অৰ্পণা নাঞ্চেৰলা

অৰ্পণা নাঞ্চেৰলা (ইংৰাজী ভাষা: Aparna Nancherla) এগৰাকী আমেৰিকা যুক্তৰাষ্ট্ৰন ষ্টেণ্ড-আপ কমেডিয়ান আৰু অভিনেত্ৰী। তেওঁ বোজাক হৰ্চমেন আৰু কৰ্পোৰেটৰ দৰে ধাৰাবাহিকত অভিনয় কৰিছে। ইয়াৰ উপৰি তেওঁ লেট নাইট উইথ চেথ মেয়াৰ্ছ^১ আৰু টোটেলী বায়াস্ড উইথ ডব্লিউ কামাউ বেলৰ বাবে লিখিছে। নাঞ্চেৰলাই ২০১৬ চনৰ ৮ জুলাইত টিগ নোটাৰোৰ বেণ্টজেন বল ৰেকৰ্ডছৰ জৰিয়তে তেওঁৰ প্ৰথম হাস্যৰসাত্মক এলবাম জাষ্ট পুটিং ইট আউট দেয়াৰ মুকলি কৰে।^২৩

প্ৰাৰম্ভিক জীৱন

অৰ্পণা নাঞ্চেৰলাৰ জন্ম আমেৰিকা যুক্তৰাষ্ট্ৰৰ ৱাশ্বিংটন ডি.চি.ৰ এটা ভাৰতীয় তেলুগু ভাষা হিন্দু পৰিয়ালত হৈছিল; তেওঁৰ পিতৃ-মাতৃ ১৯৭০ চনত ভাৰতৰ হাইদৰাবাদৰপৰা আমেৰিকালৈ প্ৰব্ৰজন কৰিছিল।^৪ তেওঁৰ এগৰাকী ডাঙৰ ভগ্নী আছে, যাৰ নাম ভাবনা।^৫

তেওঁ ৱাশ্বিংটনৰ উপকণ্ঠ অঞ্চলত ডাঙৰ-দীঘল হৈছিল আৰু ভাৰ্জিনিয়াৰ ফেয়াৰফাক্স কাউণ্টিৰ থমাছ জেফৰচন হাইস্কুল ফৰ চাইন্স এণ্ড টেকন’লজীত অধ্যয়ন কৰিছিল।^৫ নাঞ্চেৰলাই মেচাচুচেটছৰ এমহাৰ্ষ্ট কলেজত অধ্যয়ন কৰি মনোবিজ্ঞান বিষয়ত শিক্ষা গ্ৰহণ কৰে।^৪৬ তেওঁ ২০০৫ চনত স্নাতক ডিগ্ৰী লাভ কৰে।^৭

কৰ্মজীৱন

কলেজৰ শিক্ষা সমাপ্ত কৰি তেওঁ ৱাশ্বিংটন ডি.চি.লৈ উভতি আহে আৰু তাতেই তেওঁ ষ্টেণ্ড-আপ কমেডীৰ কেৰিয়াৰ আৰম্ভ কৰে। নাঞ্চেৰলাই প্ৰথমতে লছ এঞ্জেলছ আৰু তাৰ পিছত নিউয়ৰ্ক চহৰলৈ স্থানান্তৰিত হৈ ২০১৩ চনত অনুষ্ঠানটো বন্ধ নোহোৱালৈকে টোটেলী বায়াস্ডৰ বাবে লিখিছিল।^৮ পৰৱৰ্তী সময়ত তেওঁ ২০১৫ চনত লেট নাইট উইথ চেথ মেয়াৰ্ছৰ এগৰাকী লেখক গোটৰ সদস্য (staff writer) আছিল।^৯

নাঞ্চেৰলাৰ কামৰ তালিকাত কেইবাখনো ৱেব ধাৰাবাহিকো অন্তৰ্ভুক্ত হৈ আছে, যাৰ ভিতৰত জন আৰ্লিৰ সৈতে ইউৰ মেইন থিং অন্যতম। ইয়াৰ উপৰি তেওঁ আন এগৰাকী কমেডিয়ান জো ফায়াৰষ্টোনৰ সৈতে ৱমেনহুড নামৰ এখন ব্যংগাত্মক পৰামৰ্শমূলক ধাৰাবাহিক যুটীয়াভাৱে নিৰ্মাণ কৰিছিল আৰু তাত অভিনয়ো কৰিছিল।^১০৩

২০১৯ চনত তেওঁ চোল পেনকেকে ফানী অৰ ডাইৰ সহযোগত নিৰ্মাণ কৰা ৩০ মিনিটৰ ইউটিউব তথ্যচিত্ৰ লাফিং মেটাৰ্ছত ভূমুকি মাৰিছিল। য’ত কেইবাজনো কমেডিয়ানে মানসিক স্বাস্থ্যৰ বিষয়ে আলোচনা কৰিছিল।^১১

উপস্থিতি

লাইভ-একচন

নাঞ্চেৰলাই ক'নান^১২ আৰু কমেডী চেণ্ট্ৰেলৰ দ্য মেল্টডাউন উইথ জোনাহ এণ্ড কুমাইলত অংশগ্ৰহণ কৰিছে। ভেৰাইটি আলোচনীয়ে তেওঁক ২০১৬ চনৰ "চাবলগীয়া শীৰ্ষ ১০ গৰাকী কমেডিয়ান"ৰ তালিকাত অন্তৰ্ভুক্ত কৰিছিল।^১৩ আনহাতে দ্য নিউয়ৰ্ক টাইমছ-এ উল্লেখ কৰিছিল যে নাঞ্চেৰলা তেওঁৰ ব্যতিক্ৰমী আৰু মৰ্মস্পৰ্শী হাস্যৰসৰ বাবে এগৰাকী চাহিদাসম্পন্ন কমেডিয়ান হৈ পৰিছে।^১৪ তেওঁ ব্লু ৱমেন গ্ৰুপৰো সহ-সঞ্চালক, যাক ডেইলী বিষ্ট-এ "মানসিক অৱসাদৰ বিষয়ে এক আমোদজনক পডকাষ্ট" বুলি অভিহিত কৰিছে।^১৫

২০১৬ চনত কমেডী চেণ্ট্ৰেলে ঘোষণা কৰিছিল যে নাঞ্চেৰলাই নেটৱৰ্কটোৰ বাবে আধা ঘণ্টাৰ এটা বিশেষ অনুষ্ঠান ৰেকৰ্ড কৰিব।^১৬

২০১৭ চনত তেওঁ মাষ্টাৰ অৱ নানৰ দ্বিতীয় ছিজনত এগৰাকী ৰামেন ব্লগাৰৰ চৰিত্ৰত অভিনয় কৰিছিল।^১৭ ইয়াৰ উপৰি ২০১৭ চনৰপৰা ২০১৮ চনলৈ সম্প্ৰচাৰিত এইচবিঅ’ ধাৰাবাহিক ক্ৰেছিংত এটা চৰিত্ৰত অভিনয় কৰিছিল আৰু ২০১৭ চনৰপৰা ২০২০ চনলৈ কমেডী চেণ্ট্ৰেলৰ ধাৰাবাহিক কৰ্পোৰেটত গ্ৰেচৰ চৰিত্ৰত অভিনয় কৰিছিল।

২০১৮ চনৰ মাৰ্চ মাহত তেওঁ নেটফ্লিক্সৰ ধাৰাবাহিক দ্য ষ্টেণ্ডআপছত অংশগ্ৰহণ কৰে।^১৮ তেওঁ ২০১৮ চনৰ চলচ্চিত্ৰ এ চিম্পল ফেভাৰৰ জৰিয়তে ছবিজগতত আত্মপ্ৰকাশ কৰে।

২০২০ চনত তেওঁ নেটফ্লিক্সৰ ধাৰাবাহিক স্পেচ ফৰ্চত পেল্লা ভাট হিচাপে অভিনয় কৰিছিল।^১৯

২০২৪ চনৰ ১৭ জানুৱাৰীত নাঞ্চেৰলাই আফটাৰ মিডনাইট উইথ টেলৰ টমলিনচনৰ প্ৰথমটো খণ্ডত এগৰাকী পেনেলিষ্ট হিচাপে অংশ লৈছিল। ২০২৫ চনৰ ডিচেম্বৰ মাহত কমেডী ষ্ট্ৰীমিং সেৱা 'ড্ৰপআউট'-এ নাঞ্চেৰলাৰ প্ৰথমটো পূৰ্ণদৈৰ্ঘ্যৰ বিশেষ অনুষ্ঠান হোপফুল পটেটো মুকলি কৰে।^২০

কণ্ঠ অভিনয়

২০১৭ চনত তেওঁ চুটি এনিমেটেড ধাৰাবাহিক জিঞ্জাৰ স্নেপছত কিশীৰ চৰিত্ৰত কণ্ঠদান কৰিছিল।^২১

২০১৭ চনৰপৰা ২০২০ চনলৈ বোজাক হৰ্চমেনৰ চতুৰ্থ, পঞ্চম আৰু ষষ্ঠ ছিজনত নাঞ্চেৰলাই বোজাকৰ সতীয়া ভগ্নী হলিহকৰ চৰিত্ৰত কণ্ঠদান কৰিছিল।^২২