কৃষ্ণা নাগৰ

কৃষ্ণা নাগৰ (Krishna Nagar) ভাৰতৰ ৰাজস্থানৰ এগৰাকী পেছাদাৰী পেৰা-বেডমিণ্টন খেলুৱৈ।^১ তেওঁ পেৰা-বেডমিণ্টনত পুৰুষৰ একক এছএছ৬ শ্ৰেণীত প্ৰতিদ্বন্দ্বিতা কৰে।^২ তেওঁ ২০২০ গ্ৰীষ্মকালীন পেৰালিম্পিকত পুৰুষৰ একক এছএইছ৬ বেডমিণ্টন প্ৰতিযোগিতাত স্বৰ্ণ পদক অৰ্জন কৰে।^৩

কেৰিয়াৰ

ইণ্ডোনেছিয়াত অনুষ্ঠিত ২০১৮ এছিয়ান পেৰা গেমছত কৃষ্ণা নাগৰে একক প্ৰতিযোগিতাত ব্ৰঞ্জৰ পদক লাভ কৰে।^৪ ২০১৯ চনত সংযুক্ত আৰৱ আমিৰাতৰ ডুবাইত অনুষ্ঠিত ফজ্জা পেৰা-বেডমিণ্টন আন্তঃৰাষ্ট্ৰীয় চেম্পিয়নশ্বিপত তেওঁ পুৰুষৰ একক এছএছ৬ শ্ৰেণীত আৰু ৰাজা মাগোত্ৰাৰ সৈতে মিক্সড ডাবলছত স্বৰ্ণ পদক অৰ্জন কৰে।^৫৬ ২০১৯ চনত ছুইজাৰলেণ্ডৰ বাছেলত অনুষ্ঠিত পেৰা-বেডমিণ্টন বিশ্ব চেম্পিয়নশ্বিপত তেওঁ ৰাজা মাগোত্ৰাৰ সৈতে পুৰুষৰ দ্বৈত প্ৰতিযোগিতাত ৰূপৰ পদক অৰ্জন কৰে। তেওঁ একক প্ৰতিযোগিতাতো ব্ৰঞ্জৰ পদক অৰ্জন কৰে।^৭

২০২০ চনত চাও পাওলোত অনুষ্ঠিত ব্ৰাজিল পেৰা বেডমিণ্টন আন্তঃৰাষ্ট্ৰীয় চেম্পিয়নশ্বিপত কৃষ্ণা নাগৰে পুৰুষৰ একক এছএছ৬-ত ৰূপৰ পদক লাভ কৰে।^৮ পেৰুত অনুষ্ঠিত পেৰা-বেডমিণ্টন ইণ্টাৰনেচনেল ২০২০-ত পুৰুষৰ একক এছএছ৬-ত তেওঁ স্বৰ্ণ পদক লাভ কৰে।^৯ তেওঁ বিশ্ব ৰেংকিঙৰ উচ্চ স্থানত থকাৰ ফলত টকিঅ' পেৰালিম্পিকৰ বাবে যোগ্যতা অৰ্জন কৰে।^১০১১

২০২১ চনত জাপানত অনুষ্ঠিত টকিঅ' ২০২০ গ্ৰীষ্মকালীন পেৰালিম্পিকত তেওঁ পুৰুষৰ একক এছএইছ৬ বেডমিণ্টন প্ৰতিযোগিতাত দ্বিতীয় ছিড হিচাপে অংশগ্ৰহণ কৰে।^১২ গ্ৰুপ পৰ্যায়ত তেওঁ শীৰ্ষ স্থান অৰ্জন কৰি ছেমিফাইনেলত যুক্তৰাজ্যৰ ক্ৰিষ্টেন কুম্বচক পৰাস্ত কৰি ফাইনেলত প্ৰৱেশ কৰে।^১৩ ফাইনেলত তেওঁ হংকংৰ চু মেন কাইক ২–১ (২১–১৭, ১৬–২১, ২১–১৭) ব্যৱধানত পৰাস্ত কৰি স্বৰ্ণ পদক অৰ্জন কৰে।^৩ ২০২১ চনত তেওঁ ভাৰতৰ সৰ্বোচ্চ ক্ৰীড়া সন্মান মেজৰ ধ্যান চান্দ খেলৰত্ন বঁটা ^১৪ লাভ কৰে।^১৫১৬