বিনোদ খান্না

বিনোদ খান্না (৬ অক্টোবৰ ১৯৪৬ – ২৭ এপ্ৰিল ২০১৭)^১ এজন ভাৰতীয় অভিনেতা, প্ৰযোজক আৰু ৰাজনীতিবিদ।^২ তেখেতে দুবাৰ ফিল্মফেয়াৰ বঁটা লাভ কৰিছিল। ৰাজনৈতিক ক্ষেত্ৰত গুৰদাসপুৰ সমষ্টিৰ পৰা দুবাৰকৈ সাংসদ (১৯৯৮-২০০৯ আৰু ২০১৪-২০১৭) নিৰ্বাচিত হৈছিল। ২০০২ চনৰ জুলাইত বিনোদ খান্না অটল বিহাৰী বাজপায়ীৰ মন্ত্ৰীসভাত সাংস্কৃতিক আৰু পৰ্যটন বিভাগৰ মন্ত্ৰী পদ লাভ কৰে। ছমাহ পাছত তেখেত বৈদেশিক পৰিক্ৰমাৰ ৰাজ্যিক মন্ত্ৰী নিৰ্বাচিত হয়।^৩

বিনোদ খান্নাই বহুকেইখন উল্লেখযোগ্য হিন্দী বোলছবিত নায়কৰ চৰিত্ৰ ৰূপায়ণ কৰিছিল, যেনে- মেৰে অপ্‌নে, মেৰা গাঁও মেৰা দেশ, গড্ডাৰ, জেইল যাত্ৰা, ইম্‌তিহান, মুকড্ডৰ কা ছিকন্দৰ, ইন্‌কাৰ, কচ্ছে ধাগে, অমৰ আকবৰ এন্থনী, ৰাজপুত, কুৰবানী, কুদ্‌ৰত, দয়াবান, কাৰনামা, জুৰ্ম আদি।^৪

১৯৬৮ চনত অভিনয়ৰ পাতনি মেলি খান্নাই প্ৰথমে সৰু আৰু ঋণাত্মক চৰিত্ৰত অভিনয় কৰিছিল। তাৰ ভিতৰত "মেৰে অপ্‌নে" ছবিৰ খঙাল যুৱকৰ চৰিত্ৰ,^৫ "মেৰে গাঁও মেৰা দেশ" ছবিৰ মূল খলনায়কৰ চৰিত্ৰ,^৪ আৰু সমালোচকৰ দ্বাৰা প্ৰশংসিত তথা সঁচা ঘটনাৰ ওপৰত আধাৰিত ছবি "অচানক"ত^৬ পলাতক হোৱা সামৰিক বিষয়াৰ চৰিত্ৰ উল্লেখযোগ্য।^৭

১৯৮২ চনত কেৰিয়াৰ শীৰ্ষত থাকোঁতে বিনোদ খান্নাই সাময়িকভাৱে ছবিজগতৰ পৰা বিৰতি লৈ তেখেতৰ আধ্যাত্মিক গুৰু অ'শ্ব' ৰাজনীশক অনুসৰণ কৰে।^৮ পাঁচ বছৰ পাছত তেখেতে ছবিজগতলৈ ঘূৰি আহি "ইন্‌ছাফ" আৰু "সত্যমেৱ জয়তে" নামৰ দুখন হিট্‌ বোলছবি উপহাৰ দিয়ে।^৯

বিনোদ খান্নাক তেখেতৰ অনুৰাগীসকলে হিন্দী বোলছবি জগতৰ সৰ্বকালৰ দেখনিয়াৰ নায়কৰ এজন বুলি অভিহিত কৰিছিল।^{১০১১১২১৩} কিছুকাল ধৰি মূত্ৰাশয়ৰ কৰ্কট ৰোগত ভোগি থকা খান্নাৰ ২০১৭ চনৰ ২৭ এপ্ৰিলৰ দিনৰ ১১:২০ বজাত মুম্বাইৰ এখন চিকিৎসালয়ত মৃত্যু হয়।^১৪