ওভিয়া

হেলেন নেলছন (জন্ম: ২৯ এপ্ৰিল ১৯৯১), যিজনী পেছাগতভাৱে নিজৰ মঞ্চ নাম ওভিয়া (ইংৰাজী ভাষা: Oviya) নামেৰে অধিক পৰিচিত, এগৰাকী ভাৰতীয় অভিনেত্ৰী যিয়ে তামিল ভাষা আৰু মালয়ালম ভাষা চলচ্চিত্ৰত কাম কৰে। ইয়াৰ উপৰি তেওঁ কেইখনমান কানাড়া আৰু তেলেগু ছবিতো অভিনয় কৰিছে। ২০১০ চনত চৰকুণামৰ গ্ৰাম্য ৰোমাণ্টিক কমেডী কালাভানিৰ জৰিয়তে তেওঁ অভিনেত্ৰী হিচাপে বিশেষ সফলতা লাভ কৰে। ইয়াৰ পিছত তেওঁ পাণ্ডিৰাজৰ মেৰিনা (২০১২), মুদৰ কুডম (২০১৩) আৰু মাধা য়ানাই কুট্টম (২০১৩) আদিকে ধৰি আন কেইবাখনো ছবিত অভিনয় কৰে। ওভিয়াই সুন্দৰ চি-ৰ কালাকালপ্পু (২০১২) আৰু হৰৰ কমেডী ছবি য়ামিৰুক্কা ভয়ামে (২০১৪) ত কৰা অভিনয়ৰ জৰিয়তে বক্স অফিচত সফলতা অৰ্জন কৰিছে। ২০১৭ চনত ওভিয়াই ৰিয়েলিটি ধাৰাবাহিক বিগ বছ তামিল ১ত অংশগ্ৰহণ কৰিছিল।^১

প্ৰাৰম্ভিক জীৱন

কেৰালাৰ ত্ৰিচুৰত হেলেন নেলছন নামেৰে ওভিয়াৰ জন্ম হৈছিল।^২ তেওঁ ত্ৰিচুৰৰ বিমলা কলেজত অধ্যয়ন কৰিছিল।^৩

কৰ্মজীৱন

মালয়ালম চলচ্চিত্ৰত আত্মপ্ৰকাশ (২০০৭–২০০৯)

ওভিয়াই মালয়ালম চলচ্চিত্ৰত সহযোগী চৰিত্ৰত অভিনয় কৰি নিজৰ কেৰিয়াৰ আৰম্ভ কৰিছিল। ইয়াৰ ভিতৰত পৃথ্বীৰাজ সুকুমাৰন অভিনীত কেংগাৰু (২০০৭) আৰু পুঠিয়া মুখম (২০০৯) উল্লেখযোগ্য। ইয়াৰ উপৰি তেওঁ কলেজ ড্ৰামা অপূৰ্ব (২০০৮)ত অন্যতম মুখ্য চৰিত্ৰত অভিনয় কৰিছিল। ইয়াৰ পিছত ওভিয়াই ত্ৰিচুৰৰ বিমলা কলেজত ফাংছনেল ইংলিছত স্নাতক (BA) ডিগ্ৰী সম্পূৰ্ণ কৰাৰ দিশত কাম কৰি থকাৰ সময়তে পৰিচালক চৰকুণামে তেওঁক কালাভানি (২০১০) ছবিৰ বাবে যোগাযোগ কৰে। চৰকুণামে ইণ্টাৰনেটত তেওঁৰ এখন ছবি দেখি তেওঁক মুখ্য মহিলা চৰিত্ৰটোৰ বাবে নিৰ্বাচিত কৰিছিল। প্ৰযোজকৰ কিছু দ্বিধা থকা সত্ত্বেও পৰিচালকগৰাকী নিশ্চিত আছিল যে তেওঁ এই চৰিত্ৰটোৰ বাবে সঠিক অভিনেত্ৰী বিচাৰি পাইছে।^৪

তামিল চলচ্চিত্ৰত আত্মপ্ৰকাশ (২০১০-২০১৬)

কালাভানিত তেওঁ বিমলৰ বিপৰীতে অভিনয় কৰিছিল। ছবিখনে ইতিবাচক সমালোচনা লাভ কৰাৰ লগতে বক্স অফিচত ‘শ্লিপাৰ হিট’ হিচাপে পৰিগণিত হয়।^৫৬ সমালোচকসকলে এগৰাকী গাঁৱলীয়া স্কুলীয়া ছোৱালীৰ চৰিত্ৰত ওভিয়াৰ অভিনয়ৰ প্ৰশংসা কৰে। হিন্দুস্তান টাইমছৰ এজন সমালোচকে মন্তব্য কৰে যে "ওভিয়াৰ আশ্চৰ্যজনক প্ৰকাশভংগীয়ে তেওঁৰ কৃতজ্ঞতা প্ৰকাশ কৰে আৰু তেওঁৰ চকুহালৰ জৰিয়তে সকলোখিনি ফুটাই তোলে।" একেদৰে দ্য হিন্দুৰ এজন পৰ্যালোচকে উল্লেখ কৰে যে "ওভিয়াক মৰম লগা দেখুৱায় আৰু তেওঁ সুন্দৰকৈ আৱেগ প্ৰকাশ কৰে, যিটো আজিকালি বিৰল।" ^৭৮

কালাভানিৰ সফলতাৰ পিছত ওভিয়াই কেইবাখনো কম বাজেটৰ ছবিত চুক্তিবদ্ধ হয়। ইয়াৰ ভিতৰত আছিল অমৰা, ভেংগাই, মুগম নী অগম নান, ছেভানু আৰু ৰাচু মধুৰাৱনৰ মুথুক্কু মুথাগা (২০১১)। অৱশ্যে কেৱল শেষৰখন ছবিয়েহে ছবিগৃহত মুক্তি লাভ কৰিছিল।^৯১০ মুথুক্কু মুথাগাত এগৰাকী কলেজীয়া বাস্কেটবল খেলুৱৈৰ চৰিত্ৰত অভিনয় কৰোঁতে ওভিয়াই অসুস্থতাৰ বাবে ছেটত অজ্ঞান হৈ পৰাৰ পাছতো কাম কৰি গৈছিল। অৱশ্যে ছবিখনে নেতিবাচক সমালোচনা লাভ কৰিছিল আৰু Behindwoods.com-ৰ এজন সমালোচকে ওভিয়াৰ চৰিত্ৰটোক "বিৰক্তিকৰ" বুলি অভিহিত কৰিছিল।^১১১২ এই সময়ছোৱাত তেওঁক আন দুখন মালয়ালম ছবি পুথুমুখংগল (২০১০) আৰু মনুষ্যমৃগম (২০১১)তো দেখা গৈছিল। কালাভানিৰ কানাড়া ৰিমেক কিৰাতক (২০১১)ৰ বাবে ওভিয়াই অধিক সমালোচনাত্মক প্ৰশংসা লাভ কৰে।^১৩ ইয়াৰ উপৰি তেওঁ কে এছ ৰবিকুমাৰৰ ৰোমাণ্টিক কমেডী ছবি মনমথন আম্বু (২০১০)ত এটা অতিথি চৰিত্ৰত অভিনয় কৰিছিল য’ত তেওঁ কমল হাছান আৰু আৰ মাধৱনৰ সৈতে কাম কৰাৰ সুযোগ পাইছিল।

পৰৱৰ্তী তিনি বছৰত ওভিয়াই তামিল চলচ্চিত্ৰত কাম কৰাক অগ্ৰাধিকাৰ দিয়ে। পাণ্ডিৰাজৰ সমালোচকৰদ্বাৰা প্ৰশংসিত ড্ৰামা ছবি মেৰিনা (২০১২)ত ওভিয়া আৰু শিৱকাৰ্তিকেয়নে এটা দম্পতীৰ চৰিত্ৰ ৰূপায়িত কৰিছিল। এগৰাকী সমালোচকে তেওঁলোকৰ অভিনয়ক "সম্পূৰ্ণ উপভোগ্য আৰু হাঁহি উঠা" বুলি বৰ্ণনা কৰিছিল।^১৪ একেদৰে ব্লেক কমেডী ছবি মুদৰ কুডম (২০১৪) আৰু থ্ৰিলাৰ মাধা য়ানাই কুট্টম (২০১৪)তো ওভিয়াই গুৰুত্বপূৰ্ণ চৰিত্ৰত অভিনয় কৰি সমালোচকৰ প্ৰশংসা বুটলে।^১৫১৬ সুন্দৰ চি-ৰ কমেডী ছবি কালাকালপ্পু (২০১২)ত তেওঁ প্ৰথমবাৰৰ বাবে এটা গ্লেমাৰাছ চৰিত্ৰ ৰূপায়িত কৰে। ছবিখনে ইতিবাচক সঁহাৰি লাভ কৰাৰ লগতে বক্স অফিচতো ভাল ফলাফল দেখুৱায়।^১৭

বিগ বছ তামিল (২০১৭–২০১৮)

২০১৭ চনত ওভিয়াই ষ্টাৰ বিজয় চেনেলৰ বাবে কমল হাছানে আঁত ধৰা তামিল ৰিয়েলিটি টেলিভিছন শ্ব' বিগ বছত অংশগ্ৰহণ কৰিছিল। আন প্ৰতিযোগীসকলৰ তুলনাত তেওঁৰ মোহনীয় ব্যক্তিত্ব আৰু সততাৰ বাবে তেওঁ অনুষ্ঠানটোত তৎক্ষণাত জনপ্ৰিয়তা অৰ্জন কৰিছিল। প্ৰতিযোগী বিন্দু মাধৱী, ৰাইজা উইলছন, গণেশ ভেংকটৰমনৰ সৈতে বন্ধুত্ব আৰু ছিজনৰ বিজয়ী আৰৱৰ সৈতে এক আন্তৰিক তথা একপক্ষীয় প্ৰেমৰ সম্পৰ্ক উপভোগ কৰি থকাৰ সময়তে তেওঁক গায়ত্ৰী ৰঘুৰাম, নমিতা, জুলিয়ানা আৰু শক্তি বাসুদেৱনকে ধৰি অন্যান্য প্ৰতিযোগীসকলে বাৰে বাৰে লক্ষ্য কৰি লৈছিল আৰু দুৰ্ব্যৱহাৰ কৰিছিল। এই দুৰ্ব্যৱহাৰৰ প্ৰতি তেওঁৰ চতুৰ সঁহাৰি আৰু ইতিবাচক মনোভাৱে দৰ্শকৰ মন জয় কৰিছিল।^১৮ কেইবাবাৰো উচ্ছেদৰ (eviction) সন্মুখীন হোৱা সত্ত্বেও ভোটাৰসকলে তেওঁক বাৰে বাৰে অনুষ্ঠানটোত ৰাখিছিল। আনহাতে ছচিয়েল মিডিয়াত "ওভিয়া আৰ্মী"ৰ দৰে শব্দাংশ নিয়মিতভাৱে ট্ৰেণ্ড হোৱাৰ লগতে তেওঁৰ এক বৃহৎ অনুগামীগোষ্ঠীৰ সৃষ্টি হৈছিল। অনুষ্ঠানটোত তেওঁৰ আচৰণ আৰু ইতিবাচক মনোভাৱে আন চেলিব্ৰিটীসকলকো আকৰ্ষিত কৰিছিল। প্ৰিয়া আনন্দ, নিভেথা পেথুৰাজ, সতীশ আৰু কৰুণাকৰণৰ দৰে শিল্পীসকলে ছচিয়েল মিডিয়াত তেওঁক প্ৰশংসা কৰিছিল।^১৯ ২০১৭ চনৰ জুলাই মাহৰ শেষৰ ফালে ওভিয়াৰ জনপ্ৰিয়তা ইমান তুংগত পাইছিল যে আন এখন তামিল ছবি বেলুনৰ (২০১৭) নিৰ্মাতাসকলে "নীংগা শ্বাট আপ পান্নুংগা" শীৰ্ষক এটা গীত অন্তৰ্ভুক্ত কৰি সেয়া অভিনেত্ৰীগৰাকীক উৎসৰ্গা কৰিছিল। একেদৰে আন কেইবাজনো গীতিকাৰে নিজাববীয়াকৈ "ওভিয়া এন্থিম" তৈয়াৰ কৰি অনলাইনত মুকলি কৰিছিল।^২০

২০১৭ চনৰ আগষ্ট মাহৰ আৰম্ভণিতে ওভিয়াই চিকিৎসাৰ কাৰণে অনুষ্ঠানটো ত্যাগ কৰে। আৰৱৰ প্ৰতি থকা তেওঁৰ একপক্ষীয় প্ৰেমৰ আৱেগক লৈ তেওঁলোকৰ মাজত এসপ্তাহ ধৰি চলা সংঘাতৰ পিছত তেওঁ এই সিদ্ধান্ত লৈছিল। অনুষ্ঠানৰ পৰা বাহিৰ হোৱাৰ পূৰ্বে তেওঁ ইচ্ছাকৃতভাৱে চুইমিং পুলত জঁপিয়াই দিছিল যাতে তেওঁৰ প্ৰস্থান অনিবাৰ্য হৈ পৰে। ইয়াৰ ফলত আৰক্ষীয়ে এই পদক্ষেপৰ আঁৰত কোনো সম্ভাৱ্য আত্মহত্যাৰ কোণ আছে নেকি সেই বিষয়ে চমু তদন্তও কৰিছিল।^২১২২ ছচিয়েল মিডিয়াত তেওঁক 'ৱাইল্ডকাৰ্ড' প্ৰতিযোগী হিচাপে পুনৰ ঘূৰাই অনাৰ ব্যাপক দাবী উঠা সত্ত্বেও ওভিয়াই এটা ভিডিঅ' মুকলি কৰি নিশ্চিত কৰে যে বিগ বছৰ ঘৰলৈ উভতি যোৱাৰ তেওঁৰ কোনো আগ্ৰহ নাই আৰু তেওঁ এক দীঘলীয়া বিৰতি লৈ চলচ্চিত্ৰৰ সুযোগসমূহক অগ্ৰাধিকাৰ দিব। তেওঁ লগতে অনুষ্ঠানটোত শক্তি আৰু জুলিৰ তেওঁৰ প্ৰতি কৰা আচৰণৰ বাবে ৰাইজক তেওঁলোকক ক্ষমা কৰি দিবলৈ আহ্বান জনায়।^২৩

২০১৯- বৰ্তমান

অনুষ্ঠানটোত অংশগ্ৰহণ কৰাৰ পিছত তেওঁৰ জনপ্ৰিয়তা বৃদ্ধি পোৱাৰ লগে লগে তেওঁৰ অভিনয় জীৱনটো ইতিবাচক পৰিৱৰ্তন দেখা যায়। অভিনেত্ৰীগৰাকীৰ নতুনকৈ গঢ়ি উঠা অনুগামীসকলৰ (fan following) পৰা লাভান্বিত হ’বলৈ চিনি নামৰ এখন দীৰ্ঘদিন ধৰি বিলম্বিত হৈ থকা কম বাজেটৰ ছবিৰ নাম সলাই ওভিয়াভা ভিট্টা য়াৰু কৰা হয়। একেদৰে, ২০১২ চনৰ তেওঁৰ মালয়ালম ছবি মনুষ্যমৃগমক তামিল ভাষাত ডাব কৰি পুলিচ ৰাজ্যম নামেৰে মুক্তিৰ বাবে প্ৰস্তুত কৰা হয়।^২৪ সুন্দৰ চি, চি এছ আমুধন আৰু সন্তোষ জয়কুমাৰকে ধৰি চলচ্চিত্ৰ নিৰ্মাতাসকলে তেওঁলোকৰ ছবি কালাকালাপ্পু ২, তামিল পাদাম ২ আৰু ইৰুট্টু আৰায়িল মুৰাট্টু কুথুৰ চৰিত্ৰৰ বাবে অভিনেত্ৰীগৰাকীক চুক্তিবদ্ধ কৰাৰ আগ্ৰহ প্ৰকাশ কৰিছিল যদিও তেওঁ সেই প্ৰস্তাৱসমূহ প্ৰত্যাখ্যান কৰে।^২৫২৬ বিগ বছৰ জৰিয়তে লাভ কৰা খ্যাতিৰ পিছত তেওঁ ৰাঘৱ লৰেন্সৰ কাঞ্চনা ৩ত অভিনয় কৰিবলৈ চুক্তিবদ্ধ হয়,^২৭ য’ত সমালোচকসকলে তেওঁৰ চৰিত্ৰটোৱে "ছবিখনত বিশেষ একো পাৰ্থক্য আনিব পৰা নাই" বুলি মন্তব্য কৰে। ইয়াৰ পিছত তেওঁ তেওঁৰ কেৰিয়াৰৰ মাইলৰ খুঁটি স্বৰূপ ছবি কালাভানীৰ ছিকুৱেল কালাভানী ২ আৰু মহিলা-কেন্দ্ৰিক তথা বিতৰ্কিত কাহিনীৰ ছবি ৯০ এমএলত অভিনয় কৰে। অৱশ্যে এই দুয়োখন ছবিয়ে নেতিবাচক সমালোচনা লাভ কৰাৰ লগতে বক্স অফিচতো বিশেষ সফল নহ’ল।^{২৮২৯৩০} দুবছৰৰ বিৰতিৰ পিছত ওভিয়াই বৰ্তমান যোগী বাবুৰ সৈতে কন্ট্ৰেক্টৰ নেচামণি নামৰ এখন আহিবলগীয়া কমেডী ধাৰাৰ ছবিত অভিনয় কৰি আছে।^৩১