শ্ৰুতি শেঠ

শ্ৰুতি শেঠ (জন্ম: ১৯৭৭) এগৰাকী ভাৰতীয় অভিনেত্ৰী আৰু ভিডিঅ' জকী। এগৰাকী টেলিভিছন অনুষ্ঠানৰ পৰিচালিকা হিচাপে নিজৰ কেৰিয়াৰ আৰম্ভ কৰি তেওঁ কেইবাটাও টেলিভিছন শ্ব' আৰু হিন্দী চলচ্চিত্ৰ উদ্যোগত এগৰাকী কৌতুক অভিনেত্ৰী হিচাপে ব্যাপক পৰিচিতি লাভ কৰিছিল।

মহাৰাষ্ট্ৰৰ মুম্বাইত জন্মগ্ৰহণ কৰা আৰু ডাঙৰ-দীঘল হোৱা শেঠে মুম্বাইৰ চেইণ্ট জেভিয়াৰ্চ কলেজৰপৰা অৰ্থনীতি বিষয়ত স্নাতক ডিগ্ৰী লাভ কৰে। তেওঁ মডেলিং কেৰিয়াৰত ভৰি দিয়ে আৰু চেনেল ভি (Channel V)-ৰ বাবে টেলিভিছন শ্ব'ৰ আঁত ধৰিবলৈ আৰম্ভ কৰে। তেওঁৰ কেৰিয়াৰত এক গুৰুত্বপূৰ্ণ মোৰ আহে যেতিয়া তেওঁ ষ্টাৰ প্লাছৰ কমেডী ধাৰাবাহিক শৰাৰত (২০০৩–০৬)-ত এগৰাকী কিশোৰী জিয়া মালহোত্ৰাৰ চৰিত্ৰত অভিনয় কৰে। ধাৰাবাহিকখনৰ জনপ্ৰিয়তা বছৰৰ পাছত বছৰ ধৰি বৃদ্ধি পাইছিল আৰু শেঠৰ অভিনয়েও যথেষ্ট প্ৰশংসা বুটলিছিল।

শেঠৰ চলচ্চিত্ৰ জগতত অভিষেক ঘটিছিল ২০০৩ চনত ৱাইচা ভী হোতা হ্যায় পাৰ্ট ২ৰ জৰিয়তে। পৰৱৰ্তী সময়ত তেওঁ অতি জনপ্ৰিয় ছবি — ফানা (২০০৬) আৰু শ্লামডগ মিলিঅ’নিয়াৰ (২০০৮)-ত সহযোগী চৰিত্ৰত অভিনয় কৰি শলাগ লাভ কৰে। শেঠ ডিজনী চেনেলৰ অৰিজিনেল চিৰিজ দা চুইট লাইফ অৱ কৰণ এণ্ড কবীৰত অভিনয় কৰাৰ লগতে কমেডী চাৰ্কাছৰ দৰে টেলিভিছন অনুষ্ঠানৰ আঁত ধৰা কাৰ্য অব্যাহত ৰাখিছে।

ব্যক্তিগত জীৱন

শেঠে অশোক একাডেমীত অধ্যয়ন কৰিছিল আৰু মুম্বাইৰ চেইণ্ট জেভিয়াৰ্চ কলেজৰপৰা অৰ্থনীতি আৰু বাণিজ্য বিষয়ত স্নাতক ডিগ্ৰী লাভ কৰিছিল। তেওঁ চলচ্চিত্ৰ পৰিচালক ডেনিছ আচলামৰ সৈতে বিবাহপাশত আবদ্ধ হয়^১ আৰু তেওঁলোকৰ আলিনা নামৰ এজনী কন্যা সন্তান আছে।^২ শেঠ পঞ্জাবী হিন্দু মূলৰ লোক।^৩

ভাৰতৰ প্ৰধানমন্ত্ৰী নৰেন্দ্ৰ মোদীয়ে তেওঁৰ মন কী বাত ৰেডিঅ' অনুষ্ঠানত মহিলা আৰু কন্যাসকলৰ বাবে ঘোষণা কৰা #selfiewithdaughter অভিযানৰ সমালোচনা কৰি আচলামে টুইটাৰত কৰা মন্তব্যক কেন্দ্ৰ কৰি এক বিতৰ্কৰ সৃষ্টি হৈছিল। ইয়াৰ পিছতে টুইটাৰ আৰু ছচিয়েল মিডিয়াৰ জৰিয়তে তেওঁ অপমানজনক বাক্যবাণৰ সন্মুখীন হবলগীয়া হয়। ইয়াৰ ফলস্বৰূপে সংবাদ মাধ্যম আৰু বলীউডৰ একাংশই সেই দুৰ্ব্যৱহাৰৰ বিৰুদ্ধে থিয় দি তেওঁক সমৰ্থন জনাইছিল।^৪৫৬৭