ব্ৰাত্য বসু

ব্ৰাত্যব্ৰত বসু ৰায়চৌধুৰী (Bratya Basu; জন্ম: ২৫ ছেপ্টেম্বৰ ১৯৬৯) এজন ভাৰতীয় বাঙালী নাট্যকাৰ, নাট পৰিচালক, কবি, প্ৰাবন্ধিক, ঔপন্যাসিক, অনুবাদক, সম্পাদক, অভিনেতা আৰু ৰাজনীতিবিদ। বৰ্তমান তেওঁ পশ্চিম বংগৰ উচ্চ শিক্ষা আৰু বিদ্যালয় শিক্ষা বিভাগৰ মন্ত্ৰী। ২০১১, ২০১৬, ২০২১ চনৰ বিধানসভা নিৰ্বাচনত দমদম বিধানসভা সমষ্টিৰপৰা একেৰাহে তিনিবাৰকৈ নিৰ্বাচিত হৈছিল।

প্ৰাথমিক জীৱন

ব্ৰাত্য বসু বিশিষ্ট নাট্যব্যক্তিত্ব বিষ্ণু বসুৰ পুত্ৰ। প্ৰেছিডেন্সি কলেজ (বৰ্তমান বিশ্ববিদ্যালয়) আৰু কলিকতা বিশ্ববিদ্যালয়ত বাংলা ভাষা আৰু সাহিত্য অধ্যয়ন কৰাৰ পাছত তেওঁ কলিকতাৰ চিটি কলেজত অধ্যাপক হিচাপে যোগদান কৰে। ‘গণকৃষ্টি’ নামৰ নাট্যগোষ্ঠী এটাত চাউণ্ড অপাৰেটৰ হিচাপে তেওঁৰ নাট্যজীৱন আৰম্ভ হৈছিল। পাছলৈ তেওঁ দলটোৰ বাবে নাটক ৰচনা কৰাৰ লগতে পৰিচালনা কৰিবলৈ আৰম্ভ কৰে। আল্ট্ৰা-মডাৰ্ণ নাটক অশালীন (১৯৯৬) তেওঁৰদ্বাৰা ৰচিত প্ৰথম নাটক। তেওঁৰ আন আন উল্লেখযোগ্য নাটকবোৰ হ'ল - অৰণ্যদেৱ, শহৰইয়াৰ, উইঙ্কল্‌ টুইঙ্কল্‌ আৰু ৰহস্যমূলক নাটক চতুষ্কোণ। ১৯৯৮ চনত তেওঁ ‘শ্যামল সেন সোঁৱৰণী বঁটা’ আৰু ২০০০ চনত ‘দিশাৰী বঁটা’ লাভ কৰে। ২০০৮ চনত তেওঁ ‘ব্ৰাত্যজন’ নামেৰে নিজাকৈ এটি নাট্যদল গঠন কৰে। ২০০৯ চনত দেৱব্ৰত বিশ্বাসৰ জীৱনৰ আধাৰত নিৰ্মিত নাটক ৰুদ্ধসংগীত তেওঁৰ এক কিংবদন্তি সৃষ্টি।

ৰাজনৈতিক জীৱন

২০১১ চনৰ বিধানসভা নিৰ্বাচনত ব্ৰাত্য বসুৱে তৃণমূল কংগ্ৰেছৰ হৈ‍ দমদম বিধানসভা সমষ্টিৰপৰা প্ৰতিদ্বন্দ্বিতা কৰিছিল। এই নিৰ্বাচনত তেওঁ তেতিয়াৰ শাসকীয় চি পি আই (এম) দলৰ মন্ত্ৰী গৌতম দেৱক পৰাস্ত কৰি বিধায়ক নিৰ্বাচিত হয়। তাৰ পাছত মমতা বন্দ্যোপাধ্যায়ৰ প্ৰথম মন্ত্ৰীসভাত তেওঁক উচ্চ শিক্ষামন্ত্ৰীৰ দায়িত্ব দিয়া হয়। তেওঁ কিছুদিনৰ বাবে বিজ্ঞান, প্ৰযুক্তি আৰু জৈৱ প্ৰযুক্তি বিভাগৰ মন্ত্ৰীৰ দায়িত্বও গ্ৰহণ কৰিছিল। বৰ্তমান তেওঁ মমতা বন্দ্যোপাধ্যায়ৰ তৃতীয় পৰ্যায়ৰ মন্ত্ৰীসভাত উচ্চ শিক্ষা মন্ত্ৰ্যালয়ৰ মন্ত্ৰীৰ দায়িত্বত আছে।

চলচ্চিত্ৰ

তেওঁ পাঁচখন ছবি পৰিচালনা কৰিছে। সেইবোৰ হ'ল - ৰাস্তা, তিস্তা, তাৰা, ডিকশনাৰি আৰু হুব্বা। প্ৰথমখনৰ বিষয়-বস্তু এজন যুৱক সন্ত্ৰাসবাদী হোৱাৰ কথা আৰু তৃতীয়খনৰ বিষয়-বস্তু হ'ল সমাজ আৰু প্ৰেমৰ ব্যৰ্থতা। কালবেলাকে ধৰি কেইবাখনো ছবিত তেওঁ অভিনয়ও কৰিছে।

এঘাৰ বছৰৰ পাছত পুনৰ ‘ডিকশনাৰি’ নামৰ এখন ছবি পৰিচালনা কৰিছে। তেওঁৰ শেষৰখন ছবি হ'ল ‘হুব্বা’।

অভিনয়

পৰিচালক

সন্মান

২০২১ চনত নাট্যকাৰ ব্ৰত্য বসুৱে “মীৰজাফৰ ও অন্যান্য নাটক” নামৰ গ্ৰন্থখনৰ বাবে ভাৰত চৰকাৰৰ সাহিত্য অকাডেমি বঁটা লাভ কৰিছিল।