ৰীমা লাগু

ৰীমা লাগু (ইংৰাজী: Reema Lagoo; জন্মগত নাম: নয়ন ভদভদে; ^১ ২১ জুন ১৯৫৮ – ১৮ মে' ২০১৭) এগৰাকী ভাৰতীয় মঞ্চ আৰু চলচ্চিত্ৰ অভিনেত্ৰী আছিল। তেওঁ মূলতঃ হিন্দী ভাষা আৰু মাৰাঠী ভাষা চিনেমাৰ কামৰ বাবে পৰিচিত আছিল।^২ তেওঁ মাৰাঠী ভাষা থিয়েটাৰৰ জৰিয়তে নিজৰ অভিনয় জীৱনৰ আৰম্ভণি কৰিছিল,^৩ যাৰ পিছত ১৯৯০ আৰু ২০০০ চনৰ আৰম্ভণিতে মাতৃৰ চৰিত্ৰত কৰা অভিনয়ৰ বাবে তেওঁ ঘৰে ঘৰে পৰিচিত হৈ পৰিছিল। ৯০ৰ দশকৰ ক্লাছিক টিভি চিটকম শ্ৰীমান শ্ৰীমতী (কোকিলা কুলকাৰ্ণী হিচাপে)^৪ আৰু তু তু ম্যেঁ ম্যেঁ (দেৱকী বাৰ্মা হিচাপে)-ত কৰা অভিনয়ৰ বাবে তেওঁ ব্যাপক চৰ্চা লাভ কৰিছিল।

ব্যক্তিগত জীৱন

ৰীমা লাগুৰ জন্ম ১৯৫৮ চনৰ ২১ জুনত নয়ন ভদভদে নামেৰে হৈছিল।^১ তেওঁৰ মাতৃ আছিল মাৰাঠী মঞ্চ অভিনেত্ৰী মন্দাকিনী ভদভদে, যি 'লেকুৰে উদণ্ড জাহালী' নাটকৰ বাবে বিখ্যাত আছিল।^৫ পুনেৰ হুজুৰপাগা এইচএইচচিপি হাইস্কুলত পঢ়ি থকা অৱস্থাতেই লাগুৰ অভিনয় ক্ষমতা লক্ষ্য কৰা হৈছিল।^৬ মাধ্যমিক শিক্ষা সম্পূৰ্ণ কৰাৰ পাছত তেওঁ পেছাদাৰী অভিনয়ত নামি পৰে। ১৯৭৯ চনৰপৰা দহ বছৰ ধৰি তেওঁ বোম্বাইৰ (বৰ্তমান মুম্বাই) 'ইউনিয়ন বেংক অৱ ইণ্ডিয়া'ত কৰ্মৰত আছিল। সেই সময়ছোৱাত টেলিভিছন আৰু বোলছবিত অভিনয় কৰাৰ লগতে তেওঁ বেংকসমূহৰ মাজত হোৱা সাংস্কৃতিক অনুষ্ঠানবোৰতো অংশগ্ৰহণ কৰিছিল।^৭

১৯৭৬ চনত তেওঁ বেংকৰ সহকৰ্মী তথা মঞ্চ অভিনেতা বিবেক লাগুক (১৯৫৩–২০২৫) লগ পায় আৰু ১৯৭৮ চনত তেওঁৰ সৈতে বিবাহপাশত আবদ্ধ হয়।^৮ বিবাহৰ পিছত তেওঁ ৰীমা লাগু নাম গ্ৰহণ কৰে। বিবেকে তেওঁলোকৰ সম্পৰ্কক "জীৱন পুনৰ নিৰ্মাণৰ এক বুজা-বুজি" বুলি অভিহিত কৰিছিল যদিও পিছলৈ তেওঁলোকৰ বিচ্ছেদ ঘটে। এই দম্পতীৰ কন্যা মৃণ্ময়ী লাগুও এগৰাকী অভিনেত্ৰী আৰু নাট্য পৰিচালক।^{৯১০১১}

মৃত্যু

২০১৭ চনৰ ১৭ মে'ৰ সন্ধিয়া ৭ বজালৈকে লাগুৱে ধাৰাবাহিক নামকৰণৰ শ্বুটিং কৰি আছিল। সেইদিনা নিশা তেওঁ বুকুত বিষ অনুভৱ কৰাত নিশা ১ বজাত মুম্বাইৰ কোকিলাবেন ধীৰুভাই আম্বাণী হাস্পতাললৈ লৈ যোৱা হয়। হৃদক্ৰিয়া বন্ধ হোৱাৰ ফলত পুৱা ৩:১৫ বজাত তেওঁৰ মৃত্যু হয়।^১২ মৃত্যুৰ সময়ত তেওঁক "সম্পূৰ্ণ সুস্থ" বুলি অভিহিত কৰা হৈছিল আৰু তেওঁৰ কোনো ধৰণৰ স্বাস্থ্যজনিত সমস্যা নাছিল।^১৩১৪ মুম্বাইৰ ওছিৱাৰা শ্মশানত তেওঁৰ কন্যা মৃণ্ময়ীয়ে অন্তিম সংস্কাৰ সম্পন্ন কৰে।^১৩