ৰিধিমা ঘোষ

ৰিধিমা ঘোষ এগৰাকী ভাৰতীয় বঙালী ভাষা চলচ্চিত্ৰ আৰু দূৰদৰ্শনৰ অভিনেত্ৰী।^১ তেওঁ ২০০৭ চনত সংঘমিত্ৰা চৌধুৰীৰ ছবি ৰাতপৰিৰ ৰূপকথাৰ জৰিয়তে ডাঙৰ পৰ্দাত আত্মপ্ৰকাশ কৰিছিল। ইয়াৰ পিছত ২০০৯ চনত বাংলা ধাৰাবাহিক বৌ কথা কওৰ জৰিয়তে তেওঁ দূৰদৰ্শনত ভূমুকি মাৰে। তেওঁ ২০১১ চনৰ অন্যতম প্ৰশংসিত ছবি কৌশিক গাংগুলীৰ ৰং মিলান্তিত কৰা অভিনয়ৰ বাবে জনাজাত। এফএফএচিই (FFACE) কেলেণ্ডাৰৰ প্ৰথম সংস্কৰণৰ বাবে ৰিধিমা প্ৰথমগৰাকী চেলিব্ৰিটি মডেল হিচাপেও নিৰ্বাচিত হৈছিল।

শিক্ষা

ঘোষে কলকাতাৰ লৰেটো হাউচত স্কুলীয়া শিক্ষা সমাপ্ত কৰিছিল।^২ পৰৱৰ্তী সময়ত তেওঁ ভৱানীপুৰ এডুকেশ্যন ছচাইটি কলেজৰপৰা ইংৰাজী সাহিত্যত ডিগ্ৰী লাভ কৰে।

ব্যক্তিগত জীৱন

১৯৮৯ চনৰ ১৮ জানুৱাৰীত ভাৰতৰ পশ্চিমবংগৰ কলকাতাত ৰিধিমাৰ জন্ম হৈছিল আৰু তাতেই ডাঙৰ-দীঘল হৈছিল।^৩ ২০১৭ চনৰ ২৮ নৱেম্বৰত তেওঁ তেওঁৰ দীৰ্ঘদিনীয়া প্ৰেমিক তথা অভিনেতা গৌৰৱ চক্ৰৱৰ্তীৰ সৈতে বিবাহপাশত আবদ্ধ হয়। ২০১০ চনৰ ৫ ছেপ্টেম্বৰত ৰং মিলান্তিৰ চিত্ৰনাট্য পাঠৰ সময়ত তেওঁলোকৰ প্ৰথম সাক্ষাৎ হৈছিল।^৪৫ ৰিধিমা অভিনেতা সব্যসাচী চক্ৰৱৰ্তী আৰু অভিনেত্ৰী মিঠু চক্ৰৱৰ্তীৰ বোৱাৰী। তেওঁৰ দেওৰেক হ’ল অভিনেতা অৰ্জুন চক্ৰৱৰ্তী।^৬ ২০২৩ চনৰ ১৬ ছেপ্টেম্বৰত তেওঁ ধীৰ নামৰ এটা পুত্ৰ সন্তান জন্ম দিয়ে।^৭

কেৰিয়াৰ

ৰিধিমাই ষ্টাৰ জলছাৰ মেগা ধাৰাবাহিক বৌ কথা কওৰ জৰিয়তে দূৰদৰ্শনত আত্মপ্ৰকাশ কৰে। ২০০৭ চনত মুক্তি পোৱা সংঘমিত্ৰা চৌধুৰীৰদ্বাৰা পৰিচালিত ৰাতপৰিৰ ৰূপকথাৰ জৰিয়তে তেওঁ চলচ্চিত্ৰ জগতত খোজ পেলায়। তেওঁ ২০১১ চনৰ ছেপ্টেম্বৰত মুক্তি পোৱা কৌশিক গাংগুলীৰ ৰং মিলান্তিৰ অভিনয়ৰ জৰিয়তে ব্যাপক জনপ্ৰিয়তা লাভ কৰে।^৮

ঘোষে ২০১৪ চনত কালাৰ্ছ বাংলাত সম্প্ৰচাৰিত ব্যোমকেশ ধাৰাবাহিকৰ জৰিয়তে পুনৰ দূৰদৰ্শনলৈ উভতি আহে। এই ধাৰাবাহিকখনত সত্যৱতীৰ চৰিত্ৰত কৰা অভিনয়ৰ বাবে তেওঁ দৰ্শকৰ মাজত যথেষ্ট সুপৰিচিত হৈ পৰে।

হইচৈ ৱেব ধাৰাবাহিক ব্যোমকেশৰ (ছিজন ১–৮) জৰিয়তে তেওঁ অ’টিটি (OTT) জগতত ভৰি দিয়ে। ইয়াত তেওঁ কৰা সত্যৱতীৰ চৰিত্ৰটো দৰ্শক আৰু সমালোচক উভয়ৰেদ্বাৰা প্ৰশংসিত হৈছিল। ইয়াৰ পিছত তেওঁ আৰু কেইবাখনো ৱেব ধাৰাবাহিকত অভিনয় কৰে।^৯

২০২৪ চনত ঘোষে পুনৰ দূৰদৰ্শনলৈ উভতি আহে আৰু স্বামী অভিনেতা গৌৰৱ চক্ৰৱৰ্তীৰ সৈতে জি বাংলাৰ অনুষ্ঠান ৰন্ধনে বন্ধনৰ আঁত ধৰে।^১০