নিশাদ কুমাৰ

নিশাদ কুমাৰ (Nishad Kumar) এগৰাকী ভাৰতীয় পেৰা হাই জাম্প এথলীট।^১ তেওঁ ২০২১ চনত অনুষ্ঠিত টকিঅ' ২০২০ গ্ৰীষ্মকালীন পেৰালিম্পিকত ভাৰতক প্ৰতিনিধিত্ব কৰি প্ৰথমবাৰলৈ পেৰালিম্পিক প্ৰতিদ্বন্দ্বিতা কৰি ২.০৬ মিটাৰ জঁপিয়াই নতুন এছিয়ান অভিলেখৰ সৈতে পুৰুষৰ হাই জাম্প টি৪৭ শ্ৰেণীত ৰূপৰ পদক অৰ্জন কৰিছিল।^২৩৪

জীৱনী

নিশাদ হিমাচল প্ৰদেশৰ উনাৰ বাসিন্দা। তেওঁ আঠ বছৰ বয়সত এক শোকাৱহ দুৰ্ঘটনাত তেওঁৰ সোঁ হাত হেৰুৱাইছিল।^৫ ২০২১ চনৰ আৰম্ভণিতে বিশ্বমাৰীৰ সময়ত তেওঁ কৰ'নাভাইৰাছ ৰোগ ২০১৯-ত আক্ৰান্ত হৈছিল আৰু ৰোগটোৰ পৰা আৰোগ্য লাভ কৰিছিল।^৬

কেৰিয়াৰ

তেওঁ ২০০৯ চনত পেৰা-এথলেটিকছ খেলা আৰম্ভ কৰে। ২০১৯ চনৰ নৱেম্বৰত তেওঁ ২০১৯ বিশ্ব পেৰা এথলেটিকছ চেম্পিয়নশ্বিপত পুৰুষৰ টি৪৭ শাখাত ব্ৰঞ্জৰ পদক লাভ কৰে আৰু ইয়াৰ ফলস্বৰূপে তেওঁ ২০২০ গ্ৰীষ্মকালীন পেৰালিম্পিকত অংশগ্ৰহণ কৰিবলৈ যোগ্যতা অৰ্জন কৰে।^৭ ডুবাইত অনুষ্ঠিত হোৱা ২০২১ চনৰ বিশ্ব পেৰা এথলেটিকছ গ্ৰেণ্ড প্ৰিঁত তেওঁ টি৪৬ শাখাত সোণৰ পদক লাভ কৰে।^৬

২০২০ গ্ৰীষ্মকালীন পেৰালিম্পিকত তেওঁ টি৪৭ শ্ৰেণীৰ হাই জাম্প ইভেণ্টত ৰূপৰ পদক অৰ্জন কৰি ভাৱিনা পেটেলৰ পাছত পদক জয় কৰা দ্বিতীয় ভাৰতীয় হিচাপে পৰিগণিত হয়।^৬৮ তেওঁ আমেৰিকা যুক্তৰাষ্ট্ৰৰ ডালাছ ৱাইজৰ সৈতে যুটিয়াভাৱে ৰূপৰ পদক লাভ কৰে কিয়নো দুয়োজনে ২.০৬ মিটাৰৰ একে উচ্চতা অতিক্ৰম কৰিছিল।^৫৯ নিশাদৰ ইয়াৰ ফলত এছিয়ান অভিলেখ গঢ়িছিল।^১০