সঞ্জনা সাংঘী

সঞ্জনা সাংঘী (Sanjana Sanghi; জন্ম: ২ ছেপ্টেম্বৰ ১৯৯৬) এগৰাকী ভাৰতীয় অভিনেত্ৰী আৰু মডেল। তেওঁ মূলতঃ হিন্দী চলচ্চিত্ৰত অভিনয় কৰে। তেওঁ ২০১১ চনৰ ৰকষ্টাৰ ছবিত এগৰাকী শিশু শিল্পী হিচাপে অভিনয়েৰে চলচ্চিত্ৰ জগতত খোজ দিয়ে।^১ পিছলৈ কেইটামান পাৰ্শ্ব চৰিত্ৰত অভিনয় কৰাৰ পিছত ৰোমাণ্টিক নাট্যধৰ্মী ছবি দিল বেচাৰা (২০২০)ত অভিনয়েৰে তেওঁ সাফল্য অৰ্জন কৰিছিল। ইয়াৰ পিছত সাংঘীয়ে ৰাষ্ট্ৰ কৱচ ওম (২০২২), ধক ধক (২০২৩) আৰু কড়ক সিং (২০২৩) আদিৰ দৰে ছবিসমূহত অভিনয় কৰে।^২৩

প্ৰাৰম্ভিক জীৱন

১৯৯৬ চনৰ ২ ছেপ্টেম্বৰ তাৰিখে,^৪৫ ভাৰতৰ দিল্লী চহৰত ব্যৱসায়ী সন্দীপ সাংঘী আৰু গৃহিণী শ্বগুনৰ গৃহত সঞ্জনা সাংঘীয়ে জন্মগ্ৰহণ কৰিছিল।^৬ তেওঁৰ ভায়েকৰ নাম সুমেৰ।^৭ দিল্লীৰ মডাৰ্ণ স্কুলত স্কুলীয়া শিক্ষা সমাপ্ত কৰি তেওঁ ২০১৭ চনত দিল্লীৰ লেডী শ্ৰী ৰাম কলেজৰ পৰা সাংবাদিকতা আৰু গণসংযোগ বিষয়ত স্নাতক ডিগ্ৰী লাভ কৰে।^৮

কৰ্মজীৱন

প্ৰাৰম্ভিক কাম (২০১১–২০১৭)

২০১১ চনত ইমতিয়াজ আলীৰ ৰোমাণ্টিক নাট্যধৰ্মী ছবি ৰকষ্টাৰত অভিনয়েৰে সাংঘীয়ে ছবিজগতত আত্মপ্ৰকাশ কৰিছিল। স্কুলৰ মঞ্চত অভিনয় কৰা দেখি মুকেশ ছাব্ৰাই তেওঁক অভিনয়ৰ বাবে নিৰ্বাচিত কৰিছিল।^৯ তেওঁ ২০১৬ চনত বাৰ বাৰ দেখো নামৰ ছবিখনত জয়ৰ শ্ৰেণীকোঠাৰ এগৰাকী স্কুলীয়া ছাত্ৰীৰ চৰিত্ৰত অভিনয় কৰিছিল। তেওঁ ২০১৭ চনত ফুক্ৰে ৰিটাৰ্ণছ নামৰ ছবিখনত কেটীৰ চৰিত্ৰত অভিনয় কৰিছিল। তেওঁ সেই বছৰৰে হিন্দী মিডিয়াম নামৰ ছবিখনত ছাবা কমৰৰ সৰুকালৰ চৰিত্ৰটিত অভিনয় কৰিছিল।^১০১১

মুখ্য ভূমিকা (২০১৮–বৰ্তমান)

২০১৮ চনত, তেওঁ দিল বেচাৰা নামৰ ছবিখনৰ মুখ্য চৰিত্ৰত অভিনয় কৰিছিল, যʼত তেওঁ অভিনেতা সুশান্ত সিং ৰাজপুতৰ বিপৰীতে অভিনয় কৰিছিল। ছবিখন আমেৰিকীয় উপন্যাস দ্য ফল্ট ইন আৱাৰ ষ্টাৰ্ছৰ আধাৰত নিৰ্মিত হৈছিল।^১২ ২০২০ চনত ডিজনী+ হটষ্টাৰত ছবিখনে মুক্তি লাভ কৰিছিল।^১৩

ইয়াৰ পিছত সাংঘীয়ে কপিল ভাৰ্মা পৰিচালিত একচন নাট্যধৰ্মী ছবি ৰাষ্ট্ৰ কৱচ ওমত আদিত্য ৰায় কাপুৰৰ বিপৰীতে অভিনয় কৰে।^১৪ ২০২২ চনৰ জুলাই মাহত এই ছবিখনে মুক্তি লাভ কৰে।^১৫ ২০২৩ চনত তেওঁ ধক ধক আৰু কড়ক সিং শীৰ্ষক দুখন চলচ্চিত্ৰত অভিনয় কৰে।^১৬

অন্যান্য কাম

তনিষ্ক, কেডবেৰী, এয়াৰচে'ল, কোকাকোলা, মিন্ত্ৰা আৰু ডাবৰৰ দৰে কোম্পানীসমূহৰ বিজ্ঞাপনতো তেওঁক দেখা গৈছে।

চলচ্চিত্ৰপুঞ্জী

চলচ্চিত্ৰ

সংগীত ভিডিঅʼ

বঁটা আৰু মনোনয়ন