ছিৰিন্ধহৰ্ণ

মহা চকৰি ছিৰিন্ধহৰ্ণ (Maha Chakri Sirindhorn; জন্ম ২ এপ্ৰিল ১৯৫৫) থাই ভাষা ৰাজপৰিয়ালৰ এগৰাকী সদস্যা। তেওঁ ৰজা ভূমিবোল আদুল্যাদেজ (নৱম ৰাম) আৰু ৰাণী ছিৰিকিটৰ দ্বিতীয় কন্যা আৰু ৰজা বাজিৰলংকৰ্ণ (দশম ৰাম)ৰ কনিষ্ঠ ভগ্নী।^১

প্ৰাথমিক জীৱন

জন্ম

১৯৫৫ চনৰ ২ এপ্ৰিলত দুসিত প্ৰাসাদৰ আম্ফৰ্ণ সাথান আৱাসগৃহত ৰজা ভূমিবোল আদুল্যাদেজ (নৱম ৰাম) আৰু ৰাণী ছিৰিকিটৰ তৃতীয় সন্তান ছিৰিন্ধহৰ্ণৰ জন্ম হয়। যিহেতু ৰাজকীয় দম্পতীৰ মাত্ৰ এজন পুত্ৰ আছে, সেয়েহে ১৯৭৪ চনত থাইলেণ্ডৰ সংবিধান সলনি কৰি মহিলাৰ উত্তৰাধিকাৰীত্বৰ অনুমতি দিয়া হয়। ইয়াৰ ফলত ১৯৭৮ চনত ৰাজকুমাৰী বজ্ৰকিটিয়াভাৰ জন্ম নোহোৱালৈকে ৰাজকুমাৰী ছিৰিন্ধহৰ্ণে সিংহাসনৰ দ্বিতীয় শাৰীত (বাজিৰালংকৰ্ণৰ পিছত) স্থান লাভ কৰিছিল।

প্ৰাথমিক শিক্ষা

ছিৰিন্ধহৰ্ণে থাইলেণ্ডৰ আটাইতকৈ একচেটিয়া বিদ্যালয় চিত্ৰলাডা স্কুলত কিণ্ডাৰগাৰ্টেন, প্ৰাথমিক আৰু মাধ্যমিকত শি‍ক্ষা লাভ কৰিছিল, এই বিদ্যালয় ৰাজ পৰিয়াল আৰু ৰাজ প্ৰসাদৰ কৰ্মচাৰীৰ সন্তানৰ বাবে স্থাপন কৰা হৈছিল।^২

১৯৬৭ চনত ৰাষ্ট্ৰীয় বিদ্যালয় পৰীক্ষাত প্ৰাথমিক পৰ্যায়ত (৭ম শ্ৰেণী) প্ৰথম স্থান লাভ কৰিছিল, উচ্চতৰ মাধ্যমিক পৰ্যায়ত (দ্বাদশ শ্ৰেণী) ১৯৭২ চনত,আৰু ১৯৭৫ চনত ৰাষ্ট্ৰীয় বিশ্ববিদ্যালয়ৰ প্ৰৱেশ পৰীক্ষাত চতুৰ্থ স্থান লাভ কৰে।^৩

উচ্চ শিক্ষা

১৯৭৫ চনত চুলালংকৰ্ণ বিশ্ববিদ্যালয়ৰ কলা অনুষদত নামভৰ্তি কৰে আৰু ১৯৭৬ চনত প্ৰথম শ্ৰেণীৰ সন্মান আৰু ইতিহাস বিষয়ত কলা শাখাত স্বৰ্ণ পদক সহ স্নাতক হয়।^৩

১৯৭৬ চনৰপৰা তেওঁ একেলগে দুটা স্নাতক কাৰ্যসূচীত অধ্যয়ন অব্যাহত ৰাখে আৰু ১৯৮০ চনত প্ৰাচ্য এপিগ্ৰাফী (সংস্কৃত আৰু কম্বোডিয়ান)ত স্নাতকোত্তৰ ডিগ্ৰী লাভ কৰে^৩ আৰু ১৯৮০ চনত ছিলপাকৰ্ণ বিশ্ববিদ্যালয়ৰপৰা পুৰাতত্ত্ব বিজ্ঞানত ডিগ্ৰী লাভ কৰে। ১৯৭৭ চনৰ অক্টোবৰৰপৰা বেংককত প্ৰখ্যাত সংস্কৃত পণ্ডিত সত্য ব্ৰত শাস্ত্ৰীৰ তত্ত্বাৱধানত দুবছৰ সংস্কৃত অধ্যয়ন কৰে।^৪ ১৯৭৮ চনত চুলালংকৰ্ণ বিশ্ববিদ্যালয়ৰপৰা পালি আৰু সংস্কৃত বিষয়ত স্নাতকোত্তৰ ডিগ্ৰী লাভ কৰে।^২

১৯৮১ চনত শ্ৰীণখাৰিনৱিৰোট বিশ্ববিদ্যালয়ত ডক্টৰেট ডিগ্ৰীৰ বাবে নাম ভৰ্তি কৰে‍ আৰু ১৯৮৭ চনত উন্নয়নমূলক শিক্ষাত পি এইচ ডি ডিগ্ৰী লাভ কৰে।

১৯৮৪ চনত তেওঁ এছিয়ান ইনষ্টিটিউট অৱ টেকন'লজিৰ এছিয়ান ৰিজিঅ'নেল ৰিম'ট চেন্সিং ট্ৰেইনিং চেণ্টাৰত তেওঁ দুমাহ অধ্যয়ন কৰি প্ৰমাণ-পত্ৰ লাভ কৰে।^৫

২০০১ চনৰ এপ্ৰিল মাহত তেওঁ চীনৰ পেকিং বিশ্ববিদ্যালয়ত চীনা সংস্কৃতিৰ বৃত্তি লাভ কৰে আৰু তাত তেওঁ এমাহ ধৰি এই পাঠ্যক্ৰম অধ্যয়ন কৰে।^৬

পৰৱৰ্তী জীৱন

২০১২ চনৰ ডিচেম্বৰ মাহত কেলচিয়ামৰ জমা অংশ আঁতৰাবলৈ ছিৰিন্ধহৰ্ণক কিছু সময়ৰ বাবে চিকিৎসালয়ত ভৰ্তি কৰা হয়।^৭

থাইলেণ্ডৰ জনসাধাৰণৰ মাজত তেওঁৰ ভাতৃ, তেতিয়াৰ ক্ৰাউন প্ৰিন্স বাজিৰালংকৰ্ণ, ২০১৯তকৈ অধিক জনপ্ৰিয় আছিল৷ দীৰ্ঘদিন ধৰি ছিৰিন্ধহৰ্ণক থাইলেণ্ডৰ সিংহাসনৰ সম্ভাৱ্য উত্তৰাধিকাৰী বুলি উৰাবাতৰি প্ৰচাৰ হৈছিল।^৮ ২০১৬ চনত ভূমিবলৰ মৃত্যুৰ লগে লগে এই মুকুট বাজিৰালংকৰ্ণৰ হাতলৈ যায়, যি বৰ্তমান ৰজা দশম ৰাম। ২০১৯ চনত ৰজা বাজিৰালংকৰ্ণে ছিৰিন্ধহৰ্ণক নিযুক্তিৰ জৰিয়তে ৰাজকীয় পদৰ ভিতৰত সৰ্বোচ্চ পদ ক্ৰম ছমডেজ ফ্ৰাক প্ৰদান কৰে। ইয়াৰ উপৰিও তেওঁ প্ৰথম শ্ৰেণীৰ ৰজা ৰাম এক্স ৰয়েল চাইফাৰ মেডেল লাভ কৰে।^৯

২০২১ চনৰ জানুৱাৰী মাহত ছিৰিন্ধহৰ্ণৰ দুয়োটা গোৰোহা ভাঙি যোৱাত চিকিৎসালয়ত ভৰ্তি কৰা হয়। থাইলেণ্ডৰ সংবাদ মাধ্যমে প্ৰকাশ কৰা অনুসৰি তেওঁ খোজ কাঢ়ি যোৱাৰ সময়ত পৰি এই ঘটনা ঘটিছিল; কিন্তু পশ্চিমীয়া সূত্ৰই অভিযোগ কৰে যে তেওঁৰ গোৰোহা বাজিৰালংকৰ্ণে বি‍তৰ্কৰ পিছত ভাঙি পেলাইছিল।^১০

কৰ্ম আৰু আগ্ৰহ

প্ৰযুক্তিৰ প্ৰতি থকা তীব্ৰ হেঁপাহৰ উপৰিও তেওঁ ইতিহাসত স্নাতক আৰু শৈক্ষিক উন্নয়নত ডক্টৰেট ডিগ্ৰী লাভ কৰিছে। তেওঁ চুলাচমক্লাও ৰয়েল মিলিটাৰী একাডেমীৰ ইতিহাস বিভাগত অধ্যাপনা কৰে, য’ত তেওঁ বিভাগটোৰ নামমাত্ৰ মুৰব্বী। থাই ভাষাৰ লগতে তেওঁ সাৱলীলভাৱে ইংৰাজী ভাষা, ফৰাচী ভাষা আৰু মেণ্ডাৰিন চীনা ভাষা ক’ব পাৰে আৰু বৰ্তমান জাৰ্মান ভাষা আৰু লেটিন ভাষা অধ্যয়ন কৰি আছে। তেওঁ চীনা সাহিত্য থাই ভাষালৈ অনুবাদ কৰে।^১১

তেওঁ থাই পৰম্পৰাগত সংগীতৰ এগৰাকী শিল্পী আৰু প্ৰসাৰক।

তেওঁৰ পিতৃ ভূমিবল আদুল্যাদেজৰ দৰেই ৰাজকুমাৰী ছিৰিন্ধহৰ্ণৰ ওচৰত এমেচাৰ ৰেডিঅ’ অপাৰেটৰৰ প্ৰমাণপত্ৰ আছে আৰু তেওঁৰ কল চাইন হ’ল HS1D।^১২

জলপানী

লিভাৰপুল বিশ্ববিদ্যালয়ে ছিৰিন্ধহৰ্ণৰ সন্মানত এটা জলপানী (scholarship) প্ৰৱৰ্তন কৰিছে। এজন থাই ছাত্ৰক লিভাৰপুলত অধ্যয়ন কৰি এবছৰীয়া স্নাতকোত্তৰ পাঠ্যক্ৰম সম্পূৰ্ণ কৰিবলৈ বছৰি এটা সম্পূৰ্ণ জলপানী প্ৰদান কৰা হ’ব। এই জলপানী এবছৰীয়া স্নাতকোত্তৰ পাঠ্যক্ৰম আগবঢ়োৱা সকলো বিষয়ৰ বাবে মুকলি; অৱশ্যে, ৰাজকুমাৰী ছিৰিন্ধহৰ্ণৰ সৈতে জড়িত বিষয় যেনে বিজ্ঞান, তথ্য প্ৰযুক্তি, চিকিৎসা বিজ্ঞান, কলা, ভূগোল, ইতিহাস আৰু ভাষা অধ্যয়ন কৰিব বিচৰা শিক্ষাৰ্থীসকলক অগ্ৰাধিকাৰ দিয়া হ’ব। এই জলপানীৰ বাবে যোগ্য হ'বলৈ আবেদনকাৰী এগৰাকী থাই নাগৰিক হ'ব লাগিব আৰু ইতিমধ্যে লিভাৰপুল বিশ্ববিদ্যালয়ত এবছৰীয়া স্নাতকোত্তৰ পাঠ্যক্ৰমত অধ্যয়নৰ বাবে আমন্ত্ৰণ পত্ৰ লাভ কৰিব লাগিব।