অপৰ্ণা বালামুৰলী

অপৰ্ণা বালামুৰলী (ইংৰাজী: Aparna Balamurali; জন্ম: ১১ ছেপ্টেম্বৰ ১৯৯৫^১) এগৰাকী ভাৰতীয় অভিনেত্ৰী আৰু নেপথ্য গায়িকা, যিয়ে মূলতঃ মালয়ালম ভাষা আৰু তামিল ভাষা চলচ্চিত্ৰত কাম কৰে। তেওঁ ৰাষ্ট্ৰীয় চলচ্চিত্ৰ বঁটা আৰু দক্ষিণ ফিল্মফেয়াৰ বঁটা লাভ কৰিছে। অপৰ্ণা মহেশিন্তে প্ৰতিকাৰম (২০১৬), চানডে হলিডে (২০১৭), চুৰাৰাই পট্টু (২০২০) আৰু কিস্কিন্ধা কাণ্ডম (২০২৪) আদি ছবিৰ চৰিত্ৰৰ বাবে পৰিচিত। চুৰাৰাই পট্টু ছবিৰ বাবে তেওঁ শ্ৰেষ্ঠ অভিনেত্ৰীৰ ৰাষ্ট্ৰীয় চলচ্চিত্ৰ বঁটা লাভ কৰিছিল।^২ ২০২৫ চনত 'ফৰ্বছ এছিয়া'ই তেওঁক তেওঁলোকৰ '৩০ অনূৰ্ধ্ব ৩০' তালিকাত স্থান দিছিল।^৩

প্ৰাৰম্ভিক জীৱন

কেৰালাৰ ত্ৰিচুৰত অপৰ্ণাৰ জন্ম হৈছিল। তেওঁৰ পিতৃ কে. পি. বালামুৰলী মেনন এজন সংগীত পৰিচালক আৰু মাতৃ শোভা বালামুৰলী।^৪ তেওঁ দেৱমাতা চি.এম.আই. পাব্লিক স্কুলত শিক্ষা গ্ৰহণ কৰিছিল।^৫

কেৰিয়াৰ

২০১৫ চনত অপৰ্ণাৰ প্ৰথম ছবি অৰু ছেকেণ্ড ক্লাছ যাত্ৰা মুক্তি লাভ কৰে। তেওঁ মহেশিন্তে প্ৰতিকাৰম (২০১৬) ছবিখনৰ জৰিয়তে জনপ্ৰিয়তা লাভ কৰে।^৬ তেওঁ অৰু মুথাছি গাধা (২০১৬) নামৰ হাস্যমধুৰ ছবি এখনতো অভিনয় কৰিছিল।^৭ ২০১৭ চনত ৮ থোট্টাক্কলৰ জৰিয়তে তেওঁ তামিল ছবিজগতত আত্মপ্ৰকাশ কৰে। তেওঁ চানডে হলিডে (২০১৭) আৰু ত্ৰিচ্ছিভাপেৰুৰ ক্লিপঠাম (২০১৭) ছবিত অভিনয় কৰিছিল। এই দুয়োখন ছবিতে তেওঁ আচিফ আলীৰ বিপৰীতে অভিনয় কৰিছিল।^৮ ২০১৮ চনত তেওঁৰ কামুকী আৰু বি. টেক মুক্তি পায়।^৯ জি. ভি. প্ৰকাশ কুমাৰ অভিনীত সৰ্বম থালা মায়ম (২০১৯) ছবিত তেওঁক নায়িকা হিচাপে নিৰ্বাচন কৰা হৈছিল।^১০ ইয়াৰ পিছত তেওঁৰ মালয়ালম ছবিসমূহ আছিল মিষ্টাৰ এণ্ড মিচেছ ৰাউডী (২০১৯) আৰু জিম বুম ভা (২০১৯)।^১১ সূৰ্য অভিনীত চুৰাৰাই পট্টু (২০২০) ছবিত তেওঁ 'বম্মি' চৰিত্ৰত অভিনয় কৰিছিল। তেওঁৰ পৰৱৰ্তী তামিল ছবি আছিল থিথুম নান্দ্ৰুম (২০২১)।^১২