কৰিশ্মা তন্না

কৰিশ্মা কে. তন্না (ইংৰাজী ভাষা: Karishma K. Tanna; জন্ম: ২১ ডিচেম্বৰ ১৯৮৩) এগৰাকী ভাৰতীয় অভিনেত্ৰী আৰু মডেল যিয়ে প্ৰধানকৈ হিন্দী চলচ্চিত্ৰ আৰু টেলিভিছন শ্ব’ত কাম কৰে। ২০০১ চনত ‘কিউকি ছাছ ভী কভী বহু থী’ ধাৰাবাহিকৰ জৰিয়তে তেওঁ টেলিভিছনত আত্মপ্ৰকাশ কৰে। তেওঁ ‘পালখী’, ‘নাগিন ৩’ আৰু ‘কয়ামত কী ৰাত’ ধাৰাবাহিকত কৰা অভিনয়ৰ বাবে বেছি পৰিচিত। ২০১৪ চনত তেওঁ ৰিয়েলিটি শ্ব’ ‘বিগ বছ ৮’-ত এগৰাকী প্ৰতিযোগী আছিল আৰু প্ৰথম ৰানাৰ-আপ হিচাপে নিৰ্বাচিত হৈছিল। ২০২০ চনত তেওঁ ‘খটৰো কে খিলাড়ী ১০’-ত অংশগ্ৰহণ কৰি বিজয়ী হিচাপে পৰিগণিত হয়।^১২৩

তন্নাই সুনীল দৰ্শনৰ ‘দোস্তী: ফ্ৰেণ্ডছ ফৰএভাৰ’ (২০০৬) ছবিখনত নন্দিনী থাপৰ হিচাপে চলচ্চিত্ৰ জগতত আত্মপ্ৰকাশ কৰে। ২০১১ চনৰ কানাড়া ছবি ‘আই এম ছৰী মাথে বন্নী প্ৰীতছোনা’-ৰ জৰিয়তে তেওঁ মুখ্য চৰিত্ৰত অভিনয়ৰ পাতনি মেলে। ২০১৩ চনত তেওঁক ইন্দ্ৰ কুমাৰৰ সফল কমেডী ছবি ‘গ্ৰেণ্ড মস্তি’-ত দেখা গৈছিল।^৪ ২০১৮ চনত তেওঁ ৰাজকুমাৰ হিৰাণীৰ সঞ্জয় দত্তৰ বায়’পিক ‘সঞ্জু’-ত অভিনয় কৰিছিল।^৫ একে বছৰতে তেওঁ অল্ট বালাজীৰ ৱেব ধাৰাবাহিক ‘কৰলে তু ভী মহব্বত’-ত জয়া হুছেইন হিচাপে ডিজিটেল জগতত প্ৰৱেশ কৰে। নেটফ্লিক্সৰ ধাৰাবাহিক ‘স্কুপ’ (২০২৩)-ত তেওঁৰ অভিনয়ে সমালোচকৰ ব্যাপক প্ৰশংসা লাভ কৰে।^৬

প্ৰাৰম্ভিক জীৱন

তন্নাই ১৯৮৩ চনৰ ২১ ডিচেম্বৰত ভাৰতৰ মুম্বাইৰ এটা গুজৰাটী পৰিয়ালত জন্মগ্ৰহণ কৰিছিল।^৭৮

তেওঁ মুম্বাইৰ চিডেনহাম কলেজ অৱ কমাৰ্চ এণ্ড ইক’নমিক্সত অধ্যয়ন কৰিছিল, য’ত তেওঁ অভিনয় আৰু পৰিৱেশনৰ প্ৰতি আগ্ৰহী হৈ পৰিছিল।^৭

ব্যক্তিগত জীৱন

২০১৪ চনত বিগ বছ ৮-ৰ ঘৰৰ ভিতৰত চিনাকি হোৱাৰ পিছত তন্নাই অভিনেতা উপেন পেটেলৰ সৈতে ডেটিং আৰম্ভ কৰিছিল আৰু পৰৱৰ্তী সময়ত তেওঁৰ সৈতে বাগদান সম্পন্ন হৈছিল।^৯১০ ২০১৬ চনত তেওঁলোকৰ সম্পৰ্কৰ অন্ত পৰে।^১১

২০২১ চনত তন্নাই মুম্বাইৰ এজন ৰিয়েল এষ্টেট ব্যৱসায়ী বৰুণ বাঙ্গেৰাৰ সৈতে ডেটিং আৰম্ভ কৰে। একে বছৰতে এক ব্যক্তিগত অনুষ্ঠানত তেওঁলোকৰ বাগদান সম্পন্ন হয়। ২০২২ চনৰ ৫ ফেব্ৰুৱাৰীত তেওঁ বৰুণ বাঙ্গেৰাৰ সৈতে বিবাহপাশত আবদ্ধ হয়।^১২১৩

তেওঁ এগৰাকী ফিটনেছ আৰু স্বাস্থ্য সচেতন ব্যক্তি।^১৪