শ্বীমা কেৰমানী

শ্বীমা কেৰমানী (Sheema Kermani; জন্ম: ১৬ জানুৱাৰী ১৯৫১) এগৰাকী পাকিস্তানী শাস্ত্ৰীয় নৃত্যশিল্পী আৰু সমাজ কৰ্মী।^১ তেখেত তেহৰিক-ই-নিছৱান কালচাৰেল একচন গ্ৰুপ (মহিলা আন্দোলন)ৰ প্ৰতিষ্ঠাপক।^২ তেখেত ভাৰতনাট্যম নৃত্যৰ প্ৰতিনিধিও।^৩৪ কেৰমানী পাকিস্তানৰ কৰাচীত বাস কৰা এগৰাকী প্ৰখ্যাত শাস্ত্ৰীয় নৃত্যশিল্পী, নৃত্য পৰিচালক, নৃত্য গুৰু, নাট্য অনুশীলনকাৰী, অভিনেত্ৰী, পৰিচালক, প্ৰযোজক, টিভি অভিনেত্ৰী৷ তেওঁ সংস্কৃতি, নাৰীৰ অধিকাৰকে^৫ প্ৰমুখ্য কৰি শান্তিৰ বিষয়সমূহৰ পোষকতা কৰে।

প্ৰাৰম্ভিক জীৱন আৰু শিক্ষা

১৯৫১ চনৰ ১৬ জানুৱাৰীত পঞ্জাৱৰ ৰাৱালপিণ্ডিত কেৰমানীয়ে জন্মগ্ৰহণ কৰিছিল। তেওঁৰ পিতৃয়ে পাকিস্তান সেনাবাহিনীত কাৰ্যনিৰ্বাহ কৰিছিল আৰু ব্ৰিগেডিয়াৰ হিচাপে অৱসৰ গ্ৰহণ কৰিছিল৷ তাৰ পিছত তেওঁ কৰাচী ইলেক্ট্ৰিক চাপ্লাই কৰ্প'ৰেশ্যনৰ অধ্যক্ষ হিচাপে নিযুক্তি লাভ কৰিছিল।^৬৭ তেওঁৰ পৈতৃক পৰিয়াল লক্ষ্ণৌ চহৰৰ৷ আৰু ইয়াৰ বংশ ইৰাণৰ কেৰমান চহৰৰ লগত সংপৃক্ত৷ আনহাতে তেওঁৰ মাতৃৰ পৰিয়ালৰ হায়দৰাবাদ ডেক্কানৰ।^৭

কেৰমানীৰ দুগৰাকী ভাই-ভনী আছে৷^৭ তেওঁ পাকিস্তানৰ বিভিন্ন চহৰৰ কনভেণ্ট স্কুলৰ পৰা শিক্ষা লাভ কৰে য'ত তেওঁৰ পিতৃ কিছুমান বিশেষ পদত অধিষ্ঠিত আছিল।^৭স্কুলৰ ছুটীৰ সময়ত কেৰমানীয়ে ভাৰতত বাস কৰা মাতৃৰ ফালৰ পৰা ককা-আইতাকক লগ কৰিবলৈ গৈছিল আৰু তাতেই তেওঁৰ পৰিৱেশন কলাৰ প্ৰতি আগ্ৰহ গঢ় লৈ উঠিছিল।^৭

সামাজিক সক্ৰিয়তা

কেৰমানীয়ে নিজকে নাৰীবাদী আৰু মাৰ্ক্সবাদী হিচাপে পৰিচয় দিয়ে।^৭ তেওঁ উপলব্ধি কৰিছিল যে পাকিস্তানী সমাজৰ মহিলাসকলে সমাজত সমতা লাভ কৰিব নোৱাৰে গতিকে তেওঁ 'তেহৰিক-ই-নিছৱান' (মহিলা আন্দোলন) নামৰ এক আন্দোলন আৰম্ভ কৰিছিল আৰু তেওঁলোকৰ অধিকাৰ, স্বাস্থ্যজনিত বিষয়, শিক্ষা আৰু সমতাৰ বাবে মাত মাতিছিল।^৮