ৰেখা থাপা

ৰেখা থাপা (নেপালী ভাষা: रेखा थापा, জন্ম: ২১ আগষ্ট ১৯৮২) এগৰাকী নেপালী প্ৰসিদ্ধ অভিনেত্ৰী, ৰাজনীতিবিদ, চলচ্চিত্ৰ নিৰ্মাতা আৰু সমাজকৰ্মী। নেপালী চলচ্চিত্ৰ উদ্যোগলৈ তেওঁৰ গুৰুত্বপূৰ্ণ অৱদান আৰু মহিলাৰ ক্ষমতায়নৰ ক্ষেত্ৰত দৃঢ় অৱস্থানৰ বাবে তেওঁ বিশেষভাৱে পৰিচিত। দুটা দশকতকৈ অধিক দীঘলীয়া অভিনয় জীৱনত তেওঁ দুতকৈও অধিক চলচ্চিত্ৰত অভিনয় কৰিছে, য’ত বহুতো চলচ্চিত্ৰত শক্তিশালী নাৰী চৰিত্ৰ আৰু সামাজিক বিষয়সমূহ উপস্থাপন কৰা হৈছে। তেওঁ সৰ্বশ্ৰেষ্ঠ অভিনেত্ৰীৰ বাবে CG ডিজিটেল ফিল্ম এৱাৰ্ডছ লাভ কৰে আৰু ২০১১ চনত NEFTA ফিল্ম এৱাৰ্ডছতো সন্মানিত হয়।

তেওঁ দুবাৰ ৰাষ্ট্ৰীয় চলচ্চিত্ৰ বঁটা লাভ কৰিছে—২০০৬ চনত হিম্মত চলচ্চিত্ৰৰ বাবে আৰু ২০১০ চনত বাটো মুনি কো ফুল চলচ্চিত্ৰৰ বাবে। এই বঁটাসমূহে নেপালী চলচ্চিত্ৰত তেওঁৰ প্ৰভাৱশালী অভিনয় আৰু অৱদানক স্বীকৃতি দিয়ে।

ৰেখা থাপা সামাজিক আৰু ৰাজনৈতিক বিষয়ত স্পষ্ট মত প্ৰকাশ কৰাৰ বাবেও পৰিচিত, বিশেষকৈ মহিলাৰ অধিকাৰ সন্দৰ্ভত।^১২ নেপালী চলচ্চিত্ৰত পুৰুষ প্ৰধান চৰিত্ৰৰ আধিপত্য থকা সময়ত তেওঁ নিজৰ স্থান সুদৃঢ় কৰিছিল বুলি তেওঁক বহু সময়ত “হিৰোইন”ৰ সলনি “নাৰী হিৰো” বুলিও কোৱা হয়।^৩

জীৱনী

ৰেখা থাপাৰ জন্ম নেপালৰ পূব অংশৰ মোৰাং জিলাৰ সালকপুৰ গাঁৱত হয়।^৪ বিদ্যালয় শিক্ষা সম্পূৰ্ণ কৰাৰ পিছত তেওঁ উচ্চ শিক্ষাৰ বাবে কাঠমাণ্ডুলৈ যায়। অভিনেত্ৰী হোৱাৰ ইচ্ছাৰে তেওঁ বিভিন্ন মডেলিং আৰু গ্লেমাৰ কাৰ্যসূচীত অংশগ্ৰহণ কৰে। ১৯৯৯ চনত তেওঁ মিছ নেপাল সৌন্দৰ্য প্ৰতিযোগিতাত অংশ লৈ শীৰ্ষ ১০ জনীৰ ভিতৰত স্থান লাভ কৰে। তেওঁ হিন্দু ধৰ্ম অনুসৰণ কৰে।^৫

ব্যক্তিগত জীৱন

ফেব্ৰুৱাৰী ২০২২ চনত ৰেখা থাপাই বলৰাম শাহীৰ সৈতে আদালতীয় বিবাহ সম্পন্ন কৰে। এইটো আছিল তেওঁৰ দ্বিতীয় বিবাহ। ইয়াৰ আগতে তেওঁ চলচ্চিত্ৰ প্ৰযোজক ছাবিৰাজ ওঝাৰ সৈতে বিবাহপাশত আবদ্ধ হৈছিল যদিও ২০১২ চনত তেওঁলোকৰ বিচ্ছেদ হয়। তাৰ পিছৰে পৰা তেওঁ মাতৃৰ সৈতে বসবাস কৰি আহিছিল। তেওঁ এটি কন্যা সন্তানৰ মাতৃ।

ৰাজনীতি

২০১৩ চনত ৰেখা থাপাই নেপাল একীভূত কমিউনিষ্ট দল (মাওবাদী)ত যোগদান কৰে।^৬ পিছলৈ তেওঁ দলটোৰ সৈতে সম্পৰ্ক বিচ্ছিন্ন কৰে।

২০১৬ চনৰ ১২ ডিচেম্বৰত তেওঁ ৰাষ্ট্ৰীয় প্ৰজাতান্ত্ৰিক দলত যোগদান কৰে।^৭ ২০১৭ চনৰ ফেব্ৰুৱাৰীত তেওঁ দলটোৰ কেন্দ্ৰীয় সদস্য হিচাপে নিৰ্বাচিত হয়।^৮