ৰাইডাং বেত

ৰাইডাং বেত (Calamus rotang) ভাৰত, শ্ৰীলংকা আৰু ম্যানমাৰৰ থলুৱা এক বৃহৎ আকাৰৰ বেত জাতীয় উদ্ভিদ। ই এবিধ লতাজাতীয় উদ্ভিদ। ইয়াক আচবাব, খৰাহী, লাখুটি, ছাতিৰ নাল, মেজ, চকী আদি নিৰ্মাণ কৰিবলৈ ব্যৱহাৰ কৰা হয়। দক্ষিণ-পূৱ এছিয়াত এই উদ্ভিদ প্ৰচুৰ পৰিমানে পোৱা যায়।

বিস্তৃতি

ৰাইডাং বেত ভাৰত, শ্ৰীলংকা আৰু ম্যানমাৰৰ থলুৱা উদ্ভিদ৷ অসমত এই বেত প্ৰধানকৈ কাৰ্বি আংলং জিলাৰ ধনশিৰি আৰু দলদলি বনাঞ্চল আৰু ডিব্ৰুগড় জিলাৰ পানীডিহিং বনাঞ্চলত উৎপত্তি হয়৷^১

বিৱৰণ

ৰাইডাং বেতৰ আঁকুহি কাইটযুক্ত হয়৷ সুবিধা অনুযায়ী লতাডালে পোনপটীয়াভাৱে আকাশমুৱা হৈ আঁকুহিৰ সহায়ত গছৰ ওপৰলৈ উঠি যায়৷ কোছা কোছে উৎপত্তি হোৱা শিপাৰ মুঢ়াত বিকশিত হোৱা পোখাবোৰ ক্ৰমে ডাঙৰ হৈ একোজোপা জোপোহা গছৰ আকৃতি ধাৰণ কৰে৷ বৌখাৰ সহায়ত পাতৰ ঠাৰি ধৰে আৰু এই ঠৰুৱাৰ আগলি অংশত ছিৰিলি ছিৰিলি পাতবোৰ বিকশিত হয়৷ ৰাইডাং বেতৰ গুৰি ভাগতকৈ লতাডালৰ আগভাগ ক্ৰমে মোটা হয়৷ ^১

ব্যৱহাৰ

ৰাইডাং বেত লাখুটি, লাঠি আদি তৈয়াৰ কৰিবলৈ ব্যৱহাৰ কৰা হয়৷ তাৰোপৰি এই বেতেৰে চকি,মেজ, খুঁটি আদিও সজা দেখা যায়৷এই বেতৰ আগলি ভাগে ধাৰণ কৰা কোমল বকটুৰ গাঁজ খাদ্য হিচাপেও খোৱা হয়৷^১

বাহ্যিক সংযোগ

• The rattan palm by Anna Guglielmo, Pietro Pavone and Cristina Salmeri
• Carl Ludwig Blume's Rumphia vol.3 with numerous plates of rattan palms