ৰুপি কৌৰ

ৰুপি কৌৰ (Rupi Kaur; জন্ম: ৪ অক্টোবৰ, ১৯৯২) হ'ল এগৰাকী ভাৰতীয় মূলৰ কানাডিয়ান কবি, ইলাষ্ট্ৰেটৰ আৰু লেখক। ইনষ্টাগ্ৰাম আৰু টাম্বলাৰৰ যোগেদি নিজৰ দৃশ্যমান চুটি কবিতাসমূহ প্ৰকাশ কৰি কৌৰ লোকচক্ষুলৈ আহে।

২০১৪ চনত, তেওঁৰ প্ৰথমখন কিতাপ 'মিল্ক এণ্ড হনি' প্ৰকাশৰ পাছতে তেওঁ অভূতপূৰ্ব জনপ্ৰিয়তা লাভ কৰে। সমগ্ৰ বিশ্বত কিতাপখনৰ ত্ৰিশ লাখ কপি বিক্ৰী হৈছিল আৰু নিউয়ৰ্ক টাইমছৰ সৰ্বাধিক বিক্ৰীৰ তালিকাত ই এবছৰতকৈও বেছি সময় স্থান পাইছিল। ২০১৭ চনত, কৌৰৰ দ্বিতীয়খন কিতাপ 'দ্য চান এণ্ড হাৰ ফ্লাৱাৰচ' প্ৰকাশ পায় আৰু যি তেওঁক বিবিচিৰ ১০০ গৰাকী মহিলাৰ তালিকাত স্থান দিয়ে।^১ কৌৰৰ তৃতীয়খন কাব্য সংকলন 'হ'ম বডি' ২০২০ চনৰ ১৭ নৱেম্বৰত প্ৰকাশ হয়।^২

তেওঁৰ সৃষ্টিসমূহ মানৱীয় সম্পৰ্ক, অনুপ্ৰৱেশকাৰীৰ অভিজ্ঞতা আৰু যৌন নিৰ্যাতনৰ ওপৰত ভিত্তি কৰি ৰচিত আৰু 'ইনষ্টা পয়েট্ৰি'ত এইসমূহে সকলোতকৈ আগস্থান পাইছে।^৩৪৫ ২০১৯ চনত, 'দ্য নিউ ৰিপাব্লিকে' কৌৰক 'শতিকাটোৰ লেখক' (ৰাইটাৰ অৱ দ্য ডেকে) আখ্যা দিয়ে।^৬৭

প্ৰাৰম্ভিক জীৱন

পঞ্জাব, ভাৰতৰ এটা শিখ পৰিয়ালত কৌৰৰ জন্ম হৈছিল।^৮ চাৰি বছৰ বয়সত তেওঁ মাক-দেউতাকৰ সৈতে কানাডাত অনুপ্ৰৱেশ কৰে।^৫ তেওঁৰ দেউতাক এজন ট্ৰাক ড্ৰাইভাৰ আছিল আৰু পৰিয়ালটো ব্ৰামটনত বাস কৰিছিল।^৫ তেওঁ মাকৰপৰা ছবি আঁকিবলৈ অনুপ্ৰাণিত হৈছিল।^৯ কৈশোৰলৈকে তেওঁ ছবি আঁকিছিল, কিন্তু সোতৰ বছৰ বয়সত তেওঁৰ আগ্ৰহ লিখা আৰু প্ৰদৰ্শন কৰালৈ ঢাল খায়।^১০

ৱাটাৰলু বিশ্ববিদ্যালয়ত 'বাকপটুতা আৰু পেচাগত লেখন' বিষয়ত অধ্যয়নৰ^১১ আগতে তেওঁ 'টাৰ্ণাৰ ফেণ্টন চেকেণ্ডেৰী স্কুল'ত পঢ়িছিল।

কৰ্মৰাজি

প্ৰায় ২০০৯ চনত, মেল্টনৰ এটা পঞ্জাবী সম্প্ৰদায়ৰ স্বাস্থ্য কেন্দ্ৰৰ বেচমেণ্টত কৌৰে তেওঁৰ প্ৰথমটো অনুষ্ঠান কৰে।^১২ স্কুলীয়া জীৱনত তেওঁ নামবিহীন ভাৱে তেওঁৰ কবিতাসমূহ প্ৰকাশ কৰিছিল। কিন্তু ২০১৩ চনত তেওঁ প্ৰথমে টাম্বলাৰত আৰু ২০১৪ চনত ইনষ্টাগ্ৰামত নিজৰ নাম সহিতে কবিতাবোৰ প্ৰকাশ কৰিবলৈ লয়। য'ত তেওঁ নিজৰ ইলাষ্ট্ৰেচনসমূহো প্ৰকাশ কৰিছিল।^১৩

মিল্ক এণ্ড হনি

কৌৰৰ প্ৰথমখন কিতাপ আছিল, 'মিল্ক এণ্ড হনি' নামৰ এখন কাব্য-সংকলন। কিতাপখন ২০১৪ চনৰ ৪ নৱেম্বৰ তাৰিখে তেওঁ নিজে ক্ৰিয়েটস্পেচত প্ৰকাশ কৰিছিল।^১৪৫ এইখন কানাডাৰ এখন সৰ্বাধিক বিক্ৰী হোৱা কিতাপ। কিতাপখনৰ প্ৰায় ত্ৰিশ লাখ কপি বিক্ৰী হৈছিল^১৫১৬ আৰু ১৭৮ সপ্তাহৰ বাবে ই নিউয়ৰ্ক টাইমচৰ সৰ্বাধিক বিক্ৰী হোৱা কিতাপৰ তালিকাত আছিল।^১৭ বিশ্বৰ ২৫টা ভাষালৈ কিতাপখন অনুবাদ হৈছে।^১৩ কোৱা হৈছিল যে, কিতাপখনে ২০১৭ চনত ইংলেণ্ডত পঢ়ুৱৈৰ মাজত কবিতাৰ কিতাপৰ চাহিদা বৃদ্ধি কৰিছিল।^১৮

দ্য চান এণ্ড হাৰ ফ্লাৱাৰচ

তেওঁৰ দ্বিতীয়খন কিতাপ 'দ্য চান এণ্ড হাৰ ফ্লাৱাৰচ' ২০১৭ চনৰ ৩ অক্টোবৰত প্ৰকাশ পায়।^১৯২০ কিতাপখন ৭৬ সপ্তাহৰ বাবে নিউয়ৰ্ক টাইমচৰ সৰ্বাধিক বিক্ৰী হোৱা কিতাপৰ তালিকাত আছিল। কানাডাৰ সৰ্বাধিক বিক্ৰী হোৱা কিতাপৰ তালিকাত 'দ্য চান এণ্ড হাৰ ফ্লাৱাৰচ' ২০১৭ চনৰ সপ্তম আৰু ২০১৮ চনৰ নৱমখন কিতাপ আছিল।^২১২২

হ'ম বডি

কৰ'নাভাইৰাছ ৰোগ ২০১৯ৰ সময়ত কৌৰ মাক-দেউতাকৰ লগত ব্ৰামটনত থাকিবলৈ আহে আৰু এই সময়তে তেওঁ ইনষ্টাগ্ৰাম লাইভৰ জৰিয়তে কৰ্মশালাৰ আয়োজন কৰে।^২৩ ২০২০ চনৰ ১৭ নৱেম্বৰ তাৰিখে কৌৰৰ নতুন কবিতাৰ কিতাপ 'হ'ম বডি' প্ৰকাশ পায়।^২ এইখন কিতাপতো কৌৰৰ ইলাষ্ট্ৰেচনে ঠাই পাইছে।^২ প্ৰকাশৰ পিছতে তিনি সপ্তাহ জুৰি সপ্তাহটোৰ সৰ্বাধিক বিক্ৰী হোৱা কিতাপৰ অভিলেখ স্থাপন কৰা এইখন আছিল দ্বিতীয়খন কানাডিয়ান কল্পকাহিনীৰ কিতাপ।^{২৪২৫২৬} কিতাপখন আছিল ২০২১ চনৰ শ্ৰেষ্ঠ পাঁচোখন কিতাপৰ এখন।^২৭ ই নিউয়ৰ্ক টাইমচৰ সৰ্বাধিক বিক্ৰী হোৱা কিতাপৰ তালিকাতো ঠাই পাইছে।^২৮