সুবি সুৰেশ

সুবি সুৰেশ (Subi Suresh) (২৩ আগষ্ট ১৯৮১ – ২২ ফেব্ৰুৱাৰী ২০২৩) এগৰাকী ভাৰতীয় মালয়ালম চলচ্চিত্ৰৰ অভিনেত্ৰী, দূৰদৰ্শনৰ ঘোষিকা, হাস্যৰসাত্মক শিল্পী আৰু মঞ্চ-অনুষ্ঠানৰ পৰিৱেশিকা আছিল। তেওঁ মূলতঃ থাস্কাৰা লাহালা (২০১০), গৃহনাথন (২০১২) আৰু ড্ৰামা (২০১৮) আদি জনপ্ৰিয় মালয়ালম ভাষা চলচ্চিত্ৰত অভিনয় কৰাৰ বাবে পৰিচিত। নিজা কমিক কণ্ঠশৈলী আৰু স্বাভাৱিক হাস্যৰসাত্মক অভিনয়ৰ জৰিয়তে তেওঁ মালয়ালম কমেডি জগতত এক সুকীয়া স্থান গঢ়ি তুলিছিল।^১চলচ্চিত্ৰৰ উপৰি সুবি সুৰেশে এগৰাকী পেছাদাৰী কমেডিয়ান আৰু দূৰদৰ্শনৰ আয়োজক হিচাপেও কাম কৰিছিল। তেওঁ চিনেমালা আদি জনপ্ৰিয় টেলিভিছন অনুষ্ঠানত নিয়মীয়াকৈ অংশগ্ৰহণ কৰি দৰ্শকৰ মাজত বিশেষ জনপ্ৰিয়তা লাভ কৰিছিল।^২৩৪

প্ৰাৰম্ভিক জীৱন

সুবি সুৰেশৰ জন্ম ভাৰতৰ কেৰালা ৰাজ্যৰ এৰ্নাকুলাম জিলাৰ ত্ৰিপুনিথুৰাত হৈছিল। তেওঁ কোচিৰ এখন সচ্ছল পৰিয়ালত ডাঙৰ-দীঘল হয়। তেওঁৰ পিতৃৰ নাম সুৰেশ আৰু মাতৃৰ নাম অম্বিকা।^৫তেওঁ ত্ৰিপুনিথুৰা চৰকাৰী বিদ্যালয়ৰপৰা বিদ্যালয় শিক্ষা সম্পূৰ্ণ কৰে। ইয়াৰ পিছত এৰ্নাকুলামস্থিত ছেইণ্ট টেৰেছা'ছ কলেজত উচ্চ শিক্ষা গ্ৰহণ কৰে।^৬

কৰ্মজীৱন

সুবি সুৰেশ মূলতঃ মালয়ালম ভাষা দৰ্শকৰ মাজত তেওঁৰ হাস্য-ব্যংগধৰ্মী অনুষ্ঠানসমূহৰ বাবে সুপৰিচিত আছিল। ১৯৯৩ চনৰ আগষ্ট মাহত তেওঁ জনপ্ৰিয় টেলিভিছন অনুষ্ঠান চিনেমালাৰ ঘোষিকা হিচাপে নিজৰ কৰ্মজীৱন আৰম্ভ কৰে। ^৭ ২০০১ চনত নিছাৰে পৰিচালনা কৰা অপৰন্নাৰ নগৰথিল চলচ্চিত্ৰৰ জৰিয়তে তেওঁ মালয়ালম চলচ্চিত্ৰ জগতত আত্মপ্ৰকাশ কৰে। ইয়াৰ পিছত তেওঁ বিশখনতকৈও অধিক চলচ্চিত্ৰত অভিনয় কৰে। সেইসমূহৰ ভিতৰত এলচাম্মা এন্না আংকুট্টি, পঞ্চবৰ্ণথাথা, হেপী হাজবেণ্ডছ আৰু ড্ৰামা বিশেষভাৱে উল্লেখযোগ্য।^৮চলচ্চিত্ৰৰ উপৰি সুবি সুৰেশে টেলিভিছন ধাৰাবাহিক থাস্কাৰা লাহালা (২০১০), কুট্টিপট্টালম আদিত অভিনয় কৰে। ২০১২ চনৰ গৃহনাথন চলচ্চিত্ৰতো তেওঁ অভিনয় কৰিছিল। ইয়াৰ উপৰি তেওঁ বহু মালয়ালম টেলিভিছন অনুষ্ঠানত ঘোষিকা আৰু হাস্যকৌতুক শিল্পী হিচাপে অংশগ্ৰহণ কৰিছিল।^৯ সুবি সুৰেশ কোচিন কলাভৱন শিল্পীগোষ্ঠীৰ এগৰাকী সদস্যা আছিল। মহিলাসকলৰ মিমিক্ৰি আৰু কমেডি অনুষ্ঠানত অংশগ্ৰহণ তুলনামূলকভাৱে কম হোৱা সময়ছোৱাত তেওঁ এই ক্ষেত্ৰখনত সফলতা লাভ কৰি জনপ্ৰিয় হাস্যকৌতুক অনুষ্ঠানসমূহৰ অন্যতম মুখ হিচাপে পৰিচিতি অৰ্জন কৰিছিল।^১০

মৃত্যু

২০২৩ চনৰ ২২ ফেব্ৰুৱাৰীত যকৃতৰ ৰোগত আক্ৰান্ত হৈ কোচিৰ ৰাজাগিৰি চিকিৎসালয়ত সুবিৰ মৃত্যু হয়। মৃতুৰ সময়ত তেওঁৰ বয়স আছিল ৪১ বছৰ।^১১

ফিল্মগ্ৰাফী

উৎস:

দূৰদৰ্শন