ৰম্য সুব্ৰমণিয়াম

ৰম্য সুব্ৰমণিয়াম (ইংৰাজী ভাষা: Ramya Subramanian; জন্ম: ৩০ জুলাই), যাক ভিজে ৰম্য নামেৰেও জনা যায়, এগৰাকী ভাৰতীয় অভিনেত্ৰী আৰু টেলিভিছন ঘোষিকা। তেওঁ মূলতঃ তামিল ভাষা চলচ্চিত্ৰ উদ্যোগত কৰ্মৰত।

প্ৰাৰম্ভিক জীৱন

ৰম্যৰ জন্ম হৈছিল তাঞ্জাভুৰত। তেওঁ পদ্মা শেষাদ্ৰী বালা ভৱনত দশম শ্ৰেণীৰ লৈকে শিক্ষা গ্ৰহণ কৰিছিল আৰু আদৰ্শ বিদ্যালয়ৰপৰা একাদশ আৰু দ্বাদশ শ্ৰেণী সম্পূৰ্ণ কৰিছিল। তেওঁ চেন্নাইৰ এম.অ'.পি. বৈষ্ণৱ কলেজ ফৰ উইমেনৰপৰা ভিজুৱেল কমিউনিকেচনত বি.এছচি ডিগ্ৰী লাভ কৰিছিল।^১

কেৰিয়াৰ

ৰম্যই ২০০৪ চনত মিছ চেন্নাই প্ৰতিযোগিতাত অংশগ্ৰহণ কৰিছিল। পৰৱৰ্তী সময়ত তেওঁ ষ্টাৰ বিজয় চেনেলৰ কালাক্কাপোভাডু য়াৰু?, উংগালিল য়াৰ আদুথা প্ৰভাদেৱা?, নাম্মা ভেটু কল্যাণম আৰু কেডি বয়জ কিলাডি গাৰ্লছ আদিকে ধৰি বিভিন্ন টেলিভিছন অনুষ্ঠানৰ আঁত ধৰিছিল।^২ বিবাহৰ পিছত তেওঁ প্ৰকাশ কৰিছিল যে তেওঁ টেলিভিছনৰ কাম কমাই দিব আৰু কামৰ ক্ষেত্ৰত অধিক নিৰ্বাচনী হ’ব।^৩

২০০৭ চনত ৰম্যই মোঝি চলচ্চিত্ৰত এক অনুল্লেখিত চৰিত্ৰৰ জৰিয়তে অভিনয়ৰ পাতনি মেলে।^৪ ২০১৫ চনত তেওঁ মণিৰত্নমৰ অ’ কাদাল কানমণিত দুলকুৱাৰ ছলমানৰ বান্ধৱী অনন্যাৰ চৰিত্ৰত অভিনয় কৰে।^৫ একে বছৰতে তেওঁ ৯২.৭ বিগ এফ.এমত এগৰাকী আৰ.জে হিচাপে কাম কৰিবলৈ লয়।^৬ ২০১৯ চনৰ আগষ্ট মাহত তেওঁ 'ডব্লিউ.ই মেগাজিন'ৰ ফিটনেছ স্পেচিয়েল সংখ্যাৰ বেটুপাতত স্থান পাইছিল।^৭ ইয়াৰ উপৰি তেওঁ বহুতো অনুষ্ঠান আৰু বঁটা বিতৰণী সমাৰোহৰ আঁত ধৰিছে।^৮

ৰম্য এগৰাকী স্বাস্থ্য প্ৰশিক্ষকো।^৯

ব্যক্তিগত জীৱন

ৰম্যই ২০১৪ চনত অপৰাজিত জয়ৰমনৰ সৈতে বিবাহপাশত আবদ্ধ হৈছিল আৰু ২০১৫ চনত তেওঁলোকৰ বিচ্ছেদ ঘটে।^১০