মাইনা নন্দিনী

মাইনা নন্দিনী (জন্ম: ২১ মে')^১ এগৰাকী ভাৰতীয় অভিনেত্ৰী আৰু টেলিভিছন ব্যক্তিত্ব, যিয়ে প্ৰধানকৈ তামিল ভাষা চলচ্চিত্ৰ আৰু টেলিভিছন অনুষ্ঠানত অভিনয় কৰে। তেওঁ সাৰাভানান মীনাক্ষী (দ্বিতীয় ছিজন)ত মাইনা ৰেৱতী, চিন্না থাম্বীত আলাবাৰাই মাইনা আৰু বিশেষকৈ অৰণমণৈ ৩ (২০২১)ত ময়নাবতীৰ চৰিত্ৰত কৰা অভিনয়ৰ বাবে পৰিচিত।^২ তেওঁ ২০১৫ চনত ষ্টাৰ বিজয়ত সম্প্ৰচাৰিত হোৱা ৰন্ধন বিষয়ক অনুষ্ঠান কিচেন ছুপাৰ ষ্টাৰ (তৃতীয় ছিজন)ৰ বিজয়ী আছিল। ২০২২ চনত তেওঁ এগৰাকী প্ৰতিযোগী হিচাপে বিগ বছ (তামিল ছিজন ৬)ত অংশগ্ৰহণ কৰিছিল।^৩

তেওঁ বিশেষকৈ ভমছম (২০১০), কেডী বিল্লা খিলাড়ী ৰংগা (২০১৩), ৰোমিঅ' জুলিয়েট (২০১৫), কাঞ্চনা ৩ (২০১৯), নাম্মা ভেট্টু পিল্লাই (২০১৯), পেট্ৰ'মেক্স (২০১৯), অৰণমণৈ ৩ (২০২১) আৰু বিক্ৰম (২০২২) আদিৰ দৰে ছবিত অভিনয় কৰাৰ বাবে পৰিচিত।

প্ৰাৰম্ভিক জীৱন

তামিলনাডুৰ মাদুৰাইৰ এখন ভিতৰুৱা চহৰত ২১ মে'ত ৰাজেন্দ্ৰন আৰু ৰাণীৰ ঔৰসত নন্দিনী ৰাজেন্দ্ৰনৰ জন্ম হৈছিল। নন্দিনীয়ে মাদুৰাইৰ মীনাক্ষী মেট্ৰিকুলেচন স্কুল আৰু আন্না নগৰৰ আম্বিকা কলেজ অৱ আৰ্টছ এণ্ড ছায়েন্সত অধ্যয়ন কৰিছিল, য’ত তেওঁ ব্যৱসায় প্ৰশাসনৰ স্নাতক ডিগ্ৰী সম্পূৰ্ণ কৰিছিল। অৱশ্যে ডিগ্ৰী সম্পূৰ্ণ কৰাৰ পাছত তেওঁ সময় অতিবাহিত কৰাৰ মাধ্যম হিচাপে কেইখনমান টেলিভিছন ধাৰাবাহিকত অভিনয় কৰাৰ সিদ্ধান্ত লৈছিল।

কৰ্মজীৱন

নন্দিনীয়ে তেওঁৰ অভিনয় জীৱনৰ পাতনি মেলিছিল ভেনিলে কাবাডী কুজু নামৰ ছবিখনৰ জৰিয়তে, য’ত তেওঁ এটা নামবিহীন সৰু চৰিত্ৰত অভিনয় কৰিছিল। পিছলৈ তেওঁ ধেমেলীয়া ৰিয়েলিটি শ্ব’ কালক্কা পোভাডু য়াৰুত এগৰাকী প্ৰতিযোগী হিচাপে অংশগ্ৰহণ কৰি টেলিভিছন জগতত আত্মপ্ৰকাশ কৰে। ২০১০ চনত পৰিচালক পাণ্ডিৰাজে তেওঁক ভমছম নামৰ ছবিখনত এটা চৰিত্ৰৰ বাবে প্ৰস্তাৱ দিয়ে। তেওঁ সেই প্ৰস্তাৱত সন্মতি জনায় আৰু ছৰছু নামৰ এটা সহযোগী চৰিত্ৰত অভিনয় কৰে।^৪ ইয়াৰ পিছত তেওঁ কেডী বিল্লা খিলাড়ী ৰংগা (২০১৩), ভেল্লাইক্কাৰা দুৰাই (২০১৪) আৰু ৰোমিঅ' জুলিয়েটৰ দৰে ছবিত অভিনয় কৰে। ২০১৬ চনত তেওঁ সাৰাভানান মীনাক্ষী (তৃতীয় ছিজন) নামৰ ধাৰাবাহিকখনত মুখ্য মহিলা চৰিত্ৰৰ বান্ধৱীৰ চৰিত্ৰত অভিনয় কৰি টেলিভিছন অভিনেত্ৰী হিচাপে কেৰিয়াৰ আৰম্ভ কৰে। ধাৰাবাহিকখনত তেওঁৰ অভিনয়ে যথেষ্ট উচ্চ প্ৰশংসা লাভ কৰিছিল। সেই চৰিত্ৰটোৰ নাম "মাইনা"ৰ বাবেই তেওঁ পিছলৈ যথেষ্ট জনপ্ৰিয় হৈ পৰে।^৫৬ ইয়াৰ উপৰি তেওঁ অমুধা অৰু আচাৰ্যকুৰি, পাণ্ডিয়ান ষ্টোৰ্ছ, অৰণমণৈ কিলি আৰু চিন্না থাম্বীৰ দৰে টেলিভিছন শ্ব’তো অংশ লৈছে। ২০২২ চনত অভিনেতা কমল হাছানে নন্দিনীক তেওঁৰ একচন ধৰ্মী ছবি বিক্ৰমত এটা গুৰুত্বপূৰ্ণ চৰিত্ৰৰ বাবে অনুৰোধ কৰে। তেওঁ এই অফাৰ গ্ৰহণ কৰে আৰু ছবিখনত অভিনেতা বিজয় সেতুপতিৰ বিপৰীতে অভিনয় কৰে।^৭ সেই বছৰৰে শেষৰফালে মুক্তি পোৱা চৰ্দাৰ ছবিত তেওঁ এজন নাট্য শিল্পী হিচাপে এটা কেমিঅ' চৰিত্ৰত অভিনয় কৰে।

তেওঁ ২০২১ চনৰ ৱেব ধাৰাবাহিক নৱেম্বৰ ষ্টৰীত তামান্না, জি এম কুমাৰ আৰু পশুপতিৰ সৈতে এটা গুৰুত্বপূৰ্ণ চৰিত্ৰত অভিনয় কৰিছিল। এই ধাৰাবাহিকখনৰ জৰিয়তে নন্দিনীয়ে ৱেব ধাৰাবাহিক জগতত খোজ পেলাইছিল।

ব্যক্তিগত জীৱন

২০১৭ চনৰ জানুৱাৰী মাহত নন্দিনীয়ে তেওঁৰ দীৰ্ঘদিনীয়া প্ৰেমিক কাৰ্তিকেয়নৰ (কাৰ্তিক) সৈতে বিবাহপাশত আবদ্ধ হয়। অৱশ্যে তেওঁলোকৰ বিবাহৰ ৬ মাহৰ পিছতে দম্পতীহালৰ মাজত হোৱা এক বুজা-বুজিৰ অভাৱৰ বাবে কাৰ্তিকে আত্মহত্যা কৰে। ২০১৯ চনত তেওঁ পুনৰ বিবাহপাশত আবদ্ধ হয়। এইবাৰ তেওঁ টেলিভিছন অভিনেতা তথা কমেডিয়ান যোগেশ্বৰমক বিয়া কৰায় আৰু ২০২০ চনত এই দম্পতীহাল এটি সন্তানৰ পিতৃ-মাতৃ হয়।^{৮৯১০১১} তেওঁ শ্ৰীলংকাৰ কণ্ঠশিল্পী তথা গীতিকাৰ দিনেশ কানাগাৰত্নমৰ খুৰাক/বৰদেউতাকৰ পুত্ৰ।^১২