পূজা ভাট

পূজা ভাট (Pooja Bhatt; জন্ম: ২৪ ফেব্ৰুৱাৰী, ১৯৭২) হৈছে এগৰাকী ভাৰতীয় চলচ্চিত্ৰ পৰিচালক, অভিনেত্ৰী, ভয়ছ অভাৰ শিল্পী, মডেল আৰু ছবি-নিৰ্মাতা।^১ পূজা ভাটে লাভ কৰা বহুকেইটা পুৰস্কাৰৰ ভিতৰত দুটা ৰাষ্ট্ৰীয় চলচ্চিত্ৰ বঁটাও সন্নিৱিষ্ট হৈ আছে। তেখেত চলচ্চিত্ৰ পৰিচালক মহেশ ভাটৰ জীয়ৰী। ১৯৮৯ চনত মহেশ ভাটে নিৰ্মাণ কৰা টেলিভিছন ছবি ডেডিৰ জৰিয়তে পূজা ভাটে পোনপ্ৰথমবাৰৰ বাবে শীৰ্ষ চৰিত্ৰত অভিনয় কৰে। ছবিখনৰ বাবে পূজা ভাটে শ্ৰেষ্ঠ নৱাগতাৰ ফিল্মফেয়াৰ লাক্স নিউ ফেচ অৱ দ্যা ইয়েৰ সন্মান লাভ কৰে।

প্ৰাৰম্ভিক জীৱন

লগতে চাওক: ভট্ট পৰিয়াল

১৯৭২ চনৰ ২৪ ফেব্ৰুৱাৰীত পূজা ভাটৰ জন্ম হয়।^২ পূজা ভাটৰ পিতৃ আছিল মহেশ ভাট আৰু মাতৃ আছিল কিৰণ ভাট। পূজা ভাটে পিতৃৰ পৰা গুজৰাটী জাত্যাংশ আৰু মাতৃৰ পৰা ইংৰাজী, স্কটিশ, আৰ্মেনিয়ান আৰু বাৰ্মিছ জাত্যাংশ লাভ কৰিছে।^৩৪৫৬

কৰ্মজীৱন

পূজা ভাটে ১৭ বছৰ বয়সত (১৯৮৯ চনত) অভিনয়ৰ জগতত প্ৰৱেশ কৰে। ছবিখন আছিল মহেশ ভাটৰ দ্বাৰা নিৰ্মিত ডেডী। সেইখন ছবি মহেশ ভাটে টিভিৰ ছবি হিচাপে নিৰ্মাণ কৰিছিল। ছবিখনৰ আন এটি গুৰুত্বপূৰ্ণ চৰিত্ৰত অভিনয় কৰিছিল বলিউডৰ বলিষ্ঠ অভিনেতা অনুপম খেৰে।

১৯৯১ চনত নিৰ্মাণ হোৱা দিল হেই কে মানতা নহী শীৰ্ষক ৰোমাণ্টিক ছবিখন আছিল পূজা ভাটৰ কেৰিয়াৰৰ এখন উল্লেখযোগ্য ছবি।^৭ এইখন ছবি আছিল অস্কাৰ-বিজয়ী ইট হেপেনড ওৱান নাইটৰ ৰিমেক।^৮

পূজা ভাটৰ কেইখনমান উল্লেখযোগ্য ছবি হৈছে ছড়ক (১৯৯১),^৭, জুনুন (১৯৯২), জানম, হাম দোনো (১৯৯৫), অংগৰক্ষক, বৰ্ডাৰ (১৯৯৭) আৰু জখম (১৯৯৮) আদি। ২০০১ চনত পূজা ভাটে Everybody Says I'm Fine! নামৰ ইংৰাজী ছবিখনত অভিনয় কৰে। ২০০৪ চনত পূজা ভাটৰ নিজস্ব পৰিচালনা আৰু প্ৰযোজনাত পাপ নামৰ ছবিখন মুক্তি হয়। ইয়াৰ পিছত তেখেতে চাৰিখনকৈ ছবি পৰিচালনা কৰে।^৭ ২০২১ চনত পূজা ভাটে অলংকৃতা শ্ৰীবাস্তৱেৰ নিৰ্দেশনাত বোম্বাই বেগমছ নামৰ ছটা খণ্ডৰ চিৰিজটোত অভিনয় কৰিছে।^৯