ৰঙিয়া জংচন ৰেল ষ্টেচন

ৰঙিয়া জংচন হৈছে বাৰাউনী-গুৱাহাটী ৰেলপথৰ নিউ বঙাইগাঁও-গুৱাহাটী শাখাত আৰু ৰঙিয়া-ৰঙাপাৰা-ডেকাৰগাঁও/মুৰ্কংচেলেক পথত থকা এটি জংচন ৰেলৱে ষ্টেচন। ই কামৰূপ জিলাৰ ৰঙিয়া মহকুমাত অৱস্থিত। ই ৰঙিয়া আৰু ইয়াৰ নিকটৱৰ্তী অঞ্চল সমূহৰ মুখ্য ৰেলৱে ষ্টেচন।

ইতিহাস

মূলতঃ ভাৰতীয় চাহ সংস্থাৰ হেঁচাত ১৯০২ চনত ইষ্টাৰ্ণ বেংগল ৰেলৱেৰ মিটাৰগ'জ কওনিয়া-ধাৰলা ৰেলপথ (বৰ্তমান বাংলাদেশৰ অন্তৰ্গত) অসমৰ ধুবুৰীলৈ সম্প্ৰসাৰণ কৰা হয়, যাতে অসমৰ চাহ সহজে কলিকতালৈ পৰিবহণ কৰিব পৰা যায়। ইষ্টাৰ্ণ বেংগল ৰেলৱে ভাৰতীয় উপ-মহাদেশৰ অন্যান্য ৰেল আৰু পথ জালিকাৰে সু-সংযোজিত হৈ আছিল।^১ ১৯০৮ চনত এই ৰেলপথচোৱা গোলোকগঞ্জৰ পৰা গুৱাহাটীৰ উত্তৰে অৱস্থিত আমিনগাঁওলৈ পুনঃ সম্প্ৰসাৰণ কৰা হয়। ইয়াৰ পৰা ফেৰীৰে ব্ৰহ্মপুত্ৰ নদ পাৰ হৈ পাণ্ডু ষ্টেচনত উজনী অসমলৈ যোৱা ট্ৰেইন ধৰিব লাগিছিল।^২৩ ১৯৬২ চনত শৰাইঘাট দলং নিৰ্মাণ হোৱাৰ পিছত ৰেলেৰে পোনে পোনে গুৱাহাটীলৈ যাব পৰা হ'ল।^৪

১৯১২ চনত ইষ্টাৰ্ণ বেংগল ৰেলৱেই ৰঙিয়াৰ পৰা টংলালৈ এটা শাখা ৰেলপথ নিৰ্মাণ কৰি উলিয়ায় আৰু ১৯৩২ চনত ইয়াক ৰঙাপাৰালৈ সম্প্ৰসাৰণ কৰা হয়।^৫

১৯৮৪ চনত নিউ বঙাইগাঁওৰ পৰা ৰঙিয়া হৈ গুৱাহাটীলৈ ব্ৰডগ'জ ৰেলপথ নিৰ্মাণ কৰা হয় আৰু পিছলৈ পৰ্যায়ক্ৰমে মিটাৰগ'জ ৰেলপথচোৱা ৰেল-কৰ্তৃপক্ষই বন্ধ কৰি দিয়ে।^৬

২০১১ চনৰ ১ চেপ্তেম্বৰৰ পৰা গজ পৰিবৰ্তনৰ কাম চলাৰ বাবে এই ৰঙিয়া-ৰঙাপাৰা-তেজপুৰ/মুৰ্কংচেলেক পথত যাত্ৰীবাহী ৰেলৰ চলাচল বন্ধ কৰি দিয়া হয়। ২০১৩ চনৰ ৪ জানুৱাৰীৰ পৰা ব্ৰডগজলৈ পৰিবৰ্তন হোৱা ৰঙিয়া-ৰঙাপৰা-ডেকাৰগাঁও ৰেলপথত যাত্ৰীবাহী ৰেল চলাচলৰ আৰম্ভণি হয়।^৭

ৰেলপথ দ্বৈতকৰণ

ৰঙিয়াহৈ যোৱা নিউ বঙাইগাঁও-কামাখ্যা অংশৰ ৰেলপথৰ দ্বৈতকৰণ প্ৰকল্পটো ২০১৩-১৪ চনৰ ৰেল বাজেটত অনুমোদন জনোৱা হয়।^৮

সা-সুবিধা

ৰঙিয়া ৰেল ষ্টেচনত এটা দুখন বিছনাযুক্ত ৰিটায়াৰিং ৰূম আছে।^৯

বাহ্যিক সংযোগ

• Trains at Rangiya