প্ৰীতি পাল

প্ৰীতি পাল (Preethi Pal, জন্ম ২২ ছেপ্টেম্বৰ ২০০০) এগৰাকী ভাৰতীয় পেৰা এথলীট। তেওঁ মহিলাৰ ১০০ মিটাৰ ইভেণ্টত টি৩৫ শাখাত অংশগ্ৰহণ কৰে।^১ ২০২৪ চনত পেৰিছত অনুষ্ঠিত গ্ৰীষ্মকালীন পেৰালিম্পিকত ব্ৰঞ্জৰ পদক লাভ কৰে।^২ ইয়াৰ লগে লগে তেওঁ পেৰালিম্পিকৰ ট্ৰেক ইভেণ্টত পদক লাভ কৰা প্ৰথম গৰাকী ভাৰতীয় হিচাপে পৰিগণিত হয়।^৩

প্ৰাৰম্ভিক জীৱন

২০০০ চনৰ ২২ ছেপ্টেম্বৰ তাৰিখে উত্তৰ প্ৰদেশৰ মুজাফৰনগৰত প্ৰীতি পালৰ জন্ম হৈছিল। পিছলৈ তেওঁলোক মেৰঠ চহৰলৈ বদলি হয়। শৈশৱত তেওঁৰ মস্তিষ্কৰ পক্ষাঘাত হৈছিল। মেৰঠত উপযুক্ত চিকিৎসাৰ অভাৱত তেওঁৰ উন্নত চিকিৎসা সম্ভৱ নহ'ল। তেওঁ দিল্লীত প্ৰশিক্ষক গজেন্দ্ৰ সিঙৰ অধীনত এথলেটিক্সৰ প্ৰশিক্ষণ গ্ৰহণ কৰে।^৪

খেলুৱৈ জীৱন

২০২৪ চনৰ মে' মাহত জাপানৰ কোবেত অনুষ্ঠিত হোৱা বিশ্ব পেৰা এথলেটিকছ চেম্পিয়নশ্বিপত প্ৰীতি পালে ব্ৰঞ্জৰ পদক লাভ কৰে।^৪৫ ইয়াৰ লগতে মহিলাৰ টি৩৫ ২০০ মিটাৰ ইভেণ্টত ৩০.৪৯ ছেকেণ্ড সময়ত সমাপ্ত কৰি তেওঁ পেৰিছ পেৰালিম্পিকলৈ যোগ্যতা অৰ্জন কৰে। ২০২২ চনত চীনৰ হাংঝৌত অনুষ্ঠিত এছিয়ান পেৰা গেমছত তেওঁ দুবাৰকৈ অতি কম ব্যৱধানত পদক হেৰুৱাইছিল।^৬ ইয়াৰ পূৰ্বে ২০২৪ চনৰ মাৰ্চ মাহত বেংগালুৰুত অনুষ্ঠিত ষষ্ঠ ইণ্ডিয়ান অ'পেন পেৰা এথলেটিকছ চেম্পিয়নশ্বিপত দুটা সোণৰ পদক লাভ কৰিছিল।^৭

২০২৪ চনত পেৰিছত অনুষ্ঠিত গ্ৰীষ্মকালীন পেৰালিম্পিকত ভাৰতক প্ৰতিনিধিত্ব কৰিবলৈ যোগ্যতা অৰ্জন কৰে^৪ আৰু মহিলাৰ ১০০ মিটাৰ টি৩৫ শ্ৰেণীত ব্ৰঞ্জৰ পদক লাভ কৰে। তেওঁ ১৪.২১ ছেকেণ্ডৰ ব্যক্তিগত শ্ৰেষ্ঠ সময়ত উপনীত হৈ এই পদক লাভ কৰে।^৮