উভতি যাবৰ মন

উভতি যাবৰ মন (ইংৰাজী: Ubhati Jabar Man) কবি ফৰিদা আহমেদৰ অসমীয়া কবিতা-সংকলন৷ ২੦২৩ চনত গুৱাহাটীৰ ইলয়ড কমিউনিকেচনে কবিতা-সংকলনটি প্ৰকাশ কৰে৷^১

বিষয়বস্তু

সংকলনটিত মুঠ তেত্ৰিছটা কবিতা সন্নিৱিষ্ট হৈছে৷ কবিতাবোৰৰ বিষয়বস্তু মূলতঃ প্ৰেম, একাকিত্ব, নাৰী চেতনা, প্ৰকৃতি চেতনা আদি৷ সংকলনটিৰ আগকথা লিখিছে সমালোচক আনন্দ বৰমুদৈয়ে৷ আগকথাত সমালোচকগৰাকীয়ে কৈছে, “ফৰিদা আহমেদ আত্মসচেতন আৰু স্বতঃপ্ৰণোদিত৷ সৃষ্টিশীল কল্পনাৰ সমানে তেওঁৰ সমালোচনাত্মক দৃষ্টিও ক্ৰিয়াশীল৷”^১ সংকলনটিৰ কবিতাবোৰৰ আলোচনা কৰি সাহিত্যিক নগেন শইকীয়াই লিখিছে, “ড੦ আহমেদৰ কবিতাত দুটা নতুনত্ব লক্ষ্য কৰিছোঁ—এটা স্বাভাৱিকভাৱেই এৰি অহা অতীত আৰু আনটো হ’ল কাব্যগাঁথনিৰ ৰীতিটো৷”^২

কবিৰ পৰিচয়

কবি ফৰিদা আহমেদ ডিব্ৰুগড় বিশ্ববিদ্যালয়ৰ নৃতত্ত্ব বিভাগৰ অৱসৰপ্ৰাপ্ত অধ্যাপক৷ পলমকৈ কবিতা লিখিবলৈ আৰম্ভ কৰা আহমেদৰ কবিতা গৰীয়সীকে মুখ্য কৰি অসমৰ বিভিন্ন কাকত-আলোচনীত নিয়মীয়াকৈ প্ৰকাশ পাই আহিছে৷ উভতি যাবৰ মন তেওঁৰ প্ৰথম কবিতা-সংকলন৷ তেওঁৰ কবিতাৰ আনন্দ বৰমুদৈয়ে কৰা ইংৰাজী অনুবাদ দ্য হেভেনলী স্কাই (২੦২৪) নামেৰে প্ৰকাশ পাইছে৷^১