ডন পালাথাৰা

ডন পালাথাৰা (Don Palathara; জন্ম: ২২ আগষ্ট ১৯৮৬) হৈছে কেৰালাৰ এগৰাকী ভাৰতীয় চলচ্চিত্ৰ নিৰ্মাতা।^১২৩ কম বাজেটত কাম কৰাৰ বাবে পৰিচিত তেওঁৰ চলচ্চিত্ৰসমূহ স্থানীয় কেৰালাৰ সংস্কৃতিৰ প্ৰদৰ্শন আৰু মানৱ প্ৰকৃতিৰ অধ্যয়ন।^১৪ পালাথাৰাৰ চলচ্চিত্ৰসমূহে মস্কো,^৫ ৰটাৰডেম^৬ আৰু তিৰুৱনন্তপুৰমকে ধৰি কেইবাটাও আন্তঃৰাষ্ট্ৰীয় চলচ্চিত্ৰ মহোৎসৱত প্ৰশংসা লাভ কৰিছে।^৭

প্ৰাৰম্ভিক জীৱন

ডন পালাথাৰাৰ জন্ম হৈছিল কেৰালাৰ ইডুক্কি জিলাৰ কৰুণাপুৰমত।^৮৯ ইয়াৰ পিছত তেওঁ অষ্ট্ৰেলিয়াৰ চিডনিলৈ প্ৰব্ৰজন কৰে, য'ত তেওঁ চিডনিৰ একাডেমী অৱ ফিল্ম, থিয়েটাৰ এণ্ড টেলিভিছনৰপৰা ডিপ্লমা লাভ কৰে। এই প্ৰতিষ্ঠানখন একত্ৰীকৰণৰ পূৰ্বে ইণ্টাৰনেশ্যনেল ফিল্ম স্কুল চিডনি নামেৰে জনাজাত আছিল।^১০১১

কেৰিয়াৰ

পূৰ্ণদৈৰ্ঘ্য চলচ্চিত্ৰ জগতত খোজ পেলোৱাৰ পূৰ্বে পালাথাৰাই কেইবাখনো চুটি ছবি আৰু তথ্যচিত্ৰ নিৰ্মাণ কৰিছিল।^১২ ২০১৫ চনত তেওঁৰ প্ৰথমখন পূৰ্ণদৈৰ্ঘ্য চলচ্চিত্ৰ শৱম মুক্তি পায়। অতি কম বাজেটত নিৰ্মিত এই চলচ্চিত্ৰখন ইয়াৰ ব্যতিক্ৰমী চলচ্চিত্ৰ নিৰ্মাণ শৈলীৰ বাবে বিশেষভাৱে চৰ্চিত হৈছিল, কাৰণ সমগ্ৰ ছবিখন ক'লা-বগা মাধ্যমত নিৰ্মাণ কৰা হৈছিল। ইয়াত স্থানভিত্তিক শব্দ গ্ৰহণ (লোকেশন ৰেকৰ্ডিং) কৰা হৈছিল (যিটো ভাৰতীয় চিনেমাৰ বাবে অস্বাভাৱিক) আৰু ইয়াত বহুসংখ্যক অনভিজ্ঞ অভিনয় শিল্পীয়ে অভিনয় কৰিছিল।^১৩ এটা শৱযাত্ৰাক কেন্দ্ৰ কৰি মানৱ চৰিত্ৰৰ বিভিন্ন দিশক লৈ নিৰ্মিত এই ব্যংগাত্মক চলচ্চিত্ৰ শৱম আন্তঃৰাষ্ট্ৰীয় চলচ্চিত্ৰ মহোৎসৱসমূহৰ লগতে স্থানীয়ভাৱেও সমাদৃত হৈছিল।^১৪ ছবিখনৰ মুক্তিৰ বাবে কাজছা চলচ্চিত্ৰ মঞ্চৰ চিনেমা গাড়ী ব্যৱহাৰ কৰা হৈছিল, যি আছিল এক বৈকল্পিক চলচ্চিত্ৰ বিতৰণ ব্যৱস্থা।^১৫১৬ পৰৱৰ্তী সময়ত শৱম নেটফ্লিক্স আৰু মুবী প্লেটফৰ্মত সম্প্ৰচাৰিত হয়।^১৭

২০১৭ চনত পালাথাৰাই তেওঁৰ দ্বিতীয়খন পূৰ্ণদৈৰ্ঘ্য ছবি ভিথ ৰচনা, পৰিচালনা, প্ৰযোজনা আৰু সম্পাদনা কৰে। এই চলচ্চিত্ৰখনৰ বাবে প্ৰয়োজনীয় পুঁজি কিকষ্টাৰ্টাৰকে ধৰি বিভিন্ন ক্ৰাউডফাণ্ডিং প্লেটফৰ্ম আৰু শৱমৰপৰা লাভ কৰা ধনেৰে সংগ্ৰহ কৰা হৈছিল।^১৮১৯

তেওঁৰ পৰৱৰ্তী চলচ্চিত্ৰ ১৯৫৬, চেণ্ট্ৰেল ট্ৰাভাংকুৰ ২০১৯ চনৰ মস্কো আন্তঃৰাষ্ট্ৰীয় চলচ্চিত্ৰ মহোৎসৱত প্ৰদৰ্শিত হৈছিল।^{১১২০২১২২} ২০২২ চনত এই ছবিখনে ২০২০ চনৰ শ্ৰেষ্ঠ চলচ্চিত্ৰ হিচাপে এফ এফ এছ আইৰ জন আব্ৰাহাম বঁটা লাভ কৰিবলৈ সক্ষম হয়।^২৩

২০২০ চনত পালাথাৰাই ৰিমা কালিংগল আৰু জীতিন পুথানচেৰী অভিনীত সন্তোষথিন্তে ওন্নাম ৰহস্যম নামৰ চলচ্চিত্ৰখন নিৰ্মাণ কৰে। এই ছবিখন এগৰাকী তৰুণ সাংবাদিক আৰু এগৰাকী উদীয়মান অভিনেতাৰ ৮৫ মিনিটৰ এটা চিংগল-টেক কাৰ যাত্ৰাৰ ওপৰত আধাৰিত আছিল।^২৪২৫ এই চলচ্চিত্ৰখন পৰৱৰ্তী সময়ত ৪৩সংখ্যক মস্কো আন্তঃৰাষ্ট্ৰীয় চলচ্চিত্ৰ মহোৎসৱত শ্ৰেষ্ঠ চলচ্চিত্ৰৰ গোল্ডেন জৰ্জ বঁটাৰ বাবে মনোনীত হৈছিল।^২৬

শ্বেৰিন কেথেৰিন অভিনীত তেওঁৰ এভ্ৰিথিং ইজ চিনেমা নামৰ সম্পৰ্কভিত্তিক নাট্যধৰ্মী চলচ্চিত্ৰখন প্ৰথম পুৰুষৰ আখ্যানত উপস্থাপন কৰা হৈছিল। এই ছবিখনৰ প্ৰিমিয়াৰ ৫০সংখ্যক আন্তঃৰাষ্ট্ৰীয় চলচ্চিত্ৰ মহোৎসৱ ৰটাৰডেমৰ চিনেমা ৰিগেইণ্ড শাখাত প্ৰদৰ্শিত হৈছিল।^২৭২৮

২০২৩ চনত তেওঁ ফেমিলি নামৰ এখন চলচ্চিত্ৰ নিৰ্মাণ কৰে, য'ত বিনয় ফ'ৰ্ট, দিব্যা প্ৰভা, নিল্জা কে বেবী, মেথিউ থমাছ, সজীতা মডাথিল আদিয়ে অভিনয় কৰিছিল। এই চলচ্চিত্ৰখন ২০২৩ চনৰ আন্তঃৰাষ্ট্ৰীয় চলচ্চিত্ৰ মহোৎসৱ ৰটাৰডেমৰ অফিচিয়েল চেলেকচন হিচাপে নিৰ্বাচিত হৈছিল।^২৯

২০২৩ চনত ব্ৰিটিছ একাডেমী অৱ ফিল্ম এণ্ড টেলিভিছন আৰ্টছে (BAFTA) ভাৰতৰ ব্ৰেকথ্ৰূ কাৰ্যসূচীৰ বাবে আন নজন চলচ্চিত্ৰ পেছাদাৰীৰ সৈতে পালাথাৰাক নিৰ্বাচিত কৰি সন্মানিত কৰে।^৩০

চলচ্চিত্ৰপঞ্জী

বঁটা আৰু সন্মান

• ২০২০ চনত ফেডাৰেচন অৱ ফিল্ম চচাইটিজ অৱ ইণ্ডিয়াৰদ্বাৰা শ্ৰেষ্ঠ চলচ্চিত্ৰৰ বাবে জন আব্ৰাহাম বঁটা লাভ কৰে।^৩৩
• ২০২৫ চনত কেৰালা চলচ্চিত্ৰ সমালোচক সংস্থা বঁটাত শ্ৰেষ্ঠ চিত্ৰনাট্যৰ বাবে ফিল্ম ক্ৰিটিক্স বঁটা লাভ কৰে।^৩৪
• ২০২১ চনত পাত্ৰিকি চলচ্চিত্ৰ মহোৎসৱত 'এভ্ৰিথিং ইজ চিনেমা' চলচ্চিত্ৰখনৰ বাবে চিনেমেট'গ্ৰাফীত ফ্ৰেছ এংগেল এণ্ড নিউ ডিস্কভাৰীজ সন্মান লাভ কৰে।^৩৫

বাহ্যিক সংযোগ

• Official Website
• Don Palathara on ইণ্টাৰনেট মুভি ডাটাবেছ