মোনা সিং

মোনা সিং (ইংৰাজী ভাষা: Mona Singh; জন্ম: ৮ অক্টোবৰ ১৯৮১) এগৰাকী ভাৰতীয় অভিনেত্ৰী যিয়ে হিন্দী ভাষা চলচ্চিত্ৰ আৰু ধাৰাবাহিকত কাম কৰে। সিঙে বিশেষকৈ ধাৰাবাহিক জছী জৈছী কোই নহীঁ (২০০৩–২০০৬)-ত কৰা অভিনয়ৰ বাবে পৰিচিতি লাভ কৰিছে। তেওঁ দুটাকৈ ইণ্ডিয়ান টেলিভিছন একাডেমী বঁটা (ITA Awards) আৰু এটা ফিল্মফেয়াৰ অ’টিটি বঁটা লাভ কৰিছে।^১

সিং ৰিয়েলিটী শ্ব' ঝলক দিখলা যা-ৰ প্ৰথম ছিজনত অংশগ্ৰহণ কৰি জয়ী হোৱাৰ বাবেও পৰিচিত। ইয়াৰ উপৰি তেওঁ ক্যা হুয়া তেৰা ৱাদা-ত মোনা চোপ্ৰা, প্যাৰ কো হো জানে দো-ত প্ৰীত সিং আৰু কৱচ... কালী শক্তিযোঁ চে-ত পৰিধি বুন্দেলাৰ চৰিত্ৰত অভিনয় কৰিছে। ৰাজকুমাৰ হিৰাণীৰ কমেডী-ড্ৰামা ৩ ইডিয়টচ (২০০৯)-ত এটা সহযোগী চৰিত্ৰৰ জৰিয়তে তেওঁ চলচ্চিত্ৰ জগতত আত্মপ্ৰকাশ কৰে, যিখন সৰ্বকালৰ সৰ্বাধিক উপাৰ্জনকাৰী ভাৰতীয় চলচ্চিত্ৰসমূহৰ ভিতৰত অন্যতম। সিঙে কেহনে কো হমচফৰ হ্যায় (২০১৮)-ৰ জৰিয়তে ৱেব জগতলৈ বিস্তাৰিত হয় আৰু য়ে মেৰী ফেমিলী (২০১৮) তথা মেড ইন হেভেন (২০২৩)-ৰ বাবে প্ৰশংসা বুটলিবলৈ সক্ষম হয়। পিছৰখন ধাৰাবাহিকৰ বাবে তেওঁ ড্ৰামা ছিৰিজৰ শ্ৰেষ্ঠ সহযোগী অভিনেত্ৰীৰ ফিল্মফেয়াৰ অ’টিটি বঁটা লাভ কৰে।

জীৱন আৰু পৰিয়াল

১৯৮১ চনৰ ৮ অক্টোবৰত চণ্ডীগড়ৰ এটা শিখ পৰিয়ালত মোনা সিঙৰ জন্ম হৈছিল।^২

কৰ্মজীৱন

টেলিভিছন কেৰিয়াৰ

চিঙে প্ৰথমবাৰৰ বাবে হিন্দী টেলিভিছনত ছনী এণ্টাৰটেইনমেণ্ট টেলিভিছনৰ ধাৰাবাহিক জছী জৈছী কোই নহীঁ (২০০৩–২০০৬)-ৰ জৰিয়তে আত্মপ্ৰকাশ কৰিছিল।^৩ এই শ্ব’টোৱে তেওঁক ঘৰে ঘৰে পৰিচিত কৰি তুলিছিল আৰু তেওঁ অপ্সৰা বঁটা, ইণ্ডিয়ান ট্ৰেলী এৱাৰ্ডছ আৰু ইণ্ডিয়ান টেলিভিছন একাডেমী বঁটাৰ দৰে সন্মান লাভ কৰিছিল।^৪

২০০৬ চনত তেওঁ ৰিয়েলিটী শ্ব’ ঝলক দিখলা যা ১-ত অংশগ্ৰহণ কৰি জয়ী হয়।^৫ তেওঁ ২০০৭ চনত ফেমিনা মিছ ইণ্ডিয়া আৰু ঝলক দিখলা যা ২ পৰিচালনা কৰিছিল আৰু ইয়াৰ পিছত ২০০৮ চনত এক খিলাড়ী এক হাছিনাত অংশগ্ৰহণ কৰি জয়ী হৈছিল।^৬

তাৰ পিছত সিঙে একতা কাপুৰৰ বেনাৰ বালাজী টেলিফিল্মছৰ সৈতে একেলেঠাৰি চাৰিখন ধাৰাবাহিকৰ প্ৰথমখন এনডিটিভি ইমাজিনৰ ৰাধা কি বেটিয়া কুছ কৰ দিখায়েংগীত অভিনয় কৰিছিল, য’ত তেওঁ ২০০৮ চনৰপৰা ২০০৯ চনলৈ ৰৌনক মখিজাৰ চৰিত্ৰত অভিনয় কৰিছিল। তেওঁ এণ্টাৰটেইনমেণ্ট কে লিয়ে কুছ ভি কৰেগা (২০০৯), ঝলক দিখলা যা ৪ (২০১০), শাদী ৩ কোটি কি (২০১০), ষ্টাৰ ইয়া ৰকষ্টাৰ (২০১১) আৰু চিআইডি বীৰতা এৱাৰ্ডছ (২০১২) পৰিচালনা কৰিছিল আৰু মিঠী চুৰী নং ১ (২০১০)-ত অংশগ্ৰহণকাৰী আছিল।^৭

ধাৰাবাহিকলৈ পুনৰ উভতি আহি তেওঁ ২০১২ চনত কাপুৰৰদ্বাৰা প্ৰযোজিত ছনী এণ্টাৰটেইনমেণ্ট টেলিভিছনৰ ক্যা হুয়া তেৰা ৱাদা-ত মোনা নামৰ এগৰাকী পত্নীৰ চৰিত্ৰত অভিনয় কৰিছিল, য’ৰ পৰিপ্ৰেক্ষিতত স্বামীয়ে তেওঁক প্ৰাক্তন প্ৰেমিকাৰ সৈতে থকা অবৈধ সম্পৰ্কৰ বাবে ত্যাগ কৰে। ধাৰাবাহিকখন ২০১৩ চনত শেষ হৈছিল আৰু তাৰ পিছত তেওঁ টেলিভিছনৰপৰা কিছু বিৰতি লৈছিল।^৮

দু বছৰৰ পাছত সিঙে ২০১৫ চনৰ অক্টোবৰ মাহত কাপুৰৰদ্বাৰা প্ৰযোজিত তৃতীয়খন ধাৰাবাহিক প্যাৰ কো হো জানে দো-ৰ জৰিয়তে টেলিভিছনলৈ উভতি আহে, য’ত তেওঁ পিতৃ-মাতৃক হেৰুওৱা এগৰাকী মহিলা প্ৰীত সিঙৰ চৰিত্ৰত অভিনয় কৰিছিল।^৯ কম টিআৰপিৰ বাবে ২০১৬ চনৰ জানুৱাৰী মাহত তিনি মাহৰ ভিতৰতে প্যাৰ কো হো জানে দো বন্ধ হৈ যায়।^১০ পিছলৈ ২০১৬ চনত তেওঁ কাপুৰৰ অতিপ্ৰাকৃতিক ধাৰাবাহিক কৱচ...কালী শক্তিযোঁ চে-ত পৰিধিৰ চৰিত্ৰত অভিনয় কৰে আৰু কমেডী নাইটছ বাচাও-ৰ আঁত ধৰে।^১১

২০২১ চনৰ ছেপ্টেম্বৰ মাহত তেওঁ এণ্ড টিভিৰ শ্ব’ মৌকা-এ-বাৰদাত পৰিচালনা কৰিছিল।^১২

ৱেব ধাৰাবাহিক কেৰিয়াৰ

২০১৮ চনত সিঙে কেহনে কো হমচফৰ হ্যায়-ত অনন্যাৰ চৰিত্ৰত অভিনয় কৰি ৱেব জগতত খোজ পেলায়।^১৩ সেই বছৰতে তেওঁ দ্য ভাইৰেল ফিভাৰ আৰু নেটফ্লিক্স ধাৰাবাহিক য়ে মেৰী ফেমিলী-তো অভিনয় কৰিছিল।^১৪ ২০১৯ চনত তেওঁক জি-ফাইভ (ZEE5) আৰু অল্ট বালাজীৰ ধাৰাবাহিক মিছন অভাৰ মাৰ্চ-ত দেখা গৈছিল।^১৫ ইয়াৰ পিছত তেওঁ জি-ফাইভৰ ব্লেক উইড'জ-ত অভিনয় কৰে।^১৬

২০২৩ চনত সিঙে জয়া আখতাৰৰ দ্বাৰা নিৰ্মিত মেড ইন হেভেন-ত বুলবুল জৌহৰীৰ চৰিত্ৰত অভিনয় কৰে। এই ধাৰাবাহিকত তেওঁ এগৰাকী অডিটৰৰ চৰিত্ৰত অভিনয় কৰিছিল যিয়ে কোম্পানীটোক ধাৰৰ পৰা মুক্ত কৰিবলৈ চেষ্টা কৰাৰ লগতে নিজৰ পুত্ৰৰ বিৰুদ্ধে চলা এটা আৰক্ষীৰ গোচৰো চম্ভালে। এই চৰিত্ৰটোৰ বাবে তেওঁ সমালোচক আৰু দৰ্শক উভয়ৰে পৰা উচ্চ প্ৰশংসা লাভ কৰে।^১৭১৮ ইয়াৰ পিছত সিঙক নেটফ্লিক্সৰ কালা পানী-ত এগৰাকী চিকিৎসকৰ এক চুটি অথচ গুৰুত্বপূৰ্ণ চৰিত্ৰত দেখা যায়।^১৯ সমালোচকসকলে তেওঁৰ অভিনয়ক আদৰণি জনায়।^২০ ২০২৫ চনত তেওঁ দ্য বাষ্টাৰ্ডছ অৱ বলীউড-ত এক গুৰুত্বপূৰ্ণ চৰিত্ৰত অভিনয় কৰে।^২১ ২০২৬ চনত তেওঁ কোহৰা ধাৰাবাহিকৰ দ্বিতীয় ছিজনত মুখ্য চৰিত্ৰত অভিনয় কৰে। তেওঁৰ অভিনয়ত মুগ্ধ হৈ দ্য হিন্দু-ৰ অনুজ কুমাৰে লিখিছে, "আৰক্ষীৰ পোছাক পিন্ধা এগৰাকী শোকাতুৰ মাতৃ হিচাপে মোনা সিং এক শক্তিশালী বিস্ফোৰণৰ বাবে সাজু হৈ থকা শক্তিৰ উৎসস্বৰূপ।"^২২২৩

চলচ্চিত্ৰ কেৰিয়াৰ

২০০৯ চনত ৰাজকুমাৰ হিৰাণীৰ হিন্দী ব্যংগাত্মক কমেডী ৩ ইডিয়টচ-ত মোনা সহস্ৰবুদ্ধে নামৰ সহযোগী তথা গুৰুত্বপূৰ্ণ চৰিত্ৰটোৰ জৰিয়তে সিঙে চলচ্চিত্ৰ জগতত আত্মপ্ৰকাশ কৰে। এই ছবিখন বিশ্বজুৰি প্ৰায় উপাৰ্জনেৰে অন্যতম সৰ্বাধিক উপাৰ্জনকাৰী ভাৰতীয় চলচ্চিত্ৰ হিচাপে পৰিগণিত হয়।^২৪ ইয়াৰ পিছত তেওঁ উট পতাং, জেড প্লাছ আৰু অমাবাস-ত অভিনয় কৰে।^{২৫২৬২৭২৮২৯৩০}

২০২২ চনত তেওঁ আমিৰ খানৰ লাল সিং চড্ডা-ত অভিনয় কৰে, য’ত তেওঁ নায়কৰ মাতৃৰ চৰিত্ৰত অভিনয় কৰিছিল। আমিৰ খানতকৈ ১৬ বছৰ সৰু হোৱা সত্ত্বেও সিঙে নিজৰ চৰিত্ৰটোৰ সমৰ্থনত কয়, "মই আমিৰ খানৰ মাতৃৰ চৰিত্ৰত অভিনয় কৰা নাই, মই লালৰ মাতৃৰ চৰিত্ৰতহে অভিনয় কৰিছোঁ।"^৩১