সুনীল ছেত্ৰী

সুনীল ছেত্ৰী (Sunil Chhetri; জন্ম: ৩ আগষ্ট ১৯৮৪) এজন ভাৰতীয় ফুটবল খেলুৱৈ। আই-লীগত তেওঁ বাংগালুৰু এফ চি দলৰ হৈ ফৰৱাৰ্ড স্থানত খেলে। ভাৰতৰ জাতীয় ফুটবল দলৰ তেওঁ বৰ্তমান অধিনায়ক। ছেত্ৰী হৈছে সক্ৰিয় খেলুৱৈসকলৰ ভিতৰত চতুৰ্থ সৰ্বাধিক আন্তঃৰাষ্ট্ৰীয় গ'ল দিয়া খেলুৱৈ,^১২ আৰু ২০২১ চনৰ জুনলৈকে সৰ্বকালৰ ১৩তম সৰ্বাধিক গ'ল দিয়া খেলুৱৈ। তেওঁ ভাৰতৰ ৰাষ্ট্ৰীয় দলৰ বাবে সৰ্বকালৰ সৰ্বাধিক গ'ল দিয়া খেলুৱৈ।^৩৪৫

অন্ধ্ৰপ্ৰদেশৰ ছেকেন্দ্ৰাবাদত (বৰ্তমান তেলংগানাৰ অন্তৰ্গত) জন্মগ্ৰহণ কৰা ছেত্ৰীয়ে ২০০২ চনত মোহন বাগান দলৰ হৈ নিজৰ পেছাদাৰী কেৰিয়াৰৰ সূচনা কৰে।^৬ তাৰ পাছত তেওঁ জে চি টি মিল্‌ছ দললৈ যায় আৰু ৪৮খন খেলত ২১টা গ'ল দিয়ে।^৬ ২০১০ চনৰ মেজৰ লীগ ছকাৰৰ বাবে তেওঁ কান্‌ছাছ চিটী ৱিজাৰ্ড্‌ছ দলৰ সৈতে চুক্তিবদ্ধ হৈ বিদেশী দলত চুক্তিবদ্ধ হোৱা ভাৰতীয় উপমহাদেশৰ তৃতীয়জন খেলুৱৈ হিচাপে পৰিগণিত হয়।^৭ অৱশ্যে অলপ দিনৰ ভিতৰতে তেওঁ পুনৰ আই-লীগলৈ ঘূৰি আহি চিৰাগ ইউনাইটেড আৰু মোহন বাগানৰ হৈ খেলে। প্ৰিমেৰিয়া লিগাৰ দল স্প'ৰ্টিং ক্লাব ডি পৰ্তুগালৰ সৈতে চুক্তিবদ্ধ হৈ তেওঁ পুনৰ বিদেশলৈ যায়। তেওঁ ক্লাবটোৰ ৰিজাৰ্ভ দলৰ হৈ খেলাৰ সুবিধা পায়।^৮

ভাৰতৰ জাতীয় ফুটবল দলৰ হৈ ছেত্ৰীয়ে ভাল প্ৰদৰ্শন আগবঢ়াই সুনাম অৰ্জন কৰে। তেওঁ ২০০৭, ২০০৯ আৰু ২০১২ চনৰ নেহৰু কাপৰ লগতে ২০১২ চনৰ SAFF চেম্পিয়নশ্বিপত ভাৰতীয় দলৰ জয়লাভত গুৰুত্বপূৰ্ণ অৰিহণা আগবঢ়ায়। ২০০৮ চনৰ এ এফ চি চেলেঞ্জ কাপতো তেওঁ ভাল প্ৰদৰ্শন আগবঢ়ায় আৰু ভাৰতে জয়লাভ কৰি ২৭ বছৰত প্ৰথমবাৰলৈ এ এফ চি এছিয়ান কাপলৈ যোগ্যতা অৰ্জন কৰে।^৯ ২০১১ চনৰ এ এফ চি এছিয়ান কাপতো তেওঁ ভাৰতৰ হৈ দুটা গ'ল দিয়ে।^১০

২০০৭, ২০১১, ২০১৩ আৰু ২০১৪ চনত মুঠ চাৰিবাৰ তেওঁ AIFF বৰ্ষশ্ৰেষ্ঠ খেলুৱৈ সন্মান লাভ কৰে।^১১ ছনী ছিক্স চেনেলত ফিফা বিশ্বকাপ ২০১৪ৰ তেওঁ ধাৰাভাষ্যকাৰ গোটৰ অংশ আছিল।

সন্মান

২০২১ চনত তেওঁ ভাৰতৰ সৰ্বোচ্চ ক্ৰীড়া সন্মান মেজৰ ধ্যান চান্দ খেলৰত্ন বঁটা ^১২ লাভ কৰে।^১৩১৪

ক্লাব

ডেম্পো এচ চি

• আই-লীগ(১):২০০৯-১০

চাৰ্চিল ব্ৰাদাৰ্চ এচ চি

• আই-লীগ(১):২০১২-১৩

বাংগালুৰু এফ চি

• আই-লীগ(১):২০১৩-১৪
• ইণ্ডিয়ান ফেডাৰেচন কাপ(১):২০১৪-১৫

জাতীয় দল

• নেহৰু কাপ (৩): ২০০৭, ২০০৯, ২০১২
• এ এফ চি চেলেঞ্জ কাপ (১): ২০০৮
• SAFF চেম্পিয়নশ্বিপ (১): ২০১১

ব্যক্তিগত

• AIFF বৰ্ষশ্ৰেষ্ঠ খেলুৱৈ (৪): ২০০৭, ২০১১, ২০১৩, ২০১৪
• এ এফগ চি চেলেঞ্জ কাপৰ অতি মূল্যৱান খেলুৱৈ (১): ২০০৮
• নেহৰু কাপত সৰ্বাধিক গ'ল দিওঁতা (১): ২০১২
• SAFF চেম্পিয়নশ্বিপত সৰ্বাধিক গ'ল দিওঁতা (১): ২০১১
• SAFF চেম্পিয়নশ্বিপত প্ৰতিযোগিতাৰ শ্ৰেষ্ঠ খেলুৱৈ (১): ২০১১