অমলা পল

অমলা পল (ইংৰাজী: Amala Paul; জন্ম: ২৬ অক্টোবৰ ১৯৯১) এগৰাকী ভাৰতীয় অভিনেত্ৰী আৰু প্ৰযোজক যিয়ে মূলতঃ তামিল ভাষা আৰু মালয়ালম ভাষা চলচ্চিত্ৰত কাম কৰে। ইয়াৰ উপৰি তেওঁ কিছুমান তেলুগু ভাষা আৰু হিন্দী ভাষা ছবিতো অভিনয় কৰিছে। তেওঁ তামিলনাডু ৰাজ্যিক চলচ্চিত্ৰ বঁটা, এটা ফিল্মফেয়াৰ বঁটা (দক্ষিণ) আৰু দুটাকৈ দক্ষিণ ভাৰতীয় আন্তঃৰাষ্ট্ৰীয় চলচ্চিত্ৰ বঁটা লাভ কৰিছে।^১২৩

অমলাই মালয়ালম ছবি নীলতামৰা (২০০৯) যোগে নিজৰ কেৰিয়াৰ আৰম্ভ কৰিছিল। পৰৱৰ্তী সময়ত তেওঁ তামিল ছবি ময়না (২০১০)ত অভিনয় কৰে, যাৰ বাবে তেওঁ শ্ৰেষ্ঠ অভিনেত্ৰীৰ তামিলনাডু ৰাজ্যিক চলচ্চিত্ৰ বঁটা লাভ কৰিবলৈ সক্ষম হয়।^৪ তেওঁ ৰান বেবী ৰান (২০১২) আৰু অৰু ইণ্ডিয়ান প্ৰণয়কথা (২০১৩) ছবিত কৰা অভিনয়ৰ বাবে দুটাকৈ ছিইমা শ্ৰেষ্ঠ অভিনেত্ৰীৰ বঁটা (মালয়ালম) লাভ কৰে। ইয়াৰ উপৰি তেওঁ ভেট্টি (২০১২), থালাইভা (২০১৩), ভেলাইলা পট্টধাৰী (২০১৪), হেব্বুলি (২০১৭), থিৰুট্টু পায়লে ২ (২০১৭), ৰাতচাচন (২০১৮) আৰু দ্য গোট লাইফ (২০২৪)ৰ দৰে সফল ছবিত অভিনয় কৰিছে। মিলি (২০১৫) ছবিৰ নাম চৰিত্ৰত কৰা অভিনয়ে তেওঁক ফিল্মফেয়াৰ সমালোচকৰ শ্ৰেষ্ঠ অভিনেত্ৰীৰ বঁটা (মালয়ালম) প্ৰদান কৰে।^৫

প্ৰাৰম্ভিক জীৱন

অমলা পলৰ জন্ম ১৯৯১ চনৰ ২৬ অক্টোবৰত কেৰালাৰ এৰ্নাকুলামত হৈছিল।^১৬৭৮ তেওঁ পল ভাৰ্গিজ (মৃত্যু ২০১৭) আৰু এনিচ পলৰ সন্তান।^৯ অমলাৰ চলচ্চিত্ৰ জগতত প্ৰৱেশৰ পিছত তেওঁৰ ভাতৃ অভিজিত পলেও কেইখনমান ছবিত অভিনয় কৰিছিল। আলুভাৰ নিৰ্মলা হায়াৰ চেকেণ্ডাৰী স্কুলৰপৰা স্কুলীয়া শিক্ষা সম্পূৰ্ণ কৰাৰ পাছত তেওঁ চলচ্চিত্ৰত কেৰিয়াৰ আৰম্ভ কৰিবলৈ শিক্ষাৰপৰা বিৰতি লৈছিল। অৱশ্যে পৰৱৰ্তী সময়ত তেওঁ ইংৰাজী বিষয়ত বি.এ. ডিগ্ৰী লাভ কৰিবলৈ ক'চিৰ ছেইণ্ট টেৰেছা কলেজত যোগদান কৰে।^১০

অমলাৰ দেউতাকে তেওঁৰ অভিনয় জীৱনক লৈ তীব্ৰ বিৰোধিতা কৰিছিল যদিও ভাতৃয়ে তেওঁৰ ইচ্ছাক দৃঢ় সমৰ্থন কৰাত শেষত মান্তি হয়। অমলাই পিছত দাবী কৰিছিল যে তেওঁৰ মাজত কলাৰ গুণ পূৰ্বৰেপৰা আছিল। তেওঁ উল্লেখ কৰে যে তেওঁৰ মাতৃ এগৰাকী গায়িকা আছিল আৰু দেউতাকে কলেজত পঢ়ি থকা সময়ত থিয়েটাৰৰ সৈতে জড়িত আছিল।^১১

ব্যক্তিগত জীৱন

পৰিচালক ছামীৰ অনুৰোধত অমলাই তেওঁৰ অভিনয় জগতৰ নাম 'অনখা'লৈ সলনি কৰিছিল, কাৰণ পৰিচালকগৰাকীয়ে যুক্তি দিছিল যে আন এগৰাকী অভিনেত্ৰী অমলা আক্কিনেনিয়ে ইতিমধ্যে এই নামটো জনপ্ৰিয় কৰি তুলিছে। অৱশ্যে ২০১১ চনত তেওঁৰ ছবি সিন্ধু সমাৱেলীৰ বিফলতাৰ পিছত তেওঁ পুনৰ নিজৰ আচল নামটোলৈ উভতি আহে, কাৰণ তেওঁ অনুভৱ কৰিছিল যে নতুন নামটোৱে তেওঁলৈ দুৰ্ভাগ্য কঢ়িয়াই আনিছে। তেওঁৰ ভাতৃ অভিজিত পলো এজন অভিনেতা আৰু তেওঁ কেইখনমান ছবিত সৰু চৰিত্ৰত অভিনয় কৰিছে।

২০১১ চনত যেতিয়া অমলাই দেৱ থিৰুমগল ছবিত কাম কৰি আছিল, তেতিয়া পৰিচালক এ এল বিজয়ৰ সৈতে তেওঁৰ প্ৰেমৰ সম্পৰ্ক থকাৰ কথা চৰ্চালৈ আহিছিল, যদিও তেওঁলোকে সেই সময়ত এই কথা অস্বীকাৰ কৰিছিল। ২০১৪ চনৰ ৭ জুনত ক'চিৰ আলুভাত বিজয়ৰ সৈতে তেওঁৰ আঙঠি পিন্ধোৱা পৰ্ব সম্পন্ন হয়। ২০১৪ চনৰ ১২ জুনত চেন্নাইৰ মেয়ৰ ৰামনাথন চেট্টিয়াৰ হলত এই দম্পতীটো বিবাহপাশত আবদ্ধ হয়। ২০১৬ চনত অমলা আৰু বিজয়ে বিবাহ বিচ্ছেদৰ বাবে আৱেদন কৰে। অমলাই অভিনয় জীৱন অব্যাহত ৰখাক লৈ তেওঁৰ শাহু-শাহুৰেকৰ সৈতে হোৱা মতানৈক্যই ইয়াৰ মূল কাৰণ আছিল বুলি জানিব পৰা গৈছে। ২০১৭ চনত তেওঁলোকৰ আনুষ্ঠানিকভাৱে বিবাহ বিচ্ছেদ হয়।

২০২৩ চনত তেওঁ ব্যৱসায়ী জগত দেশাইৰ সৈতে বিবাহপাশত আবদ্ধ হয়। ২০২৪ চনৰ ১১ জুনত তেওঁলোকৰ ইলাই নামৰ এজন পুত্ৰ সন্তান জন্ম হয়।

২০১৮ চনৰ জানুৱাৰী মাহত কৰ ফাঁকিৰ অভিযোগত অমলা গ্ৰেপ্তাৰ হৈছিল। ক্ৰাইম ব্ৰাঞ্চৰ এক তদন্তত ধৰা পৰিছিল যে তেওঁ ভুৱা নথি-পত্ৰ ব্যৱহাৰ কৰি পুডুচেৰীত নিজৰ বিলাসী গাড়ীখন পঞ্জীয়ন কৰিছিল। পিছলৈ ক্ষেত্ৰাধিকাৰ সম্পৰ্কীয় কাৰিকৰী কাৰণত এই গোচৰটো বন্ধ কৰি দিয়া হয়।