সম্ভাৱনা শেঠ

সম্ভাৱনা শেঠ (জন্ম: ১২ ডিচেম্বৰ ১৯৮০) (ইংৰাজী ভাষা: Sambhavna Seth) এগৰাকী ভাৰতীয় অভিনেত্ৰী, মডেল, নৃত্যশিল্পী আৰু ভ্লগাৰ। তেওঁ ভোজপুৰী ভাষা আইটেম গীতত কৰা প্ৰদৰ্শনৰ বাবে সৰ্বাধিক পৰিচিত। তেওঁ বিগ বছ ২,^১ ৰাজ পিছলে জনম কা,^২ দিল জিন্দেগী দেশী গাৰ্ল, ফিয়েৰ ফেক্টৰ: খতৰো কে খিলাড়ী ৪,^৩ ৱেলকাম – বাজী মেহমান নাৱাজী কী,^৪ বিগ বছ হল্লা বল আদি বিভিন্ন ৰিয়েলিটি শ্ব’ত অংশগ্ৰহণ কৰিছে। ইয়াৰ উপৰি তেওঁ ৰজিয়া চুলতান, গুড়িয়া হামাৰী চভী পে ভাৰী আদি কেইবাখনো হিন্দী ধাৰাবাহিকৰ অংশ হৈছে। তেওঁ কালৰ্ছ টিভিৰ ৰিয়েলিটি শ্ব’ ডান্সিং কুইনত অংশগ্ৰহণ কৰি বিজয়ী হিচাপে পৰিগণিত হৈছিল।^৫

প্ৰাৰম্ভিক জীৱন আৰু শিক্ষা

শেঠৰ জন্ম হৈছিল ১৯৮০ চনত। তেওঁ মৈত্ৰেয়ী মহাবিদ্যালয়ৰপৰা স্নাতক ডিগ্ৰী সম্পূৰ্ণ কৰে।^৬ দিল্লীত স্নাতক শিক্ষা সমাপ্ত কৰাৰ পাছত তেওঁ মডেল হিচাপে কাম কৰিবলৈ আৰম্ভ কৰে।

কৰ্মজীৱন

বিভিন্ন আইটেম ছঙৰ নৃত্যশিল্পী হিচাপে শেঠে নিজৰ কেৰিয়াৰ আৰম্ভ কৰিছিল। তেওঁ ৰূপ ৰং কী নগৰী, লেংগা মে ভাইৰাছ, নছে নছে উঠাথা, জং আৰু কমৰ জব লচকেলাৰ দৰে কেইবাখনো ভোজপুৰী চলচ্চিত্ৰৰ আইটেম ছঙত অভিনয় কৰিছিল।

তেওঁ হিন্দী ছবি যেনে কিডছ নং ১, ৩৬ চাইনা টাউন আদিতো সৰু চৰিত্ৰত অভিনয় কৰিছে। ইয়াৰ পিছত তেওঁ পাগলপনত অভিনয় কৰে।^৭ পৰৱৰ্তী সময়ত তেওঁ আজ কাল তেৰে মেৰে প্যাৰ কে চৰ্চে আৰু বলিয়াঁকে ধৰি বিভিন্ন আইটেম ছঙত নৃত্য পৰিৱেশন কৰিছিল।

২০০৮ চনত তেওঁ কালৰ্ছ চেনেলত সম্প্ৰচাৰিত ৰিয়েলিটি টিভি শ্ব’ বিগ বছত অংশগ্ৰহণ কৰে। অনুষ্ঠানটোত থকাৰ সময়ত তেওঁৰ তৰ্ক-বিতৰ্ক আৰু ৰাজা চৌধুৰীৰ সৈতে হোৱা এটা চুমাৰ বাবে তেওঁ চৰ্চালৈ আহিছিল।^৮

বিগ বছৰ পিছত তেওঁ ৰাজ পিছলে জনম কা, দিল জিন্দেগী দেশী গাৰ্ল আৰু ৱেলকাম – বাজী মেহমান নাৱাজী কীৰ দৰে আন আন ৰিয়েলিটি শ্ব’ত অংশগ্ৰহণ কৰিছে।

২০০৯ চনত তেওঁ কালৰ্ছ টিভিৰ ৰিয়েলিটি শ্ব’ ডান্সিং কুইনত অংশগ্ৰহণ কৰি বিজয়ী হিচাপে পৰিগণিত হয়।^৯

২০১১ চনত তেওঁ ষ্টাণ্ট ভিত্তিক ৰিয়েলিটি টিভি শ্ব’ ফিয়েৰ ফেক্টৰ: খতৰো কে খিলাড়ী ৪ত অংশগ্ৰহণ কৰি ১৩ নম্বৰ স্থান লাভ কৰে।^১০

পাছলৈ তেওঁ এগৰাকী প্ৰতিযোগী হিচাপে বিগ বছ হল্লা বলত প্ৰৱেশ কৰে। অনুষ্ঠানটো পৰিচালনা কৰিছিল ফাৰাহ খানে।

২০১৯ চনত তেওঁ অল্ট বালাজীৰ প্ৰথম ভোজপুৰী ড্ৰামা হিৰো ৱৰ্দিৱালাৰ জৰিয়তে ৱেব ছিৰিজত আত্মপ্ৰকাশ কৰে।^১১

ব্যক্তিগত জীৱন

শেঠে ২০১৬ চনৰ জুলাই মাহত তেওঁৰ দীৰ্ঘদিনীয়া প্ৰেমিক অবিনাশ দ্বিবেদীৰ সৈতে বিবাহপাশত আবদ্ধ হয়।^১২

শেঠে 'সম্ভাৱনা শেঠ এণ্টাৰটেইনমেণ্ট' নামৰ এটা ইউটিউব চেনেল চলায়, যিটো তেওঁ স্বামী অবিনাশ দ্বিবেদীৰ সৈতে পৰিচালনা কৰে। এই চেনেলটোত দৈনন্দিন জীৱনৰ ভ্লগ, জীৱন-শৈলী আৰু ভ্ৰমণ সম্পৰ্কীয় বিষয়-বস্তুৰ লগতে পৰিয়ালকেন্দ্ৰিক ভিডিঅ' প্ৰদৰ্শিত হয় আৰু ইয়াত প্ৰায়ে তেওঁলোকৰ প পোহনীয়া কুকুৰ ক'ক', চেৰী আৰু কেণ্ডীক দেখিবলৈ পোৱা যায়।^১৩

২০১৪ চনৰ ২৬ জুলাইত আৰম্ভ হোৱা এই চেনেলটোৱে বছৰ বছৰ ধৰি যথেষ্ট জনপ্ৰিয়তা অৰ্জন কৰিছে আৰু ৩.৭ নিযুততকৈও অধিক চাবস্ক্ৰাইবাৰ লাভ কৰিছে, যাৰ ফলত ই ভাৰতৰ অন্যতম প্ৰধান চেলিব্ৰিটি ভ্লগিং চেনেল হিচাপে পৰিগণিত হৈছে। ইয়াৰ বিষয়-বস্তুৱে মূলতঃ দৈনন্দিন কাম-কাজ, উৎসৱ-পাৰ্বণ, ভ্ৰমণৰ অভিজ্ঞতা আৰু শেঠৰ ব্যক্তিগত জীৱনৰ নেপথ্যৰ মুহূৰ্তসমূহ নথিভুক্ত কৰে।^১৪

বাহ্যিক সংযোগ

• Sambhavna Seth at ইণ্টাৰনেট মুভি ডাটাবেছ