু ফিল্মফেয়াৰ শ্ৰেষ্ঠ নবাগত অভিনেত্ৰীৰ বঁটাৰ বাবে মনোনয়ন লাভ কৰে।^১

গুপ্তাই ২০০৭ চনত ফেমিনা মিছ ইণ্ডিয়া প্ৰতিযোগিতাত অংশগ্ৰহণ কৰি তৃতীয় স্থান লাভ কৰিছিল আৰু মিছ ইণ্ডিয়া ইণ্টাৰনেশ্যনেল খিতাপ জয় কৰিছিল। পিছলৈ তেওঁ মিছ ইণ্টাৰনেশ্যনেল প্ৰতিযোগিতাত ভাৰতক প্ৰতিনিধিত্ব কৰিছিল।^২ অভিনয় জীৱনৰ আৰম্ভণিৰ পিছত গুপ্তাই ৰাজনৈতিক ড্ৰামা চক্ৰবেহুত (২০১২) কৰা অভিনয়ৰ বাবে প্ৰশংসা লাভ কৰিছিল, কিন্তু কমেডী ছবি হমচকলছত (২০১৪) তেওঁৰ অভিনয়ে নেতিবাচক সমালোচনা লাভ কৰে। তেওঁৰ সৰ্বাধিক উপাৰ্জনকাৰী ছবিসমূহৰ ভিতৰত আছিল হৰৰ থ্ৰিলাৰ ৰাজ থ্ৰী-ডি (২০১৩), ক্ৰাইম ড্ৰামা ৰুস্তম (২০১৬), আৰু একচন-এডভেন্সাৰ ছবি বাদশ্বাহো (২০১৭)।

প্ৰাৰম্ভিক জীৱন আৰু কাম

এশা গুপ্তাৰ জন্ম ১৯৮৫ চনৰ ২৮ নৱেম্বৰত নতুন দিল্লীত হৈছিল।^৩ তেওঁৰ পিতৃ এগৰাকী অৱসৰপ্ৰাপ্ত ভাৰতীয় বায়ু সেনাৰ বিষয়া আৰু মাতৃ এগৰাকী গৃহিনী।^৪ নেহা নামৰ তেওঁৰ এগৰাকী ভগ্নী আছে। তেওঁ শৈশৱৰ সৰহভাগ সময় ডেৰাডুন, হায়দৰাবাদ আৰু দিল্লীত অতিবাহিত কৰিছিল।^৫ গুপ্তাই মণিপাল একাডেমী অৱ হায়াৰ এডুকেচনৰ অন্তৰ্গত স্কুল অৱ কমিউনিকেচনৰপৰা গণসংযোগ বিষয়ত স্নাতক ডিগ্ৰী লাভ কৰিছিল।^৬

গুপ্তাই ২০০৭ চনত ফেমিনা মিছ ইণ্ডিয়া প্ৰতিযোগিতাত অংশগ্ৰহণ কৰিছিল, য'ত তেওঁ 'মিছ ফটোজেনিক' খিতাপ অৰ্জন কৰে^৭ আৰু তৃতীয় স্থান লাভ কৰি মিছ ইণ্ডিয়া ইণ্টাৰনেশ্যনেলত প্ৰতিযোগিতা কৰিবলৈ সুযোগ পায়।^৮ তেওঁ ২০১০ চনত 'কিংফিচাৰ কেলেণ্ডাৰ'ত স্থান লাভ কৰিছিল।^৯ পিছলৈ তেওঁ বলীউডত নিজৰ কেৰিয়াৰ গঢ়িবলৈ আগবাঢ়ে।^১০

সক্ৰিয়তা

এশাক পৰিৱেশ সংৰক্ষণৰ বিভিন্ন পদক্ষেপত অংশগ্ৰহণ কৰা দেখা যায়,^১১ যাৰ ভিতৰত "বিচ ক্লীনআপ ড্ৰাইভ" (সৈকত পৰিষ্কাৰ অভিযান),^১২ "ৱাক ফৰ চেভিং দা মেংগ্ৰোভছ" (মেংগ্ৰোভ বনাঞ্চল বাচাও পদযাত্ৰা),^১৩ আৰু বনাঞ্চল সুৰক্ষাৰ কাম-কাজ অন্যতম।^১৪ তেওঁ কন্যাসন্তানৰ উত্তৰণ আৰু শিক্ষাৰ বাবে কাম কৰা "সুৰমান প্ৰতিষ্ঠান"ৰ সৈতেও জড়িত।^১৫ ইয়াৰ উপৰি তেওঁ বিলুপ্তিৰ পথত থকা চাৰ্ক মাছৰ প্ৰজাতিসমূহ ৰক্ষাৰ বাবে সজাগতা সৃষ্টি কৰিবলৈ "চীলেগেছি" নামৰ সংস্থাটোকো সমৰ্থন কৰে।^১৬

বাহ্যিক সংযোগ

• EshaGuptaOfficial.com