হোকাটো হোটোঝে ছেমা

হোকাটো হোটোঝে ছেমা (Hokato Hotozhe Sema; জন্ম: ২৪ ডিচেম্বৰ ১৯৮৩) ^১ নাগালেণ্ডৰ ডিমাপুৰৰ এজন ভাৰতীয় পেৰা-এথলীট। তেওঁ পুৰুষৰ শ্বট পুট এফ ৫৭ ইভেণ্টত অংশগ্ৰহণ কৰে। ২০২৪ চনত পেৰিছত অনুষ্ঠিত গ্ৰীষ্মকালীন পেৰালিম্পিকত ভাৰতক প্ৰতিনিধিত্ব কৰি এই ইভেণ্টত ব্ৰঞ্জৰ পদক লাভ কৰে।^{২৩৪৫৬}

পৃষ্ঠভূমি

ছেমাৰ জন্ম হৈছিল নাগালেণ্ডৰ ডিমাপুৰত। তেওঁ ৯ অসম ৰেজিমেণ্টত ভাৰতীয় সেনাত হাবিলদাৰ হিচাপে নিয়োজিত হৈ আছে।^৭ ২০০২ চনত নিয়ন্ত্ৰণ ৰেখাত এক অভিযানৰ সময়ত ভূমিস্খলনৰ ফলত তেওঁ ভৰিখন হেৰুৱাইছিল। তাৰ পিছত, ৩২ বছৰ বয়সত তেওঁ শ্বটপুট খেলিবলৈ আৰম্ভ কৰে আৰু প্ৰশিক্ষক ৰাকেশ ৰাৱাটৰ অধীনত প্ৰশিক্ষণ লয়।^৮ তেওঁক বৰ্তমান অলিম্পিক গোল্ড কোৱেষ্ট নামৰ এক ক্ৰীড়া বেচৰকাৰী সংস্থাৰ দ্বাৰা সমৰ্থন কৰা হৈছে।

কেৰিয়াৰ

চীনৰ হাংঝৌত অনুষ্ঠিত ২০২২ চনৰ এছিয়ান পেৰা গেমছত শ্বটপুট এফ-৫৬/৫৭ শাখাৰ ইভেণ্টত ব্ৰঞ্জৰ পদক লাভ কৰে ছেমাই। ^৯ ইয়াৰোপৰি ২০২৪ চনত পেৰিছত অনুষ্ঠিত গ্ৰীষ্মকালীন পেৰালিম্পিকত ১৪.৬৫ মিটাৰ ব্যক্তিগত শ্ৰেষ্ঠ থ্ৰ’ৰে শ্বটপুট এফ-৫৭ শাখাত ব্ৰঞ্জৰ পদক লাভ কৰে। ^১০