শ্বেতা মেনন

শ্বেতা মেনন (ইংৰাজী ভাষা: Shwetha Menon; জন্ম: ২৩ এপ্ৰিল ১৯৭৪) এগৰাকী ভাৰতীয় অভিনেত্ৰী, মডেল, টেলিভিছন এংকৰ আৰু সৌন্দৰ্য প্ৰতিযোগিতাৰ খিতাপধাৰী। তেওঁ ‘ফেমিনা মিছ ইণ্ডিয়া এছিয়া পেচিফিক ১৯৯৪’ জয় কৰিছিল। তেওঁ মূলতঃ মালয়ালম, তামিল, তেলুগু আৰু হিন্দী ছবিত অভিনয় কৰিছে। তেওঁ শ্ৰেষ্ঠ অভিনেত্ৰীৰ দুটাকৈ কেৰালা ৰাজ্যিক চলচ্চিত্ৰ বঁটা আৰু দুটাকৈ ফিল্মফেয়াৰ বঁটা (দক্ষিণ) লাভ কৰিছে। তেওঁ ‘বিগ বছ মালয়ালম ছিজন ১’-ত অংশগ্ৰহণ কৰিছিল।^১২

নব্বৈৰ দশকৰ আৰম্ভণিতে মালয়ালম ছবিত অভিনেত্ৰী হিচাপে কেৰিয়াৰ আৰম্ভ কৰি তেওঁ মডেলিং জগতত ভৰি দিয়ে। কেইবাখনো সৌন্দৰ্য প্ৰতিযোগিতাত অংশ লৈ জয়ী হোৱাৰ পিছত তেওঁ হিন্দী চলচ্চিত্ৰত আত্মপ্ৰকাশ কৰে। তেওঁৰ উল্লেখযোগ্য হিন্দী ছবিসমূহ আছিল ‘ইস্ক’ (১৯৯৭) আৰু ‘বন্ধন’ (১৯৯৮)। ৩০খনতকৈও অধিক হিন্দী ছবিত অভিনয় কৰাৰ পাছত (য’ত তেওঁ সাধাৰণতে গ্লেমাৰাছ চৰিত্ৰত অভিনয় কৰিছিল), ২০০০ চনৰ মাজভাগত তেওঁ পুনৰ মালয়ালম চিনেমা জগতলৈ উভতি আহে আৰু শক্তিশালী চৰিত্ৰত অভিনয় কৰিবলৈ আৰম্ভ কৰে।^৩ ‘পলেৰী মাণিক্যম: অৰু পাথীৰাকোলাপথাকাথিন্তে কথা’ (২০০৯) আৰু ‘ছল্ট এন পেপাৰ’ (২০১১) ছবিত আগবঢ়োৱা অভিনয়ৰ বাবে তেওঁ সমালোচকৰ উচ্চ প্ৰশংসা লাভ কৰাৰ লগতে শ্ৰেষ্ঠ অভিনেত্ৰীৰ কেৰালা ৰাজ্যিক চলচ্চিত্ৰ বঁটা লাভ কৰে। ২০১৮ চনত তেওঁ মালয়ালম ৰিয়েলিটি শ্ব’ ‘বিগ বছ’-ত অংশ লয় আৰু জ্যেষ্ঠ অভিনেতা মোহনলালে আঁত ধৰা এই অনুষ্ঠানটোৰ ৩৬টা খণ্ডৰ পিছত বাহিৰ হয়। ইয়াৰ সমান্তৰালভাৱে তেওঁ বাণিজ্যিক ছবি, টেলিভিছন ৰিয়েলিটি শ্ব’ আৰু সমান্তৰাল চলচ্চিত্ৰতো অভিনয় কৰি আহিছে।

শ্বেতা মেনন ২০২৫ চনত ‘এচ’চিয়েচন অৱ মালয়ালম মুভি আৰ্টিষ্টছ’ (AMMA)-ৰ সভাপতি হিচাপে নিৰ্বাচিত হয় আৰু এই সংস্থাটোৰ প্ৰথমগৰাকী মহিলা সভাপতি হিচাপে পৰিগণিত হয়।^৪৫

প্ৰাৰম্ভিক জীৱন

শ্বেতা মেননৰ জন্ম ১৯৭৪ চনৰ ২৩ এপ্ৰিলত চণ্ডীগড়ত হৈছিল। তেওঁৰ পিতৃ-মাতৃ আছিল কেৰালাৰ মালাপ্পুৰম জিলাৰ ভালানছেৰীৰ মালয়ালী দম্পতী টি. ভি. নাৰায়ণনকুট্টী আৰু সাৰদা মেনন। তেওঁৰ পিতৃয়ে ভাৰতীয় বায়ুসেনাত সেৱা আগবঢ়াইছিল আৰু মাতৃ এগৰাকী গৃহিনী আছিল। তেওঁ কোজিকোডৰ ইষ্ট হিলস্থিত ১ নম্বৰ কেন্দ্ৰীয় বিদ্যালয়ত পঢ়া-শুনা কৰিছিল।^৬

ব্যক্তিগত জীৱন

শ্বেতা প্ৰথমে বলিউডৰ মডেল ববী ভোচলেৰ সৈতে বিবাহপাশত আবদ্ধ হৈছিল, কিন্তু তেওঁলোকৰ বিবাহ বিচ্ছেদ ঘটে।^৭ ২০১১ চনৰ ১৮ জুনত তেওঁ মুম্বাইত কৰ্মৰত ত্ৰিচুৰৰ নিবাসী শ্ৰীবলছন মেননৰ সৈতে বিবাহপাশত আবদ্ধ হয়। কেৰালাৰ ভালানছেৰীস্থিত নেইথালাপ্পুৰথ শাস্তা আয়েপ্পা মন্দিৰত এই বিবাহ অনুষ্ঠান সম্পন্ন হৈছিল।^৮ তেওঁৰ এগৰাকী কন্যা সন্তান আছে। ‘কালিমান্নু’ নামৰ ছবিখনৰ অংশ হিচাপে তেওঁৰ সন্তান প্ৰসৱৰ দৃশ্য কেমেৰাত বন্দী কৰা হৈছিল।^৯

বাহ্যিক সংযোগ

• Official website