ল'ৰেন বেথেল

ল'ৰেন বেথেল (Lauran Bethell) এগৰাকী আমেৰিকান বেপ্টিষ্ট মিছনেৰী^১আৰু পূব ইউৰোপত বাস কৰা মানৱ অধিকাৰৰ সমৰ্থক।^২ থাইলেণ্ডৰ নিউ লাইফ চেণ্টাৰ চিয়াং মাইৰ তেওঁ অন্যতম প্ৰতিষ্ঠাপক, য'ত প্ৰাক্তন বেশ্যা বা যৌন সৰবৰাহৰ বলি হোৱা লোকসকলক সাক্ষৰ আৰু নিয়োগযোগ্য কৰি তোলাৰ লক্ষ্যৰে খ্ৰীষ্টান ভিত্তিক শিক্ষা প্ৰদান কৰা হয়।^৩ তেওঁ আমেৰিকান বেপ্টিষ্ট আন্তঃৰাষ্ট্ৰীয় মন্ত্ৰালয়ৰ সৈতে গ্ল'বেল কনচালটেণ্টৰ পদত অধিষ্ঠিত।^৪ বৰ্তমান তেওঁ নেদাৰলেণ্ডত থাকে।^৫

জীৱনী

বেথেল আছিল ছান জোৱাকিন উপত্যকাত ডাঙৰ-দীঘল হোৱা একমাত্ৰ কন্যা আছিল। তেওঁৰ পিতৃ এজন বেপ্টিষ্ট মন্ত্ৰী আছিল।^৬

বেথেলে ৰেডলেণ্ডছ বিশ্ববিদ্যালয়ত পঢ়িছিল।^৭ ইয়াৰ পিছত কিছু দিনৰ ভিতৰতে তেওঁ নিজৰ শৈশৱৰ সপোন অনুসৰণ কৰি দূৰৈৰ দেশ ভ্ৰমণ কৰে আৰু ১৯৭৮ চনত হংকঙত শিক্ষকতা আৰম্ভ কৰে আৰু এবছৰৰ পিছত থাইলেণ্ড ভ্ৰমণ কৰে।^৭ থাইলেণ্ডৰ বেশ্যাবৃত্তিৰে পূৰ্ণ জিলা এখন দেখি তেওঁ ১৯৮৭ চনত চিয়াং মাইত নিউ লাইফ চেণ্টাৰ প্ৰতিষ্ঠা কৰে আৰু তাৰ পৰিচালক হয়।^৮৯ ১৯৯৫ চনৰ ভিতৰত তেওঁৰ পৰিচালনাত নিউ লাইফ চেণ্টাৰে প্ৰতিদিনে প্ৰায় ১২০ গৰাকী মহিলাক সহায় কৰিছিল৷ তেওঁলোকক বৃত্তিগত দক্ষতা শিকাইছিল আৰু তেওঁলোকক সাক্ষৰতাৰ বাবে নৈশ বিদ্যালয়ত পঢ়িবলৈ সক্ষম কৰিছিল।^১০ থাইলেণ্ডৰ বেশ্যালয়ৰ পৰা মহিলা আৰু শিশুক আঁতৰাই নিবলৈও তেওঁ স্থানীয় আৰক্ষী আৰু পৰিয়ালৰ সৈতে কাম কৰিছিল।^৬

২০০১ চনত তেওঁ আমেৰিকান বেপ্টিষ্ট মন্ত্ৰালয়ৰ বাবে মানৱ সৰবৰাহ আৰু মানৱ শোষণৰ আন্তঃৰাষ্ট্ৰীয় পৰামৰ্শদাতা হিচাপে তেওঁ কাম কৰিবলৈ আৰম্ভ কৰে।^৫ ২০০০ চনত তেওঁ আমেৰিকাৰ বৈদেশিক সম্পৰ্ক সমিতিৰ হৈ যৌন সৰবৰাহৰ বিষয়ে সাক্ষ্য দিছিল।^১১ ২০০৩ চনত তেওঁ পুনৰ আমেৰিকাৰ প্ৰতিনিধি সদনত মানৱ সৰবৰাহৰ বিষয়ে সাক্ষ্য দিয়ে।^১২ পিছৰ বছৰ ২০০৪ চনৰ জুলাই মাহত বেথেলে বেপ্টিষ্ট বিশ্ব শতবাৰ্ষিকী কংগ্ৰেছৰ প্ৰি-কনফাৰেন্সত ভাষণ দিয়ে।^১৩ ২০০৫ চনত,^১৪ তেওঁ বেপ্টিষ্ট ৱৰ্ল্ড এলায়েন্সৰ মানৱ অধিকাৰ বঁটা লাভ কৰে।^১৫

২০০৬ চনৰ নৱেম্বৰ মাহত বেথেলে আমেৰিকান বেপ্টিষ্ট চাৰ্চ ইউ এছ এ প্ৰতিষ্ঠাৰ ১০০ বছৰীয়া জয়ন্তী উপলক্ষে ফ্ল'ৰিডাৰ অৰলেণ্ডোত অনুষ্ঠিত হোৱা এক সন্ধিয়াৰ সমাৱেশত ভাষণ দিয়ে।^১৬২০০৯ চনৰ মাৰ্চ মাহত বেথেলে মাৰ্চাৰ বিশ্ববিদ্যালয়ত "STOP Sex Trafficking: A Call to End 21st Century Slavery" নামৰ এখন সন্মিলনত ভাষণ দিয়ে।.^১৭

বেথেলৰ দৰ্শন হ'ল যে বেশ্যা শিশুৱে তেওঁলোকৰ নিৰ্যাতনৰ পৰা সুস্থ হৈ উঠিব পাৰে আৰু তেওঁ কয় যে যিসকলে অন্য ধৰণে পৰামৰ্শ দিয়ে তেওঁলোকে "মানৱ আত্মাৰ শক্তিক পৰ্যাপ্ত কৃতিত্ব নিদিয়ে।"^১৮ বেথেলে বেশ্যাবৃত্তিৰ বিৰুদ্ধে যুঁজ দিয়াৰ "নৰ্ডিক মডেল"কো সমৰ্থন কৰে।^৬