প্ৰিয়ংকা মজুমদাৰ

প্ৰিয়ংকা (프리얀카; সম্পূৰ্ণ নাম: প্ৰিয়ংকা মজুমদাৰ) অসমৰ এগৰাকী কণ্ঠশিল্পী। প্ৰিয়ংকা বৰ্তমান কোৰীয় প'প সংগীত (চমুকৈ কে-প'প) বেণ্ড জি-গাৰ্লচ্ (Z-Girls)-ৰ মূল কণ্ঠশিল্পী। প্ৰিয়ংকাক ভাৰতৰ প্ৰথম কে-প'প তাৰকা ৰূপে অভিহিত কৰা হয়।^১ কে-প'প বা কোৰীয় প'প এক সংগীতৰ শৈলী যাৰ উদ্ভৱ হয় দক্ষিণ কোৰিয়াত, যি বৰ্তমানে আন্তঃৰাষ্ট্ৰীয় পৰ্যায়ত বিপুল জনপ্ৰিয়তা লাভ কৰিব সক্ষম হৈছে।^২

প্ৰাৰম্ভিক জীৱন

প্ৰিয়ংকাৰ জন্ম হয় ১৯৯৭ চনৰ ২ জুলাইত। অসমৰ গুৱাহাটীৰ ৰূপনগৰৰ বাসিন্দা প্ৰিয়ংকাই সৰুৰে পৰাই কে-প'প সংগীতৰ প্ৰতি আকৰ্ষিত আছিল। তাই কে-প'প সংগীত শুনিয়েই কোনো শিক্ষকৰ অবিহনে কোৰীয় ভাষাতো আয়ত্ত্ব কৰিছিল।^৩ জনপ্ৰিয় কে-প'প বেণ্ড বি টি এচ প্ৰিয়ংকাৰ অনুপ্ৰেৰণাৰ মূল উৎস।^৩

কেৰিয়াৰ

দক্ষিণ কোৰিয়াৰ বৈদেশীক মন্ত্ৰালয়ে প্ৰতিবছৰে আয়োজন কৰা কে-প'প ৱৰ্ল্ড ফেষ্টিভেল প্ৰতিযোগিতাত ২০১৬ চনত প্ৰিয়ংকা ভাগ লয়। চেংৱান চহৰত অনুষ্ঠিত প্ৰতিযোগিতাখনৰ অন্তিম পৰ্যায়ত প্ৰিয়ংকাই শ্ৰেষ্ঠ কণ্ঠশিল্পীৰ খিতাপ দখল কৰে।^৪

আন্তঃৰাষ্ট্ৰীয় কে-প'প সংগীত তাৰকা সৃষ্টি কৰাৰ উদ্দেশ্যে আৰম্ভ হোৱা জি-প'প ড্ৰিমছ নামৰ এক কাৰ্যসূচীৰ অংশ হিচাপে গঠন হোৱা জি-গাৰ্লচ্‌ নামৰ ছোৱালীৰ কে-প'প বেণ্ডত প্ৰিয়ংকাই মূল কণ্ঠশিল্পী ৰূপে স্থান লাভ কৰে। তাইৰ লগতে দিল্লীৰ সিদ্ধান্ত অৰোৰাই জি-বইজ্ নামৰ ল'ৰাৰ কে-প'প বেণ্ডত স্থান পায়। ২০১৯ চনৰ ১৭ জানুৱাৰীত এক ভিডিঅ' যোগে প্ৰিয়ংকাৰ লগতে জি-গাৰ্লচ্‌ আন সদস্যসকলক দৰ্শকৰ মাজত চিনাকি কৰাই দিয়া হয়।^৫৬ কোনো কে-প'প বেণ্ডত স্থান লাভ কৰা প্ৰিয়ংকা আৰু সিদ্ধান্ত হৈছে প্ৰথম ভাৰতীয়, সেয়ে দুয়োকে ভাৰতৰ প্ৰথম কে-প'প তাৰকা হিচাপে অভিহিত কৰা হয়।^৬১

প্ৰিয়ংকাৰ প্ৰথম কে-প'প সংগীত ভিডিঅ' "হোৱাট ইউ ৱাইটিং ফৰ" মুক্তি পায় ২০১৯ চনৰ ২২ ফেব্ৰুৱাৰীত।^৭৮৯

সমালোচনা

প্ৰিয়ংকাৰ লগতে জি-গাৰ্লচ্‌ বেণ্ডে শ্ৰোতা-দৰ্শকৰ পৰা ধনাত্মক সঁহাৰি লাভ কৰিব সক্ষম হয়। তথাপিও কে-প'পৰ কিছু ৰক্ষণশীল অনুৰাগীয়ে প্ৰিয়ংকা কোৰীয় মূলৰ নোহোৱা বাবে আৰু কোৰীয় ভাষা সলসলীয়াকৈ ক'ব নোৱাৰাৰ বাবে সমালোচনা কৰে।^১০ এক সাক্ষাৎকাৰত প্ৰিয়ংকাই তাইৰ গাৰ-বৰণৰ আৰু চেহেৰা পৰম্পৰাগত কোৰীয় লোকৰ দৰে নোহোৱাৰ বাবে লাভ কৰা ঋনাত্মক মন্তব্য আৰু বৰ্ণবৈষম্য সন্মুখীন হোৱাৰ কথা সদৰি কৰে।^৩

সঙ্গীতপঞ্জী

• ২০১৯: "হোৱাট ইউ ৱাইটিং ফৰ" (What You Waiting For- জি-গাৰ্লচ্‌)
• ২০১৯: "আৱাৰ গেলেক্সি" (Our Galaxy- জি-ষ্টাৰচ্)
• ২০১৯: "ষ্ট্ৰিটচ্ অফ গ'ল্ড" (Streets of Gold- জি-গাৰ্লচ্‌)