ভজো

ভজো (ইংৰাজী: Bhojo) অসমৰ চৰাইদেউ জিলাৰ সোণাৰি মহকুমাৰ অন্তৰ্গত এখন গাঁও। গাঁওখনৰ নাম ২০১১ চনৰ লোকপিয়লৰ নথিত ভজো গাঁও হিচাপে উল্লেখ কৰা হৈছে। গাঁওখন সোণাৰি চহৰৰপৰা প্ৰায় ৫–৬ কিলোমিটাৰ দূৰত অৱস্থিত।^১

ভজো অঞ্চলটো ইয়াত থকা ভজো ৰে’ল ষ্টেচনৰ বাবে বিশেষভাৱে পৰিচিত। ৰে’ল ষ্টেচনটো উত্তৰ-পূব সীমান্ত ৰে'লৱেৰ তিনিচুকীয়া ৰে’ল মণ্ডলৰ অন্তৰ্গত।^২

ভূগোল

ভজো চৰাইদেউ জিলাৰ সোণাৰি অঞ্চলত অৱস্থিত। গাঁওখনৰ ভৌগোলিক স্থানাংক প্ৰায় ২৭°৩′৪৯″ উত্তৰ অক্ষাংশ আৰু ৯৫°১′৫৬″ পূব দ্ৰাঘিমাংশ।^৩

২০১১ চনৰ লোকপিয়ল অনুসৰি গাঁওখনৰ মুঠ ভৌগোলিক এলেকা ২৬৪.৪৪ হেক্টৰ।^১

ভজো সোণাৰি চহৰৰ ওচৰত অৱস্থিত। চৰাইদেউ জিলা প্ৰশাসনৰ তথ্য অনুসৰি ভজো ৰে’ল ষ্টেচন জিলা সদৰ সোণাৰিৰপৰা পথযোগে প্ৰায় ৬.৩ কিলোমিটাৰ দূৰত।^৪

প্ৰশাসন

ভজো সোণাৰি মহকুমা আৰু সোণাৰি উন্নয়ন খণ্ডৰ অন্তৰ্গত। গাঁওখন ভজো গাঁও পঞ্চায়তৰ অধীনত স্থানীয়ভাৱে প্ৰশাসিত হয়।^৫

২০১১ চনৰ লোকপিয়লত গাঁওখনৰ লোকপিয়ল গাঁও কোড ২৯৩০২১ হিচাপে নথিভুক্ত কৰা হৈছিল।^৬

জনসংখ্যা

২০১১ চনৰ লোকপিয়ল অনুসৰি ভজো গাঁও আৰু ভজো ৰে’ল ষ্টেচনৰ মুঠ জনসংখ্যা আছিল ১,৫৮৭ জন। ইয়াৰে ৮২৭ জন পুৰুষ আৰু ৭৬০ গৰাকী মহিলা। মুঠ পৰিয়ালৰ সংখ্যা আছিল ৩৫৮টা।^১

২০১১ চনৰ তথ্য অনুসৰি গাঁওখনৰ সাক্ষৰতাৰ হাৰ আছিল ৭৬.৮১ শতাংশ। ০–৬ বছৰ বয়সৰ শিশুৰ সংখ্যা আছিল ১৬৯ জন।^৭

পৰিবহণ

ৰে'ল

ভজোত ভজো ৰে’ল ষ্টেচন অৱস্থিত। ষ্টেচনটোৰ ৰে'ল সংকেত বিঅজে আৰু ই উত্তৰ-পূব সীমান্ত ৰে'লৱেৰ তিনিচুকীয়া ৰে'ল মণ্ডলৰ অন্তৰ্গত।^২

ষ্টেচনটো লামডিং–ডিব্ৰুগড় ৰে'লপথৰ সৈতে সংযুক্ত। ইয়াত দুটা প্লেটফৰ্ম আছে আৰু নিয়মীয়া যাত্ৰীবাহী ৰে'লৰ হাল্ট আছে।^২

ভজো ৰে'ল ষ্টেচনৰ ওচৰৰ ষ্টেচনসমূহৰ ভিতৰত লংপটীয়া ৰে'ল ষ্টেচন, চাফ্ৰাই ৰে'ল ষ্টেচন আৰু সাপেখাতী ৰে'ল ষ্টেচন উল্লেখযোগ্য।^২

পথ

ভজো সোণাৰিৰ সৈতে পথযোগে সংযুক্ত। সোণাৰি চহৰলৈ পথৰ দূৰত্ব প্ৰায় ৫ কিলোমিটাৰ।^১

চৰাইদেউ জিলা প্ৰশাসনৰ তথ্য অনুসৰি ভজো ৰে'ল ষ্টেচন সোণাৰি জিলা সদৰৰ অন্যতম নিকটৱৰ্তী ৰে'ল সংযোগস্থল আৰু সোণাৰিৰপৰা ইয়াৰ পথ দূৰত্ব প্ৰায় ৬.৩ কিলোমিটাৰ।^৮

শিক্ষা

ভজো আৰু ইয়াৰ ওচৰৰ সোণাৰি অঞ্চলত বিভিন্ন শিক্ষানুষ্ঠান আছে। চৰাইদেউ জিলা প্ৰশাসনৰ তথ্য অনুসৰি জিলাখনৰ উচ্চ শিক্ষাৰ প্ৰতিষ্ঠানসমূহৰ ভিতৰত সোণাৰি বাণিজ্য মহাবিদ্যালয় আৰু সোণাৰি মহাবিদ্যালয় উল্লেখযোগ্য।^৯

অৰ্থনীতি

ভজো অঞ্চলৰ অৰ্থনীতিৰ সৈতে কৃষি, স্থানীয় বাণিজ্য আৰু সেৱা খণ্ড জড়িত। সোণাৰি চহৰৰ নিকটৱৰ্তী অৱস্থান আৰু ৰে'ল যোগাযোগৰ বাবে অঞ্চলটোত বাণিজ্যিক কাৰ্যকলাপৰ গুৰুত্ব আছে।

২০১১ চনৰ লোকপিয়ল অনুসৰি ভজো গাৱত মুঠ ৬১৭ জন লোক কৰ্মৰত আছিল।^১০

ৰাজনীতি

ভজো সোণাৰি বিধানসভা সমষ্টিৰ অন্তৰ্গত। লোকসভা নিৰ্বাচনৰ ক্ষেত্ৰত ই যোৰহাট লোকসভা সমষ্টিৰ অন্তৰ্গত।^১

ভজো যুদ্ধ প্ৰশিক্ষণ ক্ষেত্ৰ

ভজো যুদ্ধ প্ৰশিক্ষণ ক্ষেত্ৰ অসমৰ চৰাইদেউ জিলাৰ সোণাৰিৰ ওচৰত অৱস্থিত এটা আহোম যুগৰ প্ৰত্নতাত্ত্বিক স্থান। অসম চৰকাৰৰ পুৰাতত্ত্ব সঞ্চালকালয়ে স্থানটো সংৰক্ষিত প্ৰত্নতাত্ত্বিক স্থান আৰু কীৰ্তিচিহ্ন হিচাপে তালিকাভুক্ত কৰিছে।^১১

মধ্যযুগত আহোমসকলে এই স্থানটো গেৰিলা যুদ্ধৰ কৌশলৰ প্ৰশিক্ষণ কেন্দ্ৰ হিচাপে ব্যৱহাৰ কৰিছিল। প্ৰায় ১২৯ বিঘা মাটি-কালিৰ এই স্থানত বহুতো মানুহে নিৰ্মাণ কৰা মাটিৰ ঢিপি আছে। ঢিপিসমূহৰ মাজৰ দূৰত্ব প্ৰায় ৯০ৰপৰা ১০০ চেণ্টিমিটাৰ আৰু ইয়াৰ উচ্চতা প্ৰায় ১.১০ৰপৰা ১.২০ মিটাৰ। স্থানটোত পৰিখাসদৃশ গাঁতৰ অৱশেষো দেখা যায়।^১২

এই মাটিৰ ঢাপ আৰু খাদসদৃশ গঠনসমূহৰ বিন্যাসৰপৰা স্থানটো সামৰিক প্ৰশিক্ষণৰ বাবে পৰিকল্পিতভাৱে ব্যৱহাৰ কৰা হৈছিল বুলি প্ৰত্নতাত্ত্বিক তথ্যই সূচায়। অসম পৰ্যটন বিভাগেও ভজো যুদ্ধ প্ৰশিক্ষণ ক্ষেত্ৰক আহোমসকলৰ গেৰিলা যুদ্ধ প্ৰশিক্ষণৰ সৈতে জড়িত এটা ঐতিহাসিক স্থান হিচাপে উল্লেখ কৰিছে।^১৩১৪

সংৰক্ষণ

ভজো যুদ্ধ প্ৰশিক্ষণ ক্ষেত্ৰটো ২০০৬ চনত সংৰক্ষিত প্ৰত্নতাত্ত্বিক স্থান হিচাপে স্বীকৃতি লাভ কৰিছিল।^১৫

সাম্প্ৰতিক সময়ত স্থানটো বেদখল আৰু সংৰক্ষণৰ অভাৱৰ সমস্যাৰ সন্মুখীন হৈছে। সংবাদমাধ্যমৰ প্ৰতিৱেদন অনুসৰি সংৰক্ষিত এলেকাৰ কিছু অংশত কৃষিকাৰ্যৰ বাবে ভূমি ব্যৱহাৰ কৰা হৈছে আৰু কিছুমান প্ৰাচীন মাটিৰ ঢিপি ক্ষতিগ্ৰস্ত হৈছে।^১৬

এই স্থানটোৰ প্ৰত্নতাত্ত্বিক গঠনসমূহ সংৰক্ষণ কৰাটো আহোম যুগৰ সামৰিক ইতিহাস আৰু অসমৰ মধ্যযুগীয় ঐতিহ্য সংৰক্ষণৰ বাবে গুৰুত্বপূৰ্ণ।

স্থানীয় গুৰুত্ব

ভজো সোণাৰি চহৰৰ নিকটৱৰ্তী হোৱাৰ লগতে ৰে'ল যোগাযোগৰ বাবে চৰাইদেউ জিলাৰ এটা গুৰুত্বপূৰ্ণ স্থান। চৰাইদেউ জিলা প্ৰশাসনে ভজো ৰে'ল ষ্টেচনক সোণাৰি জিলা সদৰৰ নিকটৱৰ্তী ৰে'ল সংযোগ হিচাপে উল্লেখ কৰিছে।^১৭ ভজো আৰু ইয়াৰ ওচৰৰ চৰাইদেউ অঞ্চল আহোম যুগৰ ইতিহাস আৰু প্ৰত্নতাত্ত্বিক নিদৰ্শনৰ বাবে গুৰুত্বপূৰ্ণ। ভজোৰপৰা অলপ দূৰৈত অৱস্থিত চৰাইদেউ মৈদামসমূহ আহোম ৰাজবংশৰ ৰাজকীয় সমাধি স্থাপত্যৰ উল্লেখযোগ্য নিদৰ্শন। চৰাইদেউ মৈদামসমূহ আহোম ৰাজপৰিয়ালৰ মৃত সদস্যসকলৰ সমাধিস্থল হিচাপে ব্যৱহৃত হৈছিল।^১৮

চৰাইদেউৰ মৈদামসমূহৰ স্থাপত্যত মাটি আৰু ইটাৰে নিৰ্মিত গম্বুজাকৃতিৰ সমাধি, পাথৰৰ গাঁথনি আৰু বিভিন্ন আনুষ্ঠানিক উপাদান দেখা যায়। এই স্থান আহোম যুগৰ ৰাজকীয় সমাধি পৰম্পৰা আৰু স্থাপত্য-সংস্কৃতিৰ গুৰুত্বপূৰ্ণ সাক্ষ্য বহন কৰে।^১৯

চৰাইদেউ মৈদামসমূহ ২০২৪ চনত ইউনেস্ক' বিশ্ব ঐতিহ্য তালিকাত অন্তৰ্ভুক্ত হয়। ইয়াৰ ফলত চৰাইদেউ অঞ্চলৰ আহোম যুগৰ প্ৰত্নতাত্ত্বিক ঐতিহ্যৰ আন্তঃৰাষ্ট্ৰীয় স্বীকৃতি বৃদ্ধি পাইছে।^২০

লগতে চাওক

• সোণাৰি
• চৰাইদেউ জিলা
• সোণাৰি বিধানসভা সমষ্টি
• যোৰহাট লোকসভা সমষ্টি