সোণাল চৌহান

সোণাল চৌহান (ইংৰাজী ভাষা: Sonal Chauhan; জন্ম: ১৬ মে' ১৯৮৫/১৯৮৭) এগৰাকী ভাৰতীয় অভিনেত্ৰী, গায়িকা, মডেল আৰু সৌন্দৰ্য প্ৰতিযোগিতাৰ খিতাপধাৰী। তেওঁ মূলতঃ তেলুগু আৰু হিন্দী চলচ্চিত্ৰত কাম কৰে।^১ ২০০৫ চনত তেওঁ ফেমিনা মিছ ইণ্ডিয়া আৰু মিছ ৱৰ্ল্ড টুৰিজিম খিতাপ অৰ্জন কৰিছিল।

২০০৮ চনত হিন্দী ছবি জন্নত-ৰ জৰিয়তে তেওঁ অভিনয় জীৱনৰ পাতনি মেলে^২ আৰু তেলুগু ছবিত তেওঁৰ অভিষেক ঘটে একে বছৰতে মুক্তি পোৱা ৰেইনবো ছবিৰ জৰিয়তে। চৌহানে ২০১০ চনত চেলুভিয়ে নিনে নোডালু-ৰ জৰিয়তে কানাড়া ছবিত আৰু ২০১৫ চনত ইঞ্জি ইডুপ্পাঝাগি-ৰ জৰিয়তে তামিল ছবিত অভিনয় আৰম্ভ কৰে। তেওঁ লেজেণ্ড (২০১৪), পণ্ডগা চেস্কো (২০১৫), চাইজ জিৰো (২০১৫) আৰু ডিক্টেটৰ (২০১৬) আদি সফল ছবিৰ অংশ হৈ আহিছে।

প্ৰাৰম্ভিক জীৱন

চৌহানৰ জন্ম এটা ৰাজপুত পৰিয়ালত হৈছিল।^৩ তেওঁ নয়ডাত দিল্লী পাব্লিক স্কুলত অধ্যয়ন কৰিছিল।^৪ তাৰ পিছত তেওঁ নতুন দিল্লীৰ গাৰ্গী কলেজৰপৰা দৰ্শন বিষয়ত সন্মানীয় স্নাতক ডিগ্ৰী লাভ কৰে।^৫

কৰ্মজীৱন

মডেলিং কেৰিয়াৰ

মালয়েছিয়াৰ চাৰাৱাক ৰাজ্যৰ মিৰিত অনুষ্ঠিত মিছ ৱৰ্ল্ড টুৰিজিম ২০০৫ খিতাপ তেওঁ লাভ কৰিছিল।^৬ তেওঁ হৈছে মিছ ৱৰ্ল্ড টুৰিজিম খিতাপ অৰ্জন কৰা প্ৰথমগৰাকী ভাৰতীয়।^৭ তেওঁ 'এফ এইচ এম' (FHM) আলোচনীৰ বেটুপাততো স্থান লাভ কৰিছিল।^৮

অভিনয় জীৱন

তেওঁ প্ৰথমবাৰৰ বাবে পৰ্দাত দেখা দিছিল হিমেশ ৰেশমিয়াৰ এলবাম আপ কা সুৰুৰ-ত। ছবি জগতত তেওঁ ইমৰান হাছমীৰ বিপৰীতে আত্মপ্ৰকাশ কৰিছিল।^৯